កំពង់ចាម៖ លោកបណ្ឌិត ហ៊ុន ម៉ាណែត បានមានប្រសាសន៍ថា៖ រាជរដ្ឋាភិបាល ដែលសម្តេចតេជោ ជានាយករដ្ឋមន្រ្តី គ្រោងនឹងបង្កើតតំបន់សេដ្ឋកិច្ច ពិសេស ឈ្មោះ «ជាំងស៊ូ» នៅផ្លូវជាតិលេខ៦ ស្ថិតក្នុងស្រុកជើងព្រៃ គឺគម្រោងនេះនឹងអាចស្រូបកម្លាំងពលកម្ម ប្រមាណ ប្រាំម៉ឺន នាក់ នាពេលខាងមុខនេះ។ លោកបណ្ឌិត ដែលជាតំណាងដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធ ប៊ុន រ៉ានី ហ៊ុន សែនបានមានប្រសាសន៍ លើកឡើងយ៉ាង ដូច្នេះ នៅក្នុងឱ្យកាសដែលលោក បានអញ្ជើញចូលរួមជាអធិបតី ក្នុងពិធីបញ្ចុះខណ្ឌ សីមាពុទ្ធាភិសេក និងសម្ពោធដាក់ឱ្យប្រើប្រាស់ នូវសមិទ្ធផលនានា ក្នុងវត្តសែន មនោរម្យ ហៅវត្តចាស់ ក្នុងស្រុកកងមាស និងនៅចំពោះមុខប្រជាពលរដ្ឋចូលរួម ប្រមាណជាង ៦.០០០ នាក់ កាលពីថ្ងៃទី ២២ ឧសភា ម្សិលមិញ។ លោកបណ្ឌិត បានមានប្រសាសន៍ថាៈ បច្ចុប្បន្ន គម្រោងពង្រីកផ្លូវជាតិលេខ៧ បាន និងកំពុងដំណើរការ ប៉ុន្តែនៅពេលខាងមុខរាជរដ្ឋាភិបាល គ្រោងនឹងបង្កើតតំបន់ សេដ្ឋកិច្ចពិសេស «ជាំងស៊ូ» នៅផ្លូវជាតិលេខ៦ ក្នុងស្រុកជើងព្រៃ ក៏នឹងបង្កើតនូវឱកាសឧស្សាហកម្មរោងចក្រ សហគ្រាសផ្សេងៗ។ លោកបានបន្តថាៈ ក្នុងនោះ នឹងបង្កើតជារោងចក្រកាត់ដេរ ដែលមានគុណភាពកម្រិត ខ្ពស់ រោងចក្រដំឡើងរថយន្ត រោងចក្រផលិតអគ្គិសនី រោងចក្រផ្សេងៗ ជាច្រើនទៀត… ដែលអាចស្រូបយកកម្លាំងពលកម្ម ប្រមាណ ៥០.០០០ នាក់ ជាពិសេសស្រូបយក អ្នកខេត្តកំពង់ចាមនេះ ច្រើនជាងគេ៕