ឯកឧត្តមទេសរដ្ឋមន្ត្រី ស៊ុន ចាន់ថុល បាននាំយកថវិកាផ្ទាល់ខ្លួនចំនួន ១០.០០០ ដុល្លារសហរដ្ឋអាមេរិកចូលរួមក្នុងយុទ្ធនាការជួយសង្គ្រោះជនរងគ្រោះដែលបណ្ដាលមកពីការបាក់រលំអគារនៅខេត្តកែប --- ថ្ងៃសៅរ៍ ១០កើត ខែបុស្ស ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០៤ ខែមករា ឆ្នាំ២០២០ ឯកឧត្តម ស៊ុន ចាន់ថុល ទេសរដ្ឋមន្ត្រីរដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញអមដំណើរសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាក្នុងយុទ្ធនាការជួយសង្គ្រោះជនរងគ្រោះបណ្ដាលមកពីការបាក់រលំអគារនៅខេត្តកែប។ ឯកឧត្តមទេសរដ្ឋមន្ត្រី បានបរិច្ចាគថវិកាផ្ទាល់ខ្លួនចំនួន១០.០០០ដុល្លារសហរដ្ឋអាមេរិកក្នុងយុទ្ធនាការនេះ និងបាននាំយកគ្រឿងឧបភោគបរិភោគរួមមានដូចជា ចេក នំ ចំណី និងទឹកបរិសុទ្ធជាដើម ទៅចែកជូនដល់ក្រុមការងារជួយសង្គ្រោះផងដែរ។ ឆ្លៀតក្នុងឱកាសនោះ ឯកឧត្តមទេសរដ្ឋមន្ត្រី បានអញ្ជើញចុះសួរសុខទុក្ខ និងនាំយកថវិកាមួយចំនួនទៅចែកជូនជនរងគ្រោះដែលកំពុងសម្រាកព្យាបាលនៅមន្ទីរពេទ្យមួយចំនួននៅខេត្តកែបផងដែរ។ សូមជម្រាបជូនថាកាលពី ថ្ងៃសុក្រ ០៩កើត ខែបុស្ស ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០៣ ខែមករា ឆ្នាំ២០២០ មាន ករណី រលំ បាក់ស្រុត អគារ ដែល សាងសង់ មិនទាន់ រួចរាល់ កម្ពស់ ៧ ជាន់ ដែលមានទីតាំងឋិតនៅជិតវត្តសមាធិ ក្រុងកែប ខេត្ត កែប បណ្តាល ឲ្យ សង្កត់កម្មករជាច្រើននាក់៕