[Bayon TV] - មន្ត្រីជំនាញថា ថវិកា៥០លានដុល្លារមិនគ្រប់សម្រាប់សាងសង់ផ្លូវល្បឿនលឿនពីភ្នំពេញទៅកាន់ខេត្តកំពតនោះទេ
2018-10-02
ទៅកាន់ទំព័រចុះផ្សាយក្នុង Bayon TV
ភ្នំពេញ ៖ មន្ត្រីជំនាញក្រសួងសាធារណៈការ និងដឹកជញ្ជូន បានថ្លែងថា គំរោងសាងសង់ខ្សែរថភ្លើងល្បឿនលឿនពីភ្នំពេញ ទៅកាន់ខេត្តកំពត តម្លៃ៥០លានដុល្លារ របស់អភិបាលខេត្តកំពត មិនអាចទៅរួចឡើយ។
លោក វ៉ាស៊ីម សូរិយា អ្នកនាំពាក្យក្រសួងសាធារណៈការ និងដឹកជញ្ជូនបានថ្លែងឲ្យដឹងតាមទូរស័ព្ទនាព្រឹកថ្ងៃទី១ តុលានេះថា គំរោងនេះ មិនអាចទៅរួចឡើយ ព្រោះផ្លូវរថភ្លើងធម្មតាមួយគីឡូម៉ែត្រត្រូវចំណាយ៥លានដុល្លារ តែផ្លូវរថភ្លើងល្បឿនលឿនចំណាយរហូតដល់៧លានដុល្លារក្នុងមួយគីឡូម៉ែត្រ នេះមិនទាន់គិតពីតម្លៃនៃទូររថភ្លើងនៅឡើយទេ។
លោក បន្តថា “តាមអ្វីដែលលោកដឹងគឺថ្នាក់ខេត្ត មិនមានសមត្ថកិច្ចសម្រេចកិច្ចការដ៏ធំបែបនេះទេ”។កាលពីសប្តាហ៍មុនក្នុងកិច្ចប្រជុំជាមួយមន្ត្រីពាក់ព័ន្ធក្នុងខេត្ត ឯកឧត្តម ជាវ តាយ អភិបាលខេត្តកំពតបានលើកឡើងថា អាជ្ញាធរខេត្តគ្រោងវិនិយោគទឹកប្រាក់៥០លានដុល្លារ ដើម្បីសាងសង់រថភ្លើងល្បឿនលឿនពីរាជធានីភ្នំពេញ ទៅកាន់ខេត្តកំពត និងព្រលានយន្តហោះផងដែរ។ ឯកឧត្តម បានមានប្រសាសន៍ថា រថភ្លើងល្បឿនលឿននេះ អាចធ្វើឲ្យការធ្វើដំណើរពីភ្នំពេញ ទៅកាន់ខេត្តកំពតចំណាយពេល១ម៉ោងប៉ុណ្ណោះ។
ឯកឧត្តម បន្តថា គំរោងនេះ អាចអនុញ្ញាតឲ្យសាធារណៈជនវិនិយោគ ក្នុងមួយហ៊ុន៥ម៉ឺនដុល្លារ ដោយលោកគ្រោងបង្កើតមូលនិធិនេះ ដែលមានចំនួន១០០០ហ៊ុន ហើយលោកបានសម្រេចបោះទុន នាំមុខចំនួន៥លានដុល្លារអាមេរិក។ លោក អភិបាលខេត្ត បានអះអាងថា លោកនឹងពិភាក្សាបញ្ហានេះ ជាមួយលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការនិងដឹកជញ្ជូន។
ផ្លូវជាតិលេខ៣ពីរាជធានីភ្នំពេញ ទៅកាន់ខេត្តកំពត មានប្រវែង១៤៨គីឡូម៉ែត្រ ហេតុនេះបើសាងសង់ផ្លូវរថភ្លើងល្បឿនលឿន ដែលចំណាយទឹកប្រាក់៧លានដុល្លារក្នុងមួយគីឡូម៉ែត្រ ត្រូវចំណាយរហូតដល់១០៣៦ លានដុល្លារអាមេរិក។ នេះមិនទាន់គិតបញ្ចូលថ្លៃទូរថភ្លើងទំនើបនៅឡើយទេ។
ហេតុនេះគម្រោងនេះ វាគ្រាន់តែជាការស្រមើស្រមៃ របស់អភិបាលខេត្តរូបនេះប៉ុណ្ណោះ។
លោក វ៉ាស៊ីម សូរិយា បានថ្លែងថា គម្រោងដ៏ធំបែបនេះ ត្រូវការអនុម័តពីរដ្ឋាភិបាល មិនអាចខេត្តធ្វើបានឡើយ ហើយគំរោងបែបនេះត្រូវការរយៈពេលវែងតទៅទៀត៕
