កាលពីពេលថ្មីៗកន្លងទៅនេះ រាជរដ្ឋាភិបាលបានសម្រេចឲ្យអនុវត្ដគម្រោងជីកផ្លូវទឹកថ្មីតភ្ជាប់ពីទន្លេទៅសមុទ្រ ឬ “គម្រោងព្រែកជីកហ្វូណនតេជោ” ដោយគម្រោងនេះគឺជាគម្រោងធំប្រចាំប្រវត្ដិសាស្រ្ដផងដែរ ដែលគ្រោងចំណាយថវិកាសាងសង់ជិត ២ ពាន់លានដុល្លារ។ បើតាមការសិក្សាដែលបញ្ជាក់ពីរាជរដ្ឋាភិបាល គម្រោងផ្លូវទឹកនេះមានប្រវែង ១៨០ គីឡូម៉ែត្រ ចាប់ផ្ដើមពីព្រែកតាកែវទន្លេមេគង្គ ឆ្លងកាត់តាមព្រែកតាឯក រួចចូលតាមព្រែកតាហ៊ីងនៃទន្លេបាសាក់ ស្រុកកោះធំ និងបន្ដរហូតដល់សមុទ្រខេត្ដកំពត ដោយឆ្លងកាត់ខេត្ដចំនួន ៤ រួមមានខេត្ដកណ្ដាល តាកែវ កំពត និងខេត្ដកែប។ ប៉ុន្ដែក្រៅពីការជីកផ្លូវទឹក គម្រោងនេះក៏នឹងមានការសាងសង់ផ្លូវថ្នល់អមសងខាងប្រវែង ២០៨ គីឡូម៉ែត្រផងដែរ។ តាមការប៉ានស្មានការសាងសង់គម្រោងផ្លូវទឹកថ្មីនេះ នឹងត្រូវចំណាយថវិកាប្រមាណ ១៧០០ លានដុល្លារ និងចំណាយពេលវេលាសាងសង់ប្រមាណ ៤​ ឆ្នាំ។ អ្វីដែលពិសេសនៅពេលគម្រោងនេះដាក់ដំណើរការ វានឹងជួយកាត់បន្ថយរយៈពេល និងចម្ងាយនៃការដឹកជញ្ជូនទំនិញនាពេលបច្ចុប្បន្ន ដែលត្រូវឆ្លងកាត់តាមកំពង់ផែកៃមែបរបស់វៀតណាមប្រមាណ ៦៩គីឡូម៉ែត្រ ពីកំពង់ផែស្វយ័តក្រុងភ្នំពេញ ទៅកំពង់ផែក្រុងព្រះសីហនុ និងប្រមាណ ១៣៥គីឡូម៉ែត្រ ពីកំពង់ផែស្វយ័តក្រុងភ្នំពេញ ទៅកំពង់ផែខេត្តកំពត។ ហើយកត្ដានេះក៏នឹងផ្ដល់ផលចំណេញលើតម្លៃដឹកជញ្ជូនប្រមាណ ១៧០លានដុល្លារអាមេរិក សម្រាប់ទំនិញប្រភេទកុងតឺន័រ ២០ហ្វីត ស្មើនឹង (១TEUs) និងចំណេញប្រមាណ ២២៣លានដុល្លារអាមេរិក សម្រាប់ទំនិញប្រភេទកុងតឺន័រ ៤០ហ្វីត (២TEUs) ផងដែរ៕