បន្ទាប់ពី​រដ្ឋមន្រ្តី​ក្រសួង​សាធារណការ និង​ដឹក​ជញ្ជូន បាន​រកឃើញ​កំហុស​ឆ្គងក្នុង​ការ​សាងសង់​កំណាត់​ផ្លូវ​ជាតិលេខ៧ កាលពីថ្ងៃទី២៤ ខែ​កក្កដា ឆ្នាំ​២០១៩ មន្រ្តី​ពាក់ព័ន្ធនឹង​គម្រោង​នេះ (គម្រោង RAMP II) ចំនួន ៦រូប​ដែល​ទទួល​ខុសត្រូវ​លើការ​សាងសង់​ចាប់ពី​បង្គោល​គីឡូម៉ែត្រ PK136-PK300 ត្រូវបាន​ផ្លាស់ប្តូរ​ក្នុងនោះ​រួមមាន៖ -ប្រធាន​ក្រុមទីប្រឹក្សា​បច្ចេកទេស៖ ១រូប -អនុប្រធាន​ក្រុមទីប្រឹក្សា​បច្ចេកទេស៖ ១រូប -សមាជិក​ក្រុមទីប្រឹក្សា​បច្ចេកទេស៖ ៤រូប។ក្រសួង​សាធារណការ បាន​បញ្ជាក់​ថា ការ​សម្រេច​ផ្លាស់ប្តូរ​សមាសភាព​មន្រ្តីគម្រោង​ខាងលើនេះ គឺ​ដើម្បី​ពង្រឹង​ការងារ​គម្រោង​ឲ្យមាន​ប្រសិទ្ធភាព និង​ប្រសិទ្ធផល​ខ្ពស់។ ក្រសួងសាធារណការ បានឱ្យដឹងថា ផ្លូវជាតិលេខ៧​ មាន​ប្រវែង​សរុប​ចំនួន ៤៦០,៨៣​គីឡូម៉ែត្រ ជា​ប្រភេទ​បេតុង​កៅស៊ូ(AC) ចាប់ពី​ស្គន់ ផ្លូវជាតិ​លេខ៦ (PK ៧៥+០០០) ដល់​ត្រពាំង​គ្រៀល (ព្រំដែន​កម្ពុជា-ឡាវ)។ ក្នុងនោះ​ប្រវែង​ចំនួន ២៧៥,៥៦​គីឡូម៉ែត្រ ត្រូវបាន​ជួសជុល​ធ្វើឱ្យ​ប្រសើរ​ឡើងវិញ​ចាប់ពី​បង្គោល​គីឡូម៉ែត្រ​លេខ១៣៦ ដោយ​ប្រើប្រាស់​ថវិកា​អន្តរជាតិ​សរុប​ចំនួន ៦៩,៨២លានដុល្លារ​អាមេរិក ពោលគឺ៖ -ចាប់ពី​បង្គោល​គីឡូម៉ែត្រ​លេខ​១៣៦ -៣០០ ជា​គម្រោងRAMP II ក្រោម​ហិរញ្ញប្បទាន​ពីធនាគារ​ពិភពលោក​ ក្នុងទឹកប្រាក់​ចំនួន៣៦,៤៥លាន​ដុល្លារ​អាមេរិក -និង​ចាប់ពី​បង្គោល​គីឡូម៉ែត្រ​លេខ​៣៣២,១២៥ -៤២៤,៦៩០ ជា​ជំនួយ​ឥតសំណង​របស់រដ្ឋាភិបាលចិន​ក្នុងទឹកប្រាក់​ចំនួន ៣៣,៣៧​លានដុល្លារ​អាមេរិក។ គិតត្រឹម​ថ្ងៃទី១៨ ខែ​កក្កដា ឆ្នាំ​២០១៩ គម្រោង​ផ្លូវជាតិលេខ៧ បង្គោល​គីឡូម៉ែត្រ PK136 - PK300 នេះ​ សម្រេចបាន​លទ្ធផល ដូចខាងក្រោម៖ -PK136 - PK186 អ៊ុកៅស៊ូ AC បាន ១០០% -PK186 - PK243 អ៊ុកៅស៊ូ AC បាន ១០០% -PK243 - PK300 អ៊ុកៅស៊ូ AC បាន ៧២% ក្រសួង​បានរកឃើញ​ថា មាន​ចំណុចមួយ​ចំនួន នៅមាន​ការខ្វះខាត ដែល​តម្រូវឲ្យ​ក្រុមហ៊ុន ដោះស្រាយ​ជាបន្ទាន់ ទើបក្រសួង​អាចទទួល​យកបាន។ ​ក្នុង​ដំណើរចុះពិនិត្យ​មើលស្ថានភាព​គុណភាព​ផ្លូវនេះ លោក​ទេសរដ្ឋមន្ត្រី បាន​អញ្ជើញ​ជិះកង់​នៅខេត្ត​ត្បូងឃ្មុំ ស្ថិតនៅ​បង្គោល​គីឡូម៉ែត្រ​លេខ​១៧៦ -១៦៦ ក្នុង​ចម្ងាយ​ផ្លូវ ១០​គីឡូម៉ែត្រ តាមបណ្តោយ​ផ្លូវជាតិ​លេខ៧ ដើម្បី​ពិនិត្យ​គុណភាព និង​ស្ថានភាព​ផ្លូវ ស្ថិត​ក្រោម​គម្រោងRAMP II ដែល​កំពុង​ដំណើរការ​ស្ថាបនា​ឡើងវិញ ដោយ​ពង្រីក​ពី ៧ម៉ែត្រទៅ ១១ម៉ែត្រ ក្រាល​បេតុង​កៅស៊ូ ១០​ម៉ែត្រ៕