ភ្នំពេញៈ ក្រោយពីឲ្យដាក់ដំណើរ ការការចុះបញ្ជី តាមប្រព័ន្ធអនឡាញ លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន បានបញ្ជាក់ថា ក្នុងរយៈពេលជាង១ឆ្នាំនេះ មានប្រជាពលរដ្ឋជាច្រើន បានយកយានយន្ដ៥លានគ្រឿង ក្នុងនោះភាគច្រើនគឺម៉ូតូ ទៅចុះបញ្ជីរ តាមប្រព័ន្ធអនឡាញ (ធ្វើផ្លាកលេខ)។ ក្នុងពិធីបើកជាផ្លូវការនូវកម្មវិធី “ប្រព័ន្ធស្វ័យប្រវត្តិកម្មនៃការចុះបញ្ជី និងត្រួតពិនិត្យបច្ចេកទេស យានយន្ត” កាលពីថ្ងៃទី២៤ ខែមិថុនា ឆ្នាំ២០១៩ លោក ស៊ុន ចាន់ថុល បានថ្លែងថា “ជារួម គឺយើងមានយានយន្ដ៥លានគ្រឿង ប៉ុន្ដែក្នុង៥លាននឹងភាគច្រើនគឺ ម៉ូតូ ឡានជិត១លាន ក្រៅពីនឹងសុទ្ធតែម៉ូតូ”។ រដ្ឋមន្ដ្រីសាធារណការ បន្ថែមថា ការចុះបញ្ជីរតាមប្រព័ន្ធអនឡាញនេះ ទើបតែប្រតិបត្តិការជាង១ឆ្នាំ តែប៉ុណ្ណោះ ដូច្នេះការចុះបញ្ជី តាមប្រពន្ធអនឡាញ បានផ្ដល់ភាពងាយ ស្រួលទៅដល់ប្រជាពលរដ្ឋផងដែរ ។ រដ្ឋមន្ដ្រីថា នៅពេលពលរដ្ឋទិញ ផ្លាកលេខណា ទៅចុះបញ្ជីរយកលេខមួយនោះទៅ មិនចាំបាច់ទៅរកអ្នករត់ការដូចមុនឡើយ ខណៈតម្លៃធ្វើផ្លាកលេខមាននៅក្នុងប្រព័ន្ធចុះបញ្ជីនេះដែរ។ ឆ្លៀតឱកាសនោះដែរ លោក អូតា ម៉ាសាយ៉ា ប្រធានទីប្រឹក្សាគម្រោង JICA/MVRI មានប្រសាសន៍ថា “ដោយសារតែវឌ្ឍនភាពនៃការកើនឡើងនូវចំនួនយានយន្ដយ៉ាងឆាប់រហ័ស ប្រទេសកម្ពុជា បានប្រឈមមុខនឹងកត្តាជាច្រើន ដូចជា បញ្ហាគ្រោះថ្នាក់ចរាចរណ៍”។ ទាក់ទងនឹងបញ្ហានេះដែរ ទីប្រឹក្សាគម្រោង JICA/MVRI នឹងធ្វើកិច្ចសហការជាមួយកម្ពុជា ក្នុងការដោះស្រាយនូវបញ្ហានេះ ដោយការប្រើនូវបទពិសោធន៍ល្អៗ និងចំណេះដឹងរបស់ជប៉ុន ។ ដូច្នេះ គម្រោង JICA/MVRI នេះធ្វើឲ្យប្រសើរឡើង នូវប្រព័ន្ធចុះបញ្ជីរ និងត្រួតពិនិត្យ លក្ខណៈបច្ចេកទេសយានជិនិះ និងដោះស្រាយបញ្ហា ដែលទាក់ទងទៅនឹងប្រព័ន្ធព័ត៌មានវិទ្យា ដូចជា ការធ្វើ security diagnosis និងម៉ាស៊ីផ្ទុកទិន្នន័យ។ ចំណែក លោក Sugano Yuichi ប្រធានតំណាងការិយាល័យ JICA នៅកម្ពុជា បានលើកឡើងថា JICA បានចាប់ផ្ដើមគម្រោង MVRI នេះដែលមានឈ្មោះថា (គម្រោងទំនើបកម្មប្រព័ន្ធចុះបញ្ជី និងត្រួតពិនិត្យ លក្ខណៈបច្ចេកទេសយានយន្ដ) ដូច្នេះ គម្រោងនេះ មាន៣ផ្នែកសំខាន់ ដែលធ្វើឲ្យមានភាពប្រសើរឡើងលើការចុះបញ្ជីយានជំនិះ ការត្រួតពិនិត្យលក្ខណៈបច្ចេកទេសយានជំនិះ និងការគាំទ្រផ្នែកព័ត៌មានវិទ្យា៕