ថ្ងៃអង្គារ ១០កើត ខែផល្គុន ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី០៣ ខែមីនា ឆ្នាំ២០២០ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីសំណេះសំណាលអបអរសាទរខួបលើកទី១០៩ ទិវានារីអន្តរជាតិ៨មីនា ឆ្នាំ២០២០ ក្រោមប្រធានបទ៖ “មានសន្តិភាព មានការលើកកម្ពស់សមភាពយេនឌ័រ” ។ ពិធីនេះបានប្រព្រឹត្តទៅនៅទីស្តីការក្រសួងសាធារណការ និងដឹកជញ្ជូន ដោយមានការអញ្ជើញចូលរួម ពីមន្ត្រីជាន់ខ្ពស់ក្រសួង តំណាងសមាគមស្ត្រីកម្ពុជា តំណាង ក្រសួងកិច្ចការនារី និងស្ត្រីទាំងអស់ ដែលជាមន្ត្រីរាជការក្រសួងសាធារណការ និងដឹកជញ្ជូន។ សុខសន្តិភាពក្រោមការដឹកនាំដ៏ឈ្លាសវៃរបស់ប្រមុខរាជរដ្ឋាភិបាល ដែលមានសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តីនៃព្រះរាជាណាចក្រកម្ពុជា បានដាក់ចេញនយោបាយឈ្នះឈ្នះឱ្យខ្មែរួបរួមគ្នាតែមួយ ដែលធ្វើឲ្យប្រជាជនយើងទូទាំងប្រទេសមិនភ្លេចពាក្យថា“អរគុណសន្តិភាព” មានសន្តិភាពមានអ្វីៗទាំងអស់។ ឯកឧត្តមទេសរដ្ឋមន្ត្រី បានសង្កត់ធ្ងន់អំពីតួនាទីដ៏មានសារៈសំខាន់របស់ស្ត្រី ក្នុងការកសាង និងអភិវឌ្ឍប្រទេសជាតិ និងបានជំរុញលើកទឹកចិត្ត ស្ត្រី ឱ្យបន្តអភិវឌ្ឍខ្លួនតាមរយៈការអប់រំ និងទទួលយកតួនាទីជាអ្នកដឹកនាំកាន់តែច្រើនថែមទៀតនៅក្នុងវិស័យសាធារណៈ និងវិស័យឯកជន។ ឯកឧត្តមទេសរដ្ឋមន្ត្រី បានថ្លែងការកោតសរសើរ និងអំណរគុណយ៉ាងជ្រាលជ្រៅដល់មន្ត្រីរាជការដែលជាស្ត្រីនៅក្រសួងសាធារណការ និងដឹកជញ្ជូនក៏ដូចជានៅអង្គភាពកំពង់ផែស្វយ័តភ្នំពេញ កំពង់ផែស្វ័យយ័តក្រុងព្រះសីហនុ មន្ទីរពិសោធន៍ និងអង្គភាពក្រោមឱវាទក្រសួងទាំងអស់ ដែលបានខិតខំប្រឹងប្រែងបំពេញការងារ និងរួមចំណែកដល់ការសម្រេចបានជោគជ័យទាំងឡាយរបស់ក្រសួង៕