រាជធានីភ្នំពេញ៖ ក្រសួងសាធារណការ និងដឹកជញ្ជូន បានប្រកាសផ្ដល់ឧបករណ៍ ETC-OBU ដោយឥតគិតថ្លៃសាជាថ្មីរយៈពេល៣ខែ ពោលចាប់ពីថ្ងៃទី១៥មីនា ដល់ ១៥មិថុនា ឆ្នាំ២០២៣ ខណៈក្រសួងធ្លាប់បានផ្ដល់ជូនឧបករណ៍នេះសរុបជាង១ម៉ឺនគ្រឿងទៅហើយកាលពីចុងឆ្នាំមុន។ ការបំពាក់នូវឧបករណ៍ ETC-OBU គឺដើម្បីប្រើប្រាស់គន្លង ETC សម្រាប់ចេញចូលផ្លូវល្បឿនលឿនភ្នំពេញ-ក្រុងព្រះសីហនុ ចំពោះអ្នកមិនចង់រង់ចាំយូរពេលចេញចូល ព្រោះឧបករណ៍នេះបានចូលរួមកាត់បន្ថយការកកស្ទះ ការរង់ចាំយូរ ការអាប់ជាសាច់ប្រាក់ជាដើម ដោយបង្វែរមកជាការប្រើជាឌីជីថលសុទ្ធតែម្ដង។ ថ្លែងប្រាប់ SBM News តាមទូរសព្ទ នាថ្ងៃទី១៣ ខែមីនា ឆ្នាំ២០២៣ អ្នកនាំពាក្យក្រសួងសាធារណការ និងដឹកជញ្ជូន ឯកឧត្តម ហ៊ាង សុទ្ធាយុត្តិ បានលើកឡើងថា ក្រសួងសម្រេចផ្ដល់ជូនឧបករណ៍ ETC-OBU សាជាថ្មីនេះ គឺដោយសារតែចង់សម្រួលដល់អ្នកបើកបរ ជំរុញការប្រើប្រាស់ដុំETC-OBU ឱ្យបានច្រើន ពីព្រោះដុំនេះវាកាត់បន្ថយការកកស្ទះចរាចរណ៍ ជាពិសេសគឺច្រកចេញតែម្ដង។ ឯកឧត្តម ហ៊ាង សុទ្ធាយុត្តិ បានថ្លែងថា៖ «ជាទូទៅច្រកចេញ គឺយើងត្រូវការគិតលុយ ប៉ុន្ដែកាលណាគាត់បំពាក់នូវដុំ ETC-OBU នេះ គឺគាត់មិនចាំបាច់ចាំគិតលុយទេ ព្រោះលុយគឺគាត់ត្រូវបញ្ចូលទុកមុនដូចកាតទូរសព្ទអ៊ីចឹង»។ ឯកឧត្តមបានប្រៀបធៀបថា ពេលយើងបញ្ចូលទូរសព្ទនៅពេលប្រើរួចហើយគឺកាត់ភ្លាមៗតែម្ដង វាខុសពីការនិយាយទូរសព្ទសាធារណៈជំនាន់មុន និយាយចប់ត្រូវឱ្យលុយគេ។ ដោយឡែក ទូរសព្ទរាល់ថ្ងៃនេះ យើងត្រូវបញ្ចូលលុយទៅមុន រួចពេលនិយាយចប់ គឺវាកាត់លុយដោយស័្វយប្រវត្តិតែម្ដង ដូច្នេះនេះគឺជាទម្រង់នៃការប្រើប្រាស់ដុំ ETC-OBU។ យ៉ាងណាមិញ ចំពោះគន្លងនេះបងប្អូនអាចបញ្ចូលសមតុល្យទៅក្នុងផ្លាកលេខសម្គាល់យានយន្តជាមុន តាមកម្មវិធីធនាគារក្នុងទូរសព្ទដៃ (Mobile Banking) នៃគ្រឹះស្ថានហិរញ្ញវត្ថុ និងធនាគារដៃគូទាំង៧ របស់ក្រសួងសាធារណការ និងដឹកជញ្ជូន ដែលក្នុងនោះរួមមាន៖ ធនាគារ ជីបម៉ុង, អេស៊ីលីដា, ABA, វីង, វឌ្ឍនៈ, កាណាឌីយ៉ា និងលីហួរវេរលុយ។