[Phnom Penh Times] - ប្រកាសតែងតាំងប្រធានមន្ទីរសាធារណការ និងដឹកជញ្ជូនខេត្តរតនគិរី
2020-04-28
Go to the website published Phnom Penh Times
រតនគិរី៖ លោក សាយ សាមាន អតីតអនុប្រធានមន្ទីរ ត្រូវបានតែងតាំងជាប្រធានមន្ទីរសាធារណកាថ្មី បន្ទាប់ពីលោក ស៊ុន ប៉ូលីន ប្រធានមន្ទីរសាធារណការចាស់ ត្រូវប្ដូរទៅទទួលភារកិច្ចថ្មី នៅក្រសួងសាធារណការ និងដឹកជញ្ជូន។
នៅព្រឹកថ្ងៃទី២៨ ខែមេសា ឆ្នាំ២០២០ ឯកឧត្ដម ស៊ុយ សាន រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងពិធីប្រកាសចូលកាន់មុខតំណែងប្រធានមន្ទីរថ្មី នៃមន្ទីរសាធារណការ និងដឹកជញ្ជូន ខេត្តរតនគិរី។ ពិធីប្រកាសនេះមានការចូលរួមពីសំណាក់ប្រតិភូក្រសួង ឯកឧត្ដម ណាប់ ប៊ុនហេង ប្រធានក្រុមប្រឹក្សាខេត្ត ឯកឧត្ដម ថងសាវុន អភិបាលខេត្តរតនគិរី ថ្នាក់ដឹកនាំ នៃមន្ទីរពាក់ព័ន្ធជុំវិញខេត្ត មន្ត្រីរាជការនៃមន្ទីរសាធារណការ និងដឹកជញ្ជូន សរុបទាំងអស់ប្រមាណជា១០០នាក់។
ឯកឧត្ដមរដ្ឋលេខាធិការបានគូសបញ្ជាក់ថាវិស័យសាធារណការ និងដឹកជញ្ជូនជាវិស័យមួយ ដែលដើរតួយ៉ាងសំខាន់ក្នុងការទ្រទ្រង់និងអភិវឌ្ឍសេដ្ឋកិច្ចឱ្យមានភាពរឹងមាំនិងមាននិរន្តរភាពបើគ្មានហេដ្ឋារចនាសម្ព័ន្ធរឹងមាំ គ្រប់ច្រកល្ហក ប្រទាក់ក្រឡាគ្នាដូចសរសៃរឈាម តភ្ជាប់ពីតំបន់មួយទៅតំបន់មួយទៀតនោះទេ ក៏គ្មានការអភិវឌ្ឍដែរ ជាក់ស្ដែងខេត្តរតនគិរី ជាខេត្តប្រកបដោយសក្ដានុពលមួយ អាចពង្រីកវិសាលភាពរបស់ខ្លួន មិនត្រឹមតែជាខេត្តអេកូទេសចរណ៍ប៉ុណ្ណោះទេ តែថែមទាំងជាខេត្តបោះជំហានទៅជាខេត្តមានឧស្សាហកម្ម ពាណិជ្ជកម្មដ៏មានសន្ទុះរីកចម្រើនគួរអោយគត់សម្គាល់ផងដែរ។
ឯកឧត្តម បានកោតសរសើ ដល់មន្ទីរសាធារណការខេត្ត ដែលខិតខំប្រឹងប្រែងបំពេញការងារលើវិស័យសាធារណការ និងដឹកជញ្ជូនក្នុងខេត្តនេះ ឲ្យមានការរីកចម្រើនគួរឲ្យកត់សម្គាល់ ហើយសង្ឃឹមថា បទពិសោធន៍ល្អៗ ទាំងនេះ និងត្រូវបានចែករំលែកដល់ថ្នាក់ដឹកនាំ និងមន្ត្រី រាជការមន្ទីរសាធារណការនិងដឹកជញ្ជូនខេត្តរតនគិរីយកទៅអនុវត្តបន្ត។
ឯកឧត្ដមរដ្ឋលេខាធិការបានផ្ដាំផ្ញើ លោក សាយ សាមាន ដែលត្រូវមកជំនួសប្រធានមន្ទីរចាស់ត្រូវខិតខំបំពេញការងារអស់ពីកម្លាំងកាយចិត្ត ដើម្បីបន្តដឹកនាំ មន្ទីរសាធារណការ និងដឹកជញ្ជូនឲ្យមានការរីកចម្រើនថែមទៀតស្របតាមការរីកចម្រើនរបស់ខេត្ត។ ជាពិសេស ត្រូវបម្រើសេវាសាធារណៈជូនបងប្អូនប្រជាពលរដ្ឋ ប្រកបដោយ ភាពកក់ក្ដៅ ស្របតាមប្រសាសន៍ដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺធ្វើឲ្យបានលឿន ហើយមានប្រសិទ្ធភាព និងតម្លាភាព ដើម្បីបន្តដឹកនាំមន្ទីរសាធារណការ និងដឹកជញ្ជូនឲ្យមានការរីកចម្រើនថែមទៀត។ ជាពិសេស ត្រូវ សហការសាមគ្គីភាពផ្ទៃក្នុងជាធ្លុងមួយនិងរឹងមាំ ពង្រីកនិងពង្រឹងទំនាក់ទំនងល្អជាមួយថ្នាក់ដឹកនាំមន្ទីរជុំវិញខេត្ត ជាពិសេសជាមួយអាជ្ញាធរដែនដីគ្រប់លំដាប់ថ្នាក់ឲ្យបានល្អប្រសើរ។
ជាកិច្ចឆ្លើយតបនូវគុណូបការៈនិងការផ្ដល់ទំនុកទុកចិត្ត ក្នុងការតែងតាំងនេះ លោកប្រធានមន្ទីរសាធារណការ និងដឹកជញ្ជូនខេត្តរតនគិរី លោក សាយ សាមាន បានប្ដេជ្ញាចិត្តគោរពតាមច្បាប់រដ្ឋធម្មនុញ្ញ បទប្បញ្ញតិ គោលការណ៍នានារបស់ព្រះរាជាណាចក្រកម្ពុជា អនុវត្តតាមយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល រឹតចំណងសាមគ្គីផ្ទៃក្នុង និងសហការជាមួយមន្ទីរជុំវិញខេត្ត និងអាជ្ញាធរដែនដី ជាពិសេសអនុវត្តឲ្យបានជាដាច់ខាត នូវអនុសាសន៍ទាំង១១ចំណុច របស់សម្ដេចតេជោនាយករដ្ឋមន្ត្រី សំដៅលើកកម្ពស់ប្រសិទ្ធភាព គុណភាពការងារក្នុងវិស័យសាធារណការ និងដឹកជញ្ជូន ឲ្យមានការរីកចម្រើន និងអភិវឌ្ឍថែមមួយកម្រិតទៀត៕
