សៀមរាបៈ ឆ្លើយតបតាមសំណូមពរ ពីបញ្ហាកង្វះផ្លូវថ្នល់ ក្រុមការងាររាជរដ្ឋាភិបាលចុះជួយស្រុកបន្ទាយស្រី បានរួមសហការគ្នា ក្នុងការស្ថាបនា ផ្លូវប្រភេទដីស មួយខ្សែ ប្រវែង ៤.៥០០ ម៉ែត្រ ក្នុងរង្វង់ថវិកាសរុបចំនួន ១៦.០០០ ដុល្លាសហរដ្ឋអាមេរិក។ ក្នុងឱកាសប្រារព្ធពិធីបើកការដ្ឋាន នៅព្រឹកថ្ងៃទី១ ខែមិថុនា ឆ្នាំ២០២៣ នៅភូមិទួលក្រឡាញ់ ឃុំខ្នារសណ្តាយ ស្រុកបន្ទាយស្រី ខេត្តសៀមរាប ស្ថាបនាផ្លូវមួយខ្សែ ទទឹង ៧ ម៉ែត្រ ប្រវែង ៤.៥០០ ម៉ែត្រ តភ្ជាប់ពីភូមិទួលក្រឡាញ់ ទៅភូមិអូរម្នាស់ ក្នុងឃុំខ្នារសណ្តាយ គ្រោងចំណាយថវិកាជិត ២ ម៉ឺនដុល្លាអាមេរិក ដែលជាអំណោយដ៏ថ្លៃថ្លា របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា លោក សែម សុវណ្ណនី ប្រធានក្រុមការងាររាជរដ្ឋាភិបាលចុះ មូលដ្ឋានស្រុកបន្ទាយស្រី បានពាំនាំប្រសាសន៍ផ្តាំផ្ញើ សាកសួរសុខទុក្ខពីសំណាក់ សម្តេចតេជោ ហ៊ុន សែន នាយករដ្ឋមន្ត្រី សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ជូនដល់ប្រជាពលរដ្ឋ ប្រមាណជាង ៨០០ នាក់ ដែលបានមកចូលរួម ក្នុងពិធីបើកការដ្ឋានស្ថាបនាផ្លូវផងដែរ។ លោក សែម សុវណ្ណនី បានមានប្រសាសន៍ថាៈ ផ្លូវមួយខ្សែ ដែលចាប់ផ្តើមស្ថាបនា នៅថ្ងៃនេះ នឹងជួយសម្រួល ដល់ប្រជាពលរដ្ឋ ក្នុងមូលដ្ឋាន មានការងាយស្រួល សម្រាប់ការធ្វើដំណើរ និងដឹកកសិផល ទៅកាន់ទីផ្សារ បានឆាប់រហ័ស និងទាន់ពេលវេលា បើធៀបទៅនឹងពេលមុន ផ្លូវមួយខ្សែនេះ មានទំហំតូច ពិបាកក្នុងធ្វើដំណើរ។ លោក សែម សុវណ្ណនី បានបញ្ជាក់បន្ថែមថាៈ ចំពោះផ្លូវ ១ខ្សែនេះ ក្រោយពីស្ថាបនារួច នឹងបំពាក់អំពូលសឡា ដើម្បីបំភ្លឺនៅតាមដងផ្លូវផងដែរ។ ក្នុងពិធីបើកការដ្ឋាននេះ ក្រុមការងារ ក៏បាននាំមកនូវអំណោយ​ចែកជូនប្រជាពលរដ្ឋ ចូលរួមកម្មវិធី ក្នុងម្នាក់ៗ ទទួលបានសារុងមួយ និងថវិកាមួយម៉ឺនរៀល។ ជាមួយគ្នានេះ លោក សែម សុវណ្ណនី ក៏បានចំណាយថវិកាជួយស្ថាបនារបង និងខ្លោងទ្វារសាលាបឋមសិក្សា ករុណាផងដែរ៕