នៅចំពោះមុខបញ្ហានេះ ឯកឧត្តម ស៊ុន ចាន់ថុល បានអំពាវនាវដល់ពលរដ្ឋដែលត្រូវទទួលសេវាសាធារណៈពីក្រសួងសាធារណការ សូមធ្វើដោយខ្លួនឯងចៀសវាងប្រើប្រាស់ឈ្មួញកណ្ដាល ដើម្បីកាត់បន្ថយការចំណាយដែលឥតប្រយោជន៍ ខណៈរាជរដ្ឋាភិបាលកំពុងសំរួលការងារបម្រើសេវាសាធារណជូនពលរដ្ឋកាន់តែល្អប្រសើរ។ នេះបើតាមការថ្លែងរបស់ទេសរដ្ឋមន្ត្រី ស៊ុន ចាន់ថុល ក្នុងពីធីសម្ពោធដាក់ប្រើប្រាស់ជាផ្លូវការស្ថានីយត្រួតពិនិត្យយានយន្តសំរោងអណ្ដែត ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ ពាក់ព័ន្ធនឹងការធ្វើឆៀកឡាន ឬបន្តបណ្ណបើកបរជាដើម រដ្ឋមន្ត្រីក្រសួងសាធារណការរូបនេះ អះអាងថា ក្រសួងបានដាក់តម្លៃច្បាស់ៗដល់ពលរដ្ឋបានឃើញ និងមិនស្មុគស្មាញឡើយ។ រដ្ឋមន្ត្រីសាធារណការថ្លែងដូច្នេះថា៖ «យើងចេះតែនិយាយថាយកឡានមកឆៀក ឬពន្យារប័ណ្ណបើកបរប្ដូរប័ណ្ណបើកបរត្រូវប្រើថវិកាអស់ ២០០ ទៅ ៣០០ដុល្លារ។ ខ្ញុំសូមជម្រាបថាអត់មានអញ្ចឹងទេ! តម្លៃគឺមានបិទច្បាស់លាស់យើងកុំប្រើឈ្មួញកណ្ដាលយើងមកផ្ទាល់ខ្លួនយើងធ្វើនៅមណ្ឌលប្ដូរប័ណ្ណបើកបរដែលខ្ញុំបានលើកឡើងទាំងអំបាលម៉ាន់នេះនៅភ្នំពេញ ហើយនៅតាមខេត្តយើងមាននៅក្រុងព្រះសីហនុ នៅសៀមរាប និងមានតំបន់ដែលយើងផ្ដល់សេវាជូនបងប្អូននេះ អញ្ចឹងសុំកុំប្រើឈ្មួញកណ្ដាលព្រោះថាអស់លុយហើយ យឺតយ៉ាវទៀត»។ គួរបញ្ជាក់ផងដែរថា សំណង់មណ្ឌលឆៀកថ្មីដែលសម្ពោធដាក់ប្រើប្រាស់ជាផ្លូវការនាថ្ងៃនេះ បានសាងសង់នៅដើមខែសីហា ឆ្នាំ ២០២២ និងបានសាងសង់ចប់សព្វគ្រប់នៅដើម ខែមករា ឆ្នាំ២០២៣លើទំហំដីប្រមាណជិត៦ពាន់ម៉ែតការ៉ រួមមានអគារឆៀក អគាររដ្ឋបាល រួមគ្នាតែមួយ និងមានបំពាក់ឧបករណ៍ឆៀក២ខ្សែ ស៊េរីឆ្នាំ២០២២ សំរាប់ឆៀកយានយន្តគ្រប់ប្រភេទ ផងដែរ៕