[ក្រសួងព័ត៌មាន] - អគ្គស្នងការនគរបាលជាតិ៖ នគរបាលចរាចរណ៍ដែលចុះអនុវត្តន៍ផ្ទាល់ ម្នាក់ៗទទួលបានប្រាក់រង្វាន់ពីការផាកពិន័យអ្នកមិនគោរពច្បាប់ចរាចរណ៍ប្រមាណ២លានរៀល
2020-07-07
Go to the website published ក្រសួងព័ត៌មាន
ភ្នំពេញ ថ្ងៃទី០៧ ខែកក្កដា ឆ្នាំ២០២០
អគ្គស្នងការនគរបាលជាតិ បានអះអាងថា ក្នុងមួយខែ នគរបាលចរាចរណ៍ម្នាក់ទទួលបានប្រាក់រង្វាន់ពីការផាកពិន័យចំពោះអ្នកមិនគោរពច្បាប់ចរាចរណ៍បានប្រមាណជាង២លានរៀល សម្រាប់រាជធានីភ្នំពេញ និងនគរបាលចរាចរណ៍តាមបណ្តាលខេត្តបានប្រមាណ២០ម៉ឺនរៀល ខណៈនគរបាលចរាចរណ៍នៅខេត្តតាកែវបានចំនួនតិចជាងគេ។
ថ្លែងក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆមាសទី១ និងទិសដៅការងារឆមាសទី២ ឆ្នាំ២០២០ នាព្រឹកថ្ងៃទី០៧ ខែកក្កដា ឆ្នាំ២០២០ នៅទីស្ដីការក្រសួងមហាផ្ទៃ ឯកឧត្ដម នាយឧត្តសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានអនុគណៈកម្មការទី២ នៃគណៈកម្មាធិការជាតិ សុវត្ថិភាពចរាចរណ៍ផ្លូវគោកបានលើកឡើងថា ថវិកាដែលនគរបាលចរាចរណ៍ផ្លូវគោក ផាកពិន័យ ៥ភាគរយ ត្រូវចូលរដ្ឋនោះ មិនបានចូលរដ្ឋនោះទេ ដោយសារតែថវិកាទាំងនោះ ត្រូវបានយកមកបោះពុម្ពឯកសារបម្រើកិច្ចការនគរបាលដដែល។ ឯកឧត្ដម នាយឧត្តសេនីយ៍សន្តិបណ្ឌិតបានគូសបញ្ជាក់ថា “ខ្ញុំបានបូកសរុបមើលកម្លាំងនគរបាលចរាចរណ៍ផ្លូវគោកដែលអនុវត្តន៍ផ្ទាល់ទទួលបានថវិកាផាកពិន័យដែលប្រាក់រង្វាន់នោះប្រមាណ២០ម៉ឺនរៀលនៅតាមបណ្តាខេត្ត ហើយនៅភ្នំពេញក្នុងមួយនាក់២លានរៀល ចំណែកប្រាក់ទទួលបានតិចជាងគេគឺនៅខេត្តតាកែវ”។
ឯកឧត្ដម នាយឧត្តសេនីយ៍សន្តិបណ្ឌិតបានបន្ដថា ទោះបីជា មានការប្រជុំជាច្រើនរវាងគណៈកម្មាធិការជាតិសុវត្ថិភាពចរាចរណ៍ផ្លូវគោកជាមួយសង្គមស៊ីវិលជាច្រើនលើកក្តី តែចំពោះការអនុវត្តច្បាប់ចរាចរណ៍ផ្លូវគោក គឺសកម្មភាពអនុវត្តន៍ច្បាប់របស់នគរបាល និងការអនុវត្តការផាកពិន័យនៅតែធ្វើជាធម្មតាដើម្បីចូលរួមទប់ស្កាត់គ្រោះថ្នាក់ចរាចរ។ ចំពោះនគរបាលចរាចរណ៍អនុវត្តន៍ច្បាប់ចរាចរណ៍មិនប្រក្រតី នឹងត្រូវយកច្បាប់ បទ បញ្ញត្តិមកអនុវត្តន៍ហើយ។ “គ្មានអ្វីជារង្វាន់ដល់ប៉ូលីសនោះទេ ព្រោះពិភពលោកគេធ្វើ គឺធ្វើយ៉ាងណាប្រាក់រង្វាន់បានដល់ដៃគាត់ ហើយបច្ចុប្បន្ននេះមិនចាំបាច់និយាយច្រើនទេ រកឃើញកន្លែងណាមួយមិនអនុវត្តន៍បានត្រឹមត្រូវយកច្បាប់ និងវិន័យទៅអនុវត្តន៍តែម្តង”។ នេះគឺជាការបញ្ជាក់បន្ថែមរបស់ឯកឧត្ដម នាយឧត្តសេនីយ៍សន្តិបណ្ឌិត នេត សាវឿន។
