(បាត់ដំបង)៖ លោក ជី ស៊ីថា រដ្ឋលេខាធិការតំណាងដ៏ខ្ពង់ខ្ពស់លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី៧ ខែតុលា ឆ្នាំ២០២៥នេះ បានដឹកនាំក្រុមការងារចុះត្រួតពិនិត្យ វាយតម្លៃ លើការងារជួសជុលស្តារឡើងវិញផ្លូវក្រាលល្បាយថ្មភ្នំចំនួន១ខ្សែ ប្រវែង៤ ពាន់ម៉ែត្រ, ទទឹង៨ ម៉ែត្រ, និងសំណង់សិល្បការ្យផ្សេងៗ ស្ថិតនៅភូមិសំឡូត ឃុំសំឡូត ស្រុកសំឡូត ខេត្តបាត់ដំបង។ នាឱកាសនោះ លោក ជី ស៊ីថា បានថ្លែងបញ្ជាក់ថា ការសាងសង់ហេដ្ឋារចនាសម្ព័ន្ធផ្លូវជនបទនេះ គឺជាការវិនិយោគដ៏ចាំបាច់របស់រាជរដ្ឋាភិបាល ដោយបានចំណាយថវិកាយ៉ាងច្រើនសន្ធឹកសន្ធាប់ ជំរុញការអភិវឌ្ឍនៅតាមជនបទ ជាពិសេសការងារស្ថាបនាផ្លូវ ក្រៅពីការធ្វើដំណើរ គឺការជំរុញដំណើរការអន្តរកម្មផ្នែកសេដ្ឋកិច្ច និងសង្គមកិច្ចនៅជនបទ និងកាត់បន្ថយគម្លាតរវាងជនបទ និងទីប្រជុំជនជាដើម។ លោករដ្ឋលេខាធិការ បានបន្តថា ការស្ថាបនាផ្លូវខាងលើនេះ ពិតជាមានសារៈសំខាន់ណាស់សម្រាប់ប្រជាពលរដ្ឋ ក្នុងការដឹកជញ្ជូនសម្ភារៈទៅកាន់ចម្ការ ឬដឹកជញ្ជូនកសិផលមកលំនៅឋាន ក៏ដូចទៅកាន់ទីផ្សារជាដើម ព្រោះនៅក្នុងស្រុក សំឡូត ខេត្តបាត់ដំបងនេះ ប្រជាពលរដ្ឋភាគច្រើនធ្វើចម្ការ និងការលក់ដូរបន្ទាប់បន្សំ។ តាមរយៈការជួសជុលស្តារផ្លូវនេះឡើងវិញគឺជាការចាំបាច់ ដើម្បីឆ្លើយតបទៅនឹងតម្រូវការជាក់ស្តែងនៅមូលដ្ឋានរបស់ពួកគាត់ ដែលនេះគឺជាការចូលរួមចំណែករបស់ រាជរដ្ឋាភិបាលក្នុងលើកកម្ពស់គុណភាព និងគុណតម្លៃនៃការរស់នៅរបស់ប្រជាជននៅតំបន់ជនបទ ប្រកបដោយបរិយាបន្ន ទាំងផ្នែក សេដ្ឋកិច្ច សង្គមកិច្ច និងវប្បធម៌។ ជុំវិញការស្ថាបនាវិញ លោករដ្ឋលេខាធិការ ក៏បានកោតសរសើរ និងបានវាយតម្លៃខ្ពស់ ចំពោះការខិតខំប្រឹងប្រែង របស់ នាយកដ្ឋានវិស្វកម្ម ក្រសួងការពារជាតិ លើការងារជួសជុលស្តារឡើងវិញផ្លូវក្រាលល្បាយថ្មភ្នំនេះប្រកបដោយគុណភាព ព្រោះការ អភិវឌ្ឍផ្លូវជនបទនេះលោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានយកចិត្តទុកដាក់យ៉ាងខ្លាំង ដោយលោកតែងតែចំណាយពេលវេលាដ៏មានតម្លៃ អញ្ជើញចុះពិនិត្យជាប្រចាំលើការងារស្ថាបនា ការស្តារ ការថែទាំ និងការកែលម្អហេដ្ឋារចនា សម្ព័ន្ធផ្សេងៗ ដើម្បីធ្វើយ៉ាងណាជំរុញការស្ថាបនាផ្លូវជនបន ឱ្យមានគុណភាព និងឆ្លើយតបទៅនឹងតម្រូវការរបស់ប្រជាពលរដ្ឋ៕