[AKP] - កិច្ចប្រជុំបូកសរុបលទ្ធផលការងាររបស់គណៈកម្មាធិការសម្របសម្រួលអចិន្ត្រៃយ៍នៃ គណៈកម្មាធិការដឹកនាំត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់
2020-05-27
Go to the website published AKP
AKP ភ្នំពេញ ថ្ងៃទី២៧ ខែឧសភា ឆ្នាំ២០២០ -- កាលពីថ្ងៃអង្គារ ៥កើត ខែជេស្ឋ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៦ ខែឧសភា ឆ្នាំ២០២០ ឯកឧត្តម សេង ឈួន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍នៃគណៈកម្មាធិការដឹកនាំត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានដឹកនាំកិច្ចប្រជុំបូកសរុបលទ្ធផលការងារដែលបានអនុវត្តន៍រយៈពេល ៣ខែកន្លងមក ដោយមានការចូលរួមពីឯកឧត្តមនាយកខុទ្ទកាល័យ ឯកឧត្តមអនុរដ្ឋលេខាធិ ការទទួលបន្ទុក សមាជិក សមាជិកាលេខាធិការដ្ឋាន និងប្រធាន អនុប្រធានស្ថានីយជញ្ជីងទាំង ២៨។
នៅក្នុងឱកាសនោះ ឯកឧត្តមរដ្ឋលេខាធិការបានណែនាំមន្ត្រីតាមស្ថានីយឱ្យពង្រឹងការអនុវត្តការងារឱ្យបានកាន់តែប្រសើរ និងមានប្រសិទ្ធភាព ប្រកាន់ភ្ជាប់ក្រមសីលធម៌ការងារ និងសហការល្អជាមួយដៃគូពាក់ព័ន្ធ និងបានសម្តែងការកោតសរសើរចំពោះមន្ត្រីទាំងអស់ដែលបានខិតខំអនុវត្តន៍ការងាររឹតបន្តឹងបទល្មើសដឹកលើសទម្ងន់កម្រិតរយៈពេលកន្លងមក។
ជាមួយគ្នានេះដែរ អង្គប្រជុំបានលើកឡើងពីទិសដៅការងារដែលត្រូវអនុវត្តន៍ក្នុងត្រីមាសបន្ទាប់ ដូចជា ការងារបង្កើតទីតាំងស្ថានីយថ្មី រុះរើ និងធ្វើឱ្យប្រសើរឡើងនៅតាមស្ថានីយមួយចំនួន។ តាមរបាយការណ៍នៃការអនុវត្ត ៣ខែកន្លងទៅ មានបទល្មើសសរុបចំនួន ៩៤៩គ្រឿង ក្នុងនោះខែកុម្ភៈមានបទល្មើសចំនួន ២៧០គ្រឿង, ខែមីនា ចំនួន ៣៨១ គ្រឿង, និងខែមេសា ២៩៨គ្រឿង។
សូមបញ្ជាក់ថា នេះជាត្រីមាសដំបូងនៃការអនុវត្តការងាររបស់គណៈកម្មាធិការដឹក នាំត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ដែលឯកឧត្តមទេសរដ្ឋមន្រ្តី រដ្ឋមន្ត្រីក្រសួងសាធារណការ និងដឹកជញ្ជូន បានធ្វើកំណែទម្រង់សមាសភាពមន្ត្រីដោយផ្អែកតាមអនុក្រឹត្យលេខ ១៤១អនក្រ.បក ស្តីពីការបង្កើតគណៈកម្មាធិការដឹកនាំត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់៕
ដោយ ទេស ច័ន្ទសុធារី