ជាមួយគ្នានោះដែរឯកឧត្ដម នាយឧត្តសេនីយ៍សន្តិបណ្ឌិតក៏បានបង្ហាញពីការកើន និងថយចុះនៃគ្រោះថ្នាក់ចរាចរផ្លូវគោកដោយអះអាងថា ចំណុចថយចុះនៃចំនួនគ្រោះថ្នាក់មកពីការដឹកនាំ ការប្រតិបត្តិអនុវត្តន៍ គឺការដឹកនាំ ការត្រួតពិនិត្យ និងវិធានការរឹតបន្តឹងច្បាប់ចរាចរណ៍។
លោកជំទាវ មឹន មាណវី រដ្ឋលេខាធិការក្រសួងសាធារណការនិងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោកបានបញ្ជាក់ថា គ្រោះថ្នាក់ចរាចរណ៍ក្នុងឆមាសទី១ ឆ្នាំ២០២០ បានកើតឡើងចំនួន១,៦១៩លើក បណ្ដាលឱ្យស្លាប់ចំនួន៨១៦នាក់ និងរបួសចំនួន២,៤៤៩នាក់ (របួសធ្ងន់១,១២៣នាក់) អ្នកស្លាប់ភាគច្រើននៅរាជធានីភ្នំពេញ ១៤៦នាក់ ខេត្តកំពង់ធំ ៦០នាក់ និងខេត្តកណ្ដាល ៥៩នាក់។ លោកជំទាវបានបន្ដថា មូលហេតុនៃការគ្រោះថ្នាក់ចរាចរណ៍មកពីបើកបរ លើសល្បឿនកំណត់៣៣ភាគរយ មិនគោរពសិទ្ធិ២៣ភាគរយ មិនប្រកាន់ស្ដាំ១៤ភាគរយ វ៉ាជែង១០ភាគរយ បត់១០ភាគរយ ស្រវឹង៦ភាគរយ កត្តាយានយន្ដ៤ភាគរយ និងងងុយ១ភាគរយ។ ទន្ទឹមនេះ បើប្រៀបធៀបឆមាសទី១ ឆ្នាំ២០១៩ គ្រោះថ្នាក់ថយចំនួន៥៥២លើក ស្មើ២៥ភាគរយ ស្លាប់ថយចំនួន១៧២នាក់ ស្មើ១៧ភាគរយ និងរបួសថយ៧៧៨នាក់ ស្មើ២៤ភាគរយ។
យោងតាមរបាយការណ៍បូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រ ចាំឆមាទី១ ឆ្នាំ២០២០ និងទិសដៅការងារឆមាសទី២ ឆ្នាំ២០២០បានឱ្យដឹងថា ក្នុងកិច្ច ប្រតិបត្តិការពិនិត្យអនុវត្តន៍ច្បាប់ ប្រចាំឆមាទី១ ឆ្នាំ២០២០នេះ សមត្ថកិច្ចបានត្រួតពិនិត្យយានយន្ដសរុបចំនួន៩៨៧,០០៣គ្រឿង ក្នុងនោះម៉ូតូចំនួន៦១ភាគរយ ហើយបានរកឃើញយានយន្ដល្មើស និងពិន័យចំនួន២៣៤,១១៤គ្រឿង ស្មើនឹង២៤ភាគរយ ក្នុងនោះម៉ូតូចំនួន៦៥ភាគរយ។ ដោយឡែកការរឹតបន្ដឹងច្បាប់ស្ដីពីចរាចរណ៍ផ្លូវគោកតាមអនុក្រឹត្យលេខ៣៦ អនក្រ.បក រយៈពេល២ខែ(ឧសភា-មិថុនា ឆ្នាំ២០២០) បានធ្វើការពិន័យសរុបចំនួន៨៣,៣៨៦ករណី ក្នុងនោះ ម៉ូតូចំនួន៦១,០២២គ្រឿង ស្មើ៧៣ភាគរយ និងរថយន្ដចំនួន២២,៣៦៤ករណី ស្មើ២៧ភាគរយ។ ការអនុវត្តការបង់ប្រាក់ពិន័យតាមស្នាក់ការនគរបាលចរាចរណ៍ផ្លូវគោក ដែលបានកំណត់ទទួលបានប្រាក់ពិន័យចំនួន១២,៥០១,១៨៥,០០០រៀល ក្នុងនោះ មិនទាន់បង់ប្រាក់ពិន័យចំនួន២០ភាគរយ៕
