កំពង់ចាម ៖ ស្ពានកៀនជ្រៃ ស្រុកកំពង់សៀម ស្ថាបនាបានចំនួន ៩៥ ភាគរយ នៅសល់ការងារប្រមាណ ៥ភាគរយទៀតប៉ុណ្ណោះមកដល់ចុងខែមីនានេះពោល គឺនឹងអាចហើយរួចរាល់មុនផែនការកំណត់ខែឧសភា ឆ្នាំ២០២០។ លោក ឡុញ មឿន ប្រធានការដ្ឋានស្ពានកៀនជ្រៃរបស់នាយកដ្ឋានវិស្វកម្មក្រសួងការពារជាតិបានប្រាប់កាសែតរស្មីកម្ពុជានៅថ្ងៃទី ៣១ ខែមីនា ឆ្នាំ២០២០ថា បញ្ហាដែលយើងសម្រុកសាងសង់ស្ពានមួយនេះទាំងយប់ទាំងថ្ងៃរយ:ពេលប្រហែលពីរខែចុងក្រោយបែបនេះ គឺនៅបន្ទាប់ពីមានសំណូមពរពីអាជ្ញាធរ និងការពិនិត្យជាក់ស្តែង ពីស្ថានភាពលំបាកធ្វើដំណើររបស់ប្រជាពលរដ្ឋតាមផ្លូវវាង របស់ស្ពានដែលបណ្តាលឳ្យគ្រោះថ្នាក់ចរាចរណ៍ស្លាប់ក្មេងប្រុសម្នាក់កន្លងមកនោះ ពិសេសបទបញ្ជារបស់ថ្នាក់លើ គឺដាច់ខាតត្រូវឳ្យរួចនៅមុនបុណ្យចូលឆ្នាំខ្មែរយើងឆ្នាំ២០២០។ លោកប្រធានការដ្ឋានស្ពានកៀនជ្រៃបានឳ្យដឹងទៀតថា ជាលទ្ធផលមកដល់ថ្ងៃទី ៣១ ខែមីនា ឆ្នាំ២០២០ ដែលលោក អ៊ុន ចាន់ដា អភិបាលខេត្តកំពង់ចាមបានដឹកនាំមន្រ្តីចុះពិនិត្យសំណង់ស្ពានកៀនជ្រៃនេះ គឺយើងសម្រេចបានការងារចំនួន ៩៥ ភាគរយហើយ។ ដោយនៅសល់ការងារចំនួន ប្រាំភាគរយទៀត គឺការងារសម្អាតជើងខាងក្រោមរបស់ស្ពាន។ លោកបានបន្តថា ការងារចំនួន ប្រាំ ភាគរយទៀតនេះ គឺនឹងហើយរួចរាល់ក្នុងរង្វង់សប្តាហ៍នេះបន្ទាប់មកខាងលោក នឹងឆ្លងយោបល់ទៅខាងថ្នាក់លើ ដើម្បីកំណត់កាលបរិច្ឆេទច្បាស់លាស់ បើកឳ្យអ្នកដំណើរឆ្លងកាត់ស្ពានបេតុងថ្មីរបស់ឃុំកៀនជ្រៃ ស្រុកកំពង់សៀមនេះ។ សូមបញ្ជាក់ថា នៅព្រឹកថ្ងៃទី ៣១ ខែមីនា ឆ្នាំ២០២០ លោក អ៊ុន ចាន់ដា អភិបាលខេត្តកំពង់ចាម និងលោក ខ្លូត ផន ជាប្រធានក្រុមប្រឹក្សាខេត្តនេះ អមដំណើរដោយមន្រ្តីរដ្ឋបាលជាច្រើនរូបចុះពិនិត្យការសាងសង់ស្ពានកៀនជ្រៃ ស្រុកកំពង់សៀម។ ស្ពានកៀនជ្រៃ ដែលបានស្ថាបនាសាងសង់ដោយខាងវិស្វកម្មក្រសួងការពារជាតិ អនុវត្តន៍គម្រោងដោយក្រសួងអភិវឌ្ឍន៍ជនបទ និងជាថវិកាជំនួយរបស់រាជរដ្ឋាភិបាល គឺមានទំហំទទឹង ១០ ម៉ែត្រនិងបណ្តោយ ៩០ ម៉ែត្រ។ ដោយចាប់ផ្តើមដំណើរការសាងសង់នៅពាក់កណ្តាលខែវិច្ឆិកា ឆ្នាំ២០១៩ គឺតាមគម្រោងនឹងបញ្ចប់ការសាងសង់នៅក្នុងចន្លោះខែឧសភា ឆ្នាំ២០២០។ ស្ពាននេះដំបូងក៏ជាស្ពានបេតុងដែរ ប៉ុន្តែមានលក្ខណ:តូចចង្អៀត គឺរថយន្តមិនអាចធ្វើចរាចរជៀសគ្នាបានទេ ហើយចៃដន្យគ្រោះធម្មជាតិ គឺទឹកជំនន់ទន្លេមេគង្គឆ្នាំ២០១៩ បានវាយប្រហារច្រាំងព្រែកកៀនជ្រៃនេះ បណ្តាលឳ្យប៉ះពាល់ដល់គ្រឹះសសរស្ពានបាក់ស្រុតពុះអាចធ្វើដំណើរឆ្លងកាត់បាន។ ដោយពិនិត្យឃើញស្ថានភាពលំបាកធ្វើដំណើររបស់ប្រជាពលរដ្ឋតាមផ្លូវវាងឆ្ងាយ គឺលោក អ៊ុន ចាន់ដា អភិបាលខេត្តកំពង់ចាមបានស្នើសុំអន្តរាគមន៍ទៅសម្តេចតេជោ នាយករដ្ឋមន្រ្តី ក៏បានសម្រេចទម្លាក់កញ្ចប់ថវិកាឳ្យស្ថាបនាស្ពានកៀនជ្រៃថ្មីមួយនេះឡើង៕