ផ្លូវល្បឿនលឿនខ្សែទី២របស់កម្ពុជា បន្ទាប់ពីផ្លូវល្បឿនលឿន ភ្នំពេញ-ព្រះសីហនុ គឺផ្លូវល្បឿនលឿនភ្នំពេញ-ក្រុងបាវិត នឹងបើកការដ្ឋានសាងសង់នៅថ្ងៃទី០៧ខែមិថុនាខាងមុខ បន្ទាប់ពីគម្រោងខាងលើត្រូវបានចុះកិច្ចសន្យា ភាពជាដៃគូ រវាងរដ្ឋ និងក្រុមហ៊ុនឯកជនចិនរួចរាល់ហើយ នាព្រឹកថ្ងៃទី១៨ ខែឧសភា ឆ្នាំ២០២៣នេះ...។ កិច្ចសន្យាភាពជាដៃគូវាងរដ្ឋ និងឯកជនហៅកាត់ថា PPP ខាងលើត្រូវបានចែកចេញជាពីរផ្នែកសំខាន់ៗ រួមមាន៖ កិច្ចសន្យា PPP ដែលចែងអំពីគោលការណ៍រួមសំខាន់ៗសម្រាប់អនុវត្តការសាងសង់ និងដាក់ឱ្យប្រតិបត្តិការផ្លូវល្បឿនលឿនភ្នំពេញ-ក្រុងបាវិត និងទី២គឺឯកសារឧបសម្ព័ន្ធពាក់ព័ន្ធដែលមានចែងលម្អិត អំពីការអនុវត្តគោលការណ៍ ដែលបានឯកភាពគ្នាជាគោលការណ៍នៅក្នុងកិច្ចសន្យា។ ផ្លូវល្បឿនលឿនភ្នំពេញ-ក្រុងបាវិត ដែលនឹងចំណាយអស់ទឹកប្រាក់ប្រមាណ១,៣៥ពាន់លានដុល្លារអាម៉េរិកនេះ នឹងត្រូវសាងសង់ឡើងដោយក្រុមហ៊ុនឯកជនរបស់ចិន មានឈ្មោះថាក្រុមហ៊ុនសាជីវកម្មថ្នល់ និងស្ពានចិន CRBC។ ផ្លូវល្បឿនលឿនទីពីររបស់កម្ពុជានេះ មានប្រវែង១៣៥,១០ គីឡូម៉ែត្រ មានគន្លងបើកបរចំនួន៤ ដោយឆ្លងកាត់ខេត្តចំនួន៣ រួមមាន៖ ​ខេត្តកណ្តាល ខេត្តព្រៃវែង និងខេត្តស្វាយរៀង ហើយផ្លូវទាំងមូលត្រូវការពេល៤ឆ្នាំ ដើម្បីបញ្ចប់ការសាងសង់។ គួរកត់សម្គាល់ថា ផ្លូវល្បឿនលឿនភ្នំពេញ-បាវិត ក៏ស្ថិតក្រោមទម្រង់វិនិយោគសាងសង់-ប្រតិបត្តិការ-ផ្ទេរ ហៅកាត់ថា BOT ដូចគ្នាទៅនឹងគម្រោងផ្លូវល្បឿនលឿនភ្នំពេញ-ក្រុងព្រះសីហនុដែរ ហើយក្រុមហ៊ុននឹងធ្វើប្រតិបត្តិការលើផ្លូវនេះសម្រាប់ពេល៥០ឆ្នាំ មុននឹងផ្ទេរជូនរាជរដ្ឋាភិបាលកម្ពុជាគ្រប់គ្រង។ សូមបញ្ជាក់ថា ហេដ្ឋារចនាសម្ព័ន្ធផ្លូវល្បឿនលឿនពីភ្នំពេញទៅទល់ដែនវៀតណាមមួយនេះ នឹងត្រូវតភ្ជាប់ជាមួយគម្រោងផ្លូវល្បឿនលឿនហូជីមិញ-ម៉ុកបៃរបស់ប្រទេសវៀតណាម ដែលរំពឹងថា នឹងរួចរាល់ក្នុងពេលដំណាលគ្នាផងដែរ៕