[Thmey Thmey] - ផ្លាកលេខរថយន្តដែលអាចដាក់ជាឈ្មោះ នឹងត្រូវបើកឲ្យប្រើប្រាស់ក្នុងពេលឆាប់ខាងមុខនេះ
2019-09-02
ទៅកាន់ទំព័រចុះផ្សាយក្នុង Thmey Thmey
ភ្នំពេញ៖ កាលពីខែមិថុនា រដ្ឋាភិបាលបានចេញអនុក្រឹត្យមួយ ដែលក្នុងនោះមានការអនុញ្ញាតឲ្យមាន«លេខចុះបញ្ជីពិសេសផ្ទាល់ខ្លួន»សម្រាប់ម្ចាស់យានយន្ត។ ហើយនៅថ្ងៃទី២ខែកញ្ញានេះ ក្រសួងសាធារណការ និងដឹកជញ្ជូន ជូនដំណឹងថា ដំណើរការលក់លេខចុះបញ្ជីពិសេសផ្ទាល់ខ្លួននេះ នឹងចាប់ផ្ដើមយ៉ាងយូរក្នុងរយៈពេល៣ខែទៀត។
ការប្រើ«លេខចុះបញ្ជីពិសេសផ្ទាល់ខ្លួន»នេះ គឺអនុញ្ញាតឲ្យគេជ្រើសរើសជាលេខ ឬ/និង អក្សរឡាតាំងមិនលើសពី៨ខ្ទង់។ អ្នកនាំពាក្យក្រសួងសាធារណការ និងដឹកជញ្ជូន លោក វ៉ាស៊ឹម សុរិយ៉ា ឲ្យដឹងថា លេខពិសេសផ្ទាល់ខ្លួន សំដៅថា ម្ចាស់យានយន្តអាចដាក់ឈ្មោះខ្លួនឯង ឬ ឈ្មោះនិងលេខ ជាដើម។ ប៉ុន្តែលោកបញ្ជាក់ថា ការប្រើឈ្មោះសម្រាប់ចុះបញ្ជីលេខរថយន្ត គឺត្រូវសម្រេចដោយមន្ត្រីរបស់ក្រសួង ដោយចៀសវាងប៉ះពាល់ឈ្មោះថ្នាក់ដឹកនាំ បុគ្គលល្បី និងអត្តសញ្ញាណជាតិ ជាដើម។
លោក វ៉ាស៊ឹម សុរិយ៉ា អះអាងប្រាប់សារព័ត៌មានថ្មីៗថា ការដែលរដ្ឋាភិបាលបង្កើតឲ្យមានលេខចុះបញ្ជីពិសេសផ្ទាល់ខ្លួននេះ គឺដើម្បីរកចំណូលថវិកាជាតិ និងផ្ដល់ជម្រើសកាន់តែទូលាយដល់ម្ចាស់រថយន្ត។ លោកគូសបញ្ជាក់ដូច្នេះថា៖«វាមានពីរគឺអត្ថប្រយោជន៍ថវិកាជាតិ។ ហើយអ្នកខ្លះចង់រក្សាទុកឈ្មោះណាដែលខ្លួនស្រឡាញ់ ដែលគេគិតថាជាឈ្មោះមានសំណាង ឬសម្គាល់ត្រកូលគ្រួសារ ក្រុមហ៊ុនរបស់គាត់ ជាដើម»។
បើតាមលោក វ៉ាស៊ឹម សុរិយា លេខចុះបញ្ជីពិសេសផ្ទាល់ខ្លួននេះ នឹងក្លាយជាកម្មសិទ្ធិរបស់បុគ្គលនោះ ហើយអាចផ្ទេរបាន។ លោកបន្ថែម ទោះគេប្ដូររថយន្ត ក៏គេអាចយកលេខពិសេសនេះ សម្រាប់ធ្វើផ្លាកលេខរថយន្តថ្មីបានដែរ ដោយគ្រាន់តែសុំទៅក្រសួង។
សេចក្ដីជូនដំណឹងខាងលើនេះ ឲ្យដឹងផងដែរថា ក្រសួងនឹងដាក់ឲ្យដំណើរការប្រព័ន្ធលក់លេខចុះបញ្ជីពិសេសផ្ទាល់ខ្លួន នៅក្នុងអំឡុងពេល៣ខែខាងមុខនេះ ដោយនឹងជូនដំណឹងមុន១ខែ ដើម្បីផ្សព្វផ្សាយឲ្យបានទូលំទូលាយ៕
