កិច្ចប្រជុំពិភាក្សាស្ដីពីសំណើសុំដឹកជញ្ជូនទំនិញ (ទួរប៊ីនខ្យល់/Wind Power) របស់ក្រុមហ៊ុន SINGA CMS LOGISTICS CO., LTD. ពីកំពង់ផែក្រុងព្រះសីហនុ ទៅច្រកព្រំដែនត្រពាំងគ្រាល ទីស្ដីការក្រសួង៖ ថ្ងៃព្រហស្បតិ៍ ៥កើត ខែមាឃ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៦ ខែមករា ឆ្នាំ២០២៣ ឯកឧត្តម ពៅ ម៉ាលី រដ្ឋលេខាធិការក្រសួងសាធារណការ និងដឹកជញ្ជូន បានអនុញ្ញាតឱ្យក្រុមហ៊ុនSINGA CMS LOGISTICS CO., LTD. ជួបពិភាក្សាការងារលើគម្រោងស្នើសុំ ដឹកជញ្ជូនទំនិញ (ទួរប៊ីនខ្យល់/Wind Power) ពីកំពង់ផែស្វយ័តក្រុងព្រះសីហនុ ទៅច្រកព្រំដែនត្រពាំងគ្រាល ក្នុងខេត្តស្ទឹងត្រែង ដោយមានការចូលរួមពីថ្នាក់ដឹកនាំនៃអគ្គនាយកដ្ឋានជំនាញពាក់ព័ន្ធជាច្រើនរូប។ កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យលើសំណើសុំដឹកជញ្ជូនទំនិញ(ទួរប៊ីនខ្យល់/Wind Power) របស់ក្រុមហ៊ុន ដោយការដឹកជញ្ជូននេះនឹងផ្ដើមចេញពីកំពង់ផែក្រុងព្រះសីហនុទៅកាន់ច្រកព្រំដែនត្រពាំងគ្រាល ឆ្លងកាត់ផ្លូវជាតិលេខ៤ លេខ៦ លេខ៧ លេខ៨ និងឆ្លងកាត់ស្ពានតូចធំជាច្រើនផងដែរ។ បន្ទាប់ពីក្រុមហ៊ុនបានជម្រាបជូនព័ត៌មានលម្អិតអំពីទំនិញ (ទួរប៊ីនខ្យល់/Wind Power) ផ្លូវដឹកជញ្ជូនឆ្លងកាត់ និងការងារពាក់ព័ន្ធនឹងការដឹកជញ្ជូនទំនិញ(ទួរប៊ីនខ្យល់/Wind Power) ឯកឧត្តមរដ្ឋលេខាធិការ បានផ្ដល់អនុសាសន៍ឱ្យក្រុមហ៊ុនពិភាក្សាជាមួយអគ្គនាយកដ្ឋានសាធារណការ អគ្គនាយកដ្ឋានបច្ចេកទេស អគ្គនាយកដ្ឋានដឹកជញ្ជូនផ្លូវគោក និងគណៈកម្មាធិការដឹកនាំការត្រួតពិនិត្យយានយន្តដឹកជញ្ជូន លើសទម្ងន់កម្រិតកំណត់ ដើម្បីពិនិត្យឱ្យបានច្បាស់លាស់។ ជាងនេះទៅទៀត ក្រុមហ៊ុន គួរពិភាក្សា និងប្រឹក្សាយោបល់ជាមួយអគ្គនាយកដ្ឋានគយ និងរដ្ឋាករកម្ពុជា ដើម្បីដោះស្រាយបញ្ហាទាក់ទងនឹងពន្ធនាំចូល និងជាមួយក្រុមហ៊ុនសាជីវកម្មស្ពានថ្នល់ចិន(CRBC) ដើម្បីស្នើសុំធ្វើប្រតិបត្តិការដឹកជញ្ជូនលើផ្លូវល្បឿនលឿនភ្នំពេញ-ក្រុងព្រះសីហនុផងដែរ។ ថ្លែងទៅកាន់អង្គប្រជុំនាឱកាសនោះ ឯកឧត្តមរដ្ឋលេខាធិការ ក៏បានផ្ដល់អនុសាសន៍ឱ្យក្រុមហ៊ុនធ្វើលិខិតស្នើសុំដោយបញ្ជាក់ពីព័ត៌មានលម្អិត ព្រមទាំងកិច្ចសន្យា របាយការណ៍សិក្សាស្រាវជ្រាវពីផលប៉ះពាល់ និងដំណោះស្រាយដាក់ជូនមកក្រសួងសាធារណការ និងដឹកជញ្ជូន ដើម្បីពិនិត្យ និងសម្រេច៕