ថ្ងៃព្រហស្បតិ៍ ១២រោច ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២០ ខែកុម្ភៈ ឆ្នាំ២០២០ នៅទីស្ដីការក្រសួង លោក ហឿន សំនៀង អគ្គនាយករងនៃអគ្គនាយកដ្ឋានរដ្ឋបាល និងហិរញ្ញវត្ថុ តំណាងឯកឧត្ដមអគ្គនាយក បានអញ្ជើញជាអធិបតីក្នុងពិធីផ្សព្វផ្សាយការដាក់ពាក្យប្រលងអាហារូបករណ៍សិក្សាថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត នៅប្រទេសអូស្ត្រាលី ដែលដឹកនាំដោយលោក John Walsh ប្រធានក្រុមការងារផ្សព្វផ្សាយអាហារូបករណ៍ ដោយមានការចូលរួមពីមន្ត្រីរាជការវ័យក្មេងជាច្រើននាក់។ ថ្លែងក្នុងពិធីនោះ លោកអគ្គនាយករងបានមានប្រសាសន៍ថា នេះគឺជាឱកាសមាសសម្រាប់បងប្អូនជាមន្រ្តីរាជការនៃក្រសួងសាធារណការ និងដឹកជញ្ជូន ក្នុងការអភិវឌ្ឍ និងលើកកម្ពស់សមត្ថភាពរបស់ខ្លួនក្នុងសម័យបដិវត្តន៍ឧស្សាហកម្ម ៤.០ ដើម្បីអភិវឌ្ឍប្រទេសជាតិឱ្យសម្បូររុងរឿង។ លោកអគ្គនាយករងបានបន្តថា យើងត្រូវចាប់ឱកាសឱ្យបាន បើយើងចង់កំណត់វាសនារបស់ខ្លួនឱ្យមានភាពថ្កុំថ្កើង ទាំងសម្រាប់ខ្លួនឯង គ្រួសារ និងប្រទេសជាតិ។ លោកអគ្គនាយករងបានថ្លែងអំណរគុណ យ៉ាងជ្រាលជ្រៅដល់ក្រុមការងារផ្សព្វផ្សាយអាហារូបករណ៍ ដែលបានចំណាយទាំងពេលវេលា និងកម្លាំងកាយក្នុងការផ្សព្វផ្សាយអាហារូបករណ៍នេះដល់មន្ត្រីរាជការ នៃក្រសួងសាធារណការ និងដឹកជញ្ជូន និងបានជំរុញលើកទឹកចិត្តឱ្យមន្ត្រីទាំងអស់ចូលរួមដាក់ពាក្យប្រលងទាំងអស់គ្នា ដោយសិក្សាឱ្យបានច្បាស់លាស់អំពីនីតិវិធីក្នុងការដាក់ពាក្យ ព្រមទាំងសាកសួរព័ត៌មានទៅកាន់ក្រុមការងារផ្សព្វផ្សាយនូវរាល់ចម្ងល់ ដើម្បីកុំឱ្យមានការឆកល្វែងដោយប្រការណាមួយ៕