រតនគិរី ថ្ងៃទី២៨ ខែឧសភា ឆ្នាំ ២០១៩ -នៅថ្ងៃចន្ទ ៩រោច ខែពិសាខ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៧ ខែឧសភា ឆ្នាំ២០១៩ រដ្ឋបាលខេត្តរតនគិរី បានប្រារព្ធទិវាជាតិសុវត្ថិភាពចរាចរណ៍ផ្លូវគោក លើកទី១២ ដែលពិធីនេះប្រារព្ធធ្វើនៅសាលមហោស្រពសម្តេចតេជោ ហ៊ុន សែន ក្នុងបរិវេណមន្ទីរវប្បធម៌ និងវិចិត្រសិល្ប: ស្ថិតនៅសង្កាត់បឹងកន្សែង ក្រុងបានលុង ក្រោមអធិបតី ឯកឧត្តម ថង សាវុន អភិបាលខេត្ត និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្តរតនគិរី។ ទិវាសប្តាហ៍ជាតិចរាចរណ៍ផ្លូវគោកនេះ មានការចូលរួមពីមន្រ្តីរាជការ កងកម្លាំងប្រដាប់អាវុធទាំង ៣ប្រភេទ លោកគ្រូអ្នកគ្រូ សិស្សានុសិស្ស យុវជនសហភាពសហព័ន្ធយុវជនកម្ពុជា(ស.ស.យ.ក.) យុវជនស្ម័គ្រចិត្តកាកបាទក្រហម យុវជនកាយឫទ្ធិ ប្រមាណជាង ៣០០នាក់ ។ លោក ស៊ុន ប៉ូលីន ប្រធានមន្ទីរសាធារណការ និងដឹកជញ្ជូនខេត្តរតនគិរី និងជាប្រធានលេខាធិការដ្ឋាន អនុគណៈកម្មការសុវត្ថិភាពចរាចរណ៍ផ្លូវគោកខេត្ត បានលើកឡើងពី ស្ថានភាពគ្រោះថ្នាក់ចរាចរណ៍ក្នុងឆ្នាំ២០១៨ កើតឡើងចំនួន ១០៤លើក ក្នុងនោះគ្រោះថ្នាក់ចរាចរណ៍កើតឡើងពេលយប់ ៥៤លើក និងពេលថ្ងៃ ៥០លើក បណ្តាលឱ្យមនុស្សស្លាប់ ៤០នាក់ ស្រី ៥នាក់ របួសធ្ងន់ ៩៨នាក់ ស្រី ២៨នាក់ របួសស្រាល ៥២នាក់ ស្រី ៩នាក់ ខូចខាតម៉ូតូ ១១៨គ្រឿង ខូចខាត រថយន្ត ៥៨គ្រឿង ។ឯកឧត្តម ថង សាវុន បានមានប្រសាសន៍ក្នុងទិវាចរាចរណ៍សប្តាហ៍ថា ស្ថានភាព គ្រោះថ្នាក់ចរាចរណ៍បច្ចុប្បន្នគឺជាបញ្ហាប្រឈមចំពោះមុខ និងយូរអង្វែងដែលបង្កឡើង ដោយសារការបើកបរលើសល្បឿនកំណត់ ការមិនគោរពសិទ្ធិអាទិភាព មិនគោរពសញ្ញាចរាចរណ៍ ការវ៉ាជែងដោយប្រថុយប្រថាន ការបើកបរក្រោមឥទ្ធិពលគ្រឿងស្រវឹង ការមិនពាក់មួកសុវត្ថិភាពពេលធ្វើដំណើរតាមម៉ូតូ និងមិនពាក់ខ្សែក្រវាត់សុវត្ថិភាពពេលធ្វើដំណើរតាមរថយន្ត បានបង្កឱ្យមានគ្រោះថ្នាក់ចរាចរណ៍ដែលមានសភាពធ្ងន់ធ្ងរ បណ្តាលឱ្យរបួស ពិការ ឬបាត់បង់ជីវិតមនុស្ស រួមជាមួយនឹងការខូចខាតទ្រព្យសម្បត្តិរដ្ឋ និងឯកជនយ៉ាងច្រើន បន្សល់ទុកនូវកូនកំព្រា ស្ត្រីមេម៉ាយ ពិការភាព សោកនាដកម្ម និងផលវិបាកជាច្រើននៅក្នុងសង្គមកម្ពុជា៕