ភ្នំពេញ ៖ ឯកឧត្ដម ទេសរដ្ឋមន្រ្តី ស៊ុន ចាន់ថុល រដ្ឋមន្ដ្រីក្រសួងសា ធារណការ និងដឹកជញ្ជូន បានបញ្ជាក់ថា គម្រោងស្ថាបនាផ្លូវល្បឿនលឿនភ្នំពេញ-បាវិត គ្រោងនឹងបើកដ្ឋានសាងសង់នៅពាក់ កណ្តាលឆ្នាំ២០២៣នេះ ដោយគ្មានការលុបចោលឬពន្យារពេលនោះឡើយ។ ថ្លែងក្នុងពិធីសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងសាធារណការ និងដឹកជញ្ជូន នៅព្រឹកថ្ងៃទី១៥ខែកុម្ភៈ ឆ្នាំ២០២៣ នាទីស្តីការក្រសួង ឯកឧត្ដម ទេសរដ្ឋមន្រ្តី ស៊ុន ចាន់ថុល បានមានប្រសាសន៍ថា គម្រោងផ្លូវល្បឿនលឿនភ្នំពេញ- បាវិត កំពុងដំណើរការនិតិវិធីផ្ទៃក្នុងហើយនឹងឈានទៅចុះហត្ថលេខានាពេលឆាប់ៗខាងមុខនេះ រវាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរា ជាណាចក្រកម្ពុជានិងឯកឧត្តម លី ខឺឈាង នាយករដ្ឋមន្ត្រីនៃសាធារ ណរដ្ឋប្រជាមានិតចិន។ ឯកឧត្ដម ទេសរដ្ឋមន្រ្តី ស៊ុន ចាន់ថុល បានបញ្ជាក់ថា សម្តេចអគ្គ មហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានលើកជាសំណូមពរ ទៅខាងមិត្តចិន ដើម្បីជំរុញនិតិវិធី ខណៈដែលក្រុមហ៊ុនសាងសង់បានសន្យា នឹងបើកការដ្ឋានសាងសង់យ៉ាងយូរត្រឹមខែមិថុនា ឆ្នាំ២០២៣ និងគ្រោងបញ្ចប់ការសាងសង់នៅឆ្នាំ២០២៧។ ឯកឧត្ដម ទេសរដ្ឋមន្រ្តី ស៊ុន ចាន់ថុល បានបញ្ជាក់បន្ថែមថា ការជំរុញការងារសាងសង់ផ្លូវល្បឿនលឿនភ្នំពេញ-បាវិត ឱ្យបានឆាប់រហ័សនេះ ដើម្បីឱ្យស្របតាមផ្លូវល្បឿនលឿនពីហូជីមិញទៅម៉ុកបៃ ដោយសារត្រូវតភ្ជាប់គ្នា។ សំឡេង « សូមជម្រាបជូនបញ្ជាក់ឱ្យច្បាស់មិនមានការលុបចោលឬពន្យារពេល សាងសង់ផ្លូវល្បឿនលឿនភ្នំពេញ-បាវិតទេសូមជម្រាបឱ្យច្បាស់។ បើយើងចង់ចុះហត្ថលេ ខាស្អែកក៏បានដែរ ក៏ប៉ុន្តែនាយករដ្ឋមន្ត្រីចិន លោកមិនអាចធ្វើជាសាក្សីបាន ដោយសារនិតិវិធីផ្ទៃក្នុងគាត់ធ្វើមិនទាន់បានចប់ ប៉ុន្តែបើយើងចង់ចុះហត្ថលេខារវាងក្រសួង សាធារណការនិងដឹកជញ្ជូន និងក្រុមហ៊ុនសាងសង់ ស្អែកក៏ចុះបានថ្ងៃនេះក៏ចុះបានអត់មានបញ្ហា ក៏ប៉ុន្តែយើងចង់ចុះមុខនាយករដ្ឋមន្ត្រីទាំងពីរប៉ុន្តែនិតិវិធីធ្វើមិនទាន់ហើយ »។ ឯកឧត្ដមទេសរដ្ឋមន្រ្តី ស៊ុន ចាន់ថុល បានឱ្យដឹងទៀតថា ក្រុមហ៊ុនចិននឹងសាងសង់ផ្លូវ នៅត្រើយខាងកើតរាជធានីភ្នំពេញទៅក្រុងបាវិតព្រំដែនកម្ពុជា វៀតណាម ចម្ងាយ១៣៥គីឡូម៉ែត្រ ចំណែកឯភាគីកម្ពុជានឹងសាងសង់ស្ពានឆ្លង ទន្លេមេគង្គ ដោយសារតែសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជា ណាចក្រកម្ពុជា ចង់ឱ្យប្រជាពលរដ្ឋ ឆ្លងពីត្រើយខាងលិចទៅល្វាឯមត្រើយខាងកើត ប្រើប្រាស់ស្ពានដោយពុំមានការបង់ប្រាក់ ប្រសិនបើដាក់ចូលក្នុងគម្រោងផ្លូវល្បឿនលឿន នោះប្រជាពលរដ្ឋត្រូវបង់កម្រៃនៃការប្រើប្រាស់ស្ពានផងដែរ។ គួរជម្រាបថា កាលពីពេលកន្លងទៅនេះ រាជរដ្ឋាភិបាលបានប្រកាសថា នឹងបញ្ចេញថវិកាជាតិប្រមាណជាង ២០០ លានដុល្លារអាមេរិក ដើម្បីសាងសង់ស្ពានឆ្លងកាត់ទន្លេមេគង្គពីផ្លូវជាតិលេខ១ ទៅកាន់តំបន់ល្វាឯម ដើម្បីតភ្ជាប់ជាមួយផ្លូវល្បឿនលឿនភ្នំពេញ-បាវិត ដែលគ្រោងដំណើរការសាងសង់នៅពាក់កណ្ដាលឆ្នាំ២០២៣ ខាងមុខនេះ។ សូមជម្រាបថា ផ្លូវល្បឿនលឿនភ្នំពេញ-បាវិត គឺជាគម្រោងផ្លូវល្បឿនលឿនទី ២ ហើយ ក្នុងប្រទេសកម្ពុជា បន្ទាប់ផ្លូវល្បឿនលឿនភ្នំពេញ ក្រុងព្រះសីហនុ ខណៈផ្លូវនេះ គឺជាផ្លូវថ្មីទាំងស្រុង ដែលមានប្រវែង សរុបប្រហែល ១៣៥ គីឡូម៉ែត្រ ហើយដែលត្រូវសាងសង់ជា ០៤គន្លង តួផ្លូវមានទទឹង ២៥,៥ ម៉ែត្រ។ ផ្លូវមួយខ្សែនេះ នឹងចាប់ផ្ដើមចេញពីភ្នំពេញនៅចំណុចផ្លូវក្រវាត់ក្រុងទី៣ កាត់តាមខេត្ត កណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិត ព្រំដែនកម្ពុជា-វៀតណាមតែម្ដង៕