ថ្ងៃសុក្រ ៧រោច ខែភទ្របទ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២០ ខែកញ្ញា ឆ្នាំ២០១៩ ឯកឧត្ដម ស៊ុយ សាន រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញចូលរួមគោរពវិញ្ញាណក្ខន្ធសព ឯកឧត្ដម នាយឧត្ដមសេនីយ៍ ប៊ូ ថង សមាជិកព្រឹទ្ធសភា នៅគេហដ្ឋានសពនាខេត្តរតនគិរី។ សូមបញ្ជក់ថា៖ ឯកឧត្ដម នាយឧត្ដមសេនីយ៍ ប៊ូ ថង បានទទួលមរណភាពកាលពីថ្ងៃព្រហស្បតិ៍ ១៤កើត ខែភទ្របទ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១២ ខែកញ្ញា ឆ្នាំ២០១៩ វេលាម៉ោង១:២០នាទីរំលងអធ្រាត្រ ក្នុងជន្មាយុ៨២ឆ្នាំ ដោយរោគាពាធ។ មរណភាពរបស់ឯកឧត្ដម នាយឧត្ដមសេនីយ៍ ប៊ូ ថង មិនត្រឹមតែជាការបាត់បង់ស្វាមី ឪពុក ឪពុកក្មេក និងជីតាជាទីគោរពស្រឡាញ់ដ៏ជ្រាលជ្រៅប៉ុណ្ណោះទេ តែវាគឺជាការបាត់បង់នូវឥស្សរជនជាន់ខ្ពស់មួយរូប ដែលបានខិតខំតស៊ូគ្រប់កាលៈទេសៈក្នុងការរំដោះប្រទេសជាតិឱ្យចេញផុតពីរបបប្រល័យពូជសាសន៍ខ្មែរក្រហម និងបន្តចូលរួមអភិវឌ្ឍប្រទេសជាមួយស្ថាប័ននីតិប្បញ្ញត្តិ និងរាជរដ្ឋាភិបាល ក្នុងទិសដៅបម្រើឧត្ដមប្រយោជន៍ជាតិមាតុភូមិ។ ទោះបីវិញ្ញាណក្ខន្ធរបស់ឯកឧត្ដម នាយឧត្ដមសេនីយ៍ បានលាចាកឆ្ងាយពីរូបកាយទៅកាន់បរលោកក៏ពិតមែន ប៉ុន្តែឯកឧត្ដមបានបន្សល់ទុកនូវស្នាដៃគំរូដ៏ឆ្នើមជាច្រើន ដែលស្ថិតស្ថេរគង់វង្សជាអមតៈ និងដិតជាប់ជានិច្ចក្នុងក្រអៅបេះដូងរបស់យើងខ្ញុំជាថ្នាក់ដឹកនាំ មន្ត្រីរាជការ បុគ្គលិក និងកម្មករទាំងអស់ របស់ក្រសួងសាធារណការ និងដឹកជញ្ជូន។ ឯកឧត្តមរដ្ឋលេខាធិការ ព្រមទាំងគណៈប្រតិភូ បានសម្តែងនូវការចូលរួមរំលែកទុក្ខយ៉ាងក្រៀមក្រំជាទីបំផុត ជាមួយលោកជំទាវ ព្រមទាំងក្រុមគ្រួសារញាតិមិត្តទាំងអស់នៃសព និងសូមឧទ្ទិសបួងសួងដល់ដួងវិញ្ញាណក្ខន្ធរបស់ឯកឧត្ដម នាយឧត្ដមសេនីយ៍ ប៊ូ ថង សូមបានសោយសុខក្នុងសុគតិភពកុំបីឃ្លៀងឃ្លាតឡើយ ៕