[VAYO FM] - កំណាត់ផ្លូវជាតិលេខ៦ដែលជាផ្លូវសំខាន់ឆ្ពោះទៅពហុកីឡដ្ឋានជាតិមរតកតេជោជួសជុលបាន៨០% ហើយ
2023-01-25
ទៅកាន់ទំព័រចុះផ្សាយក្នុង VAYO FM
ការដ្ឋានជួសជុលផ្លូវជាតិលេខ៦សម្រេចលទ្ធផលបាន៨០ភាគរយហើយនៃគម្រោង ដោយកំណត់ផ្លូវនេះជាតម្រាយផ្លូវមួយក្នុងចំណោមផ្លូវចំនួន៤ខ្សែ សម្ដៅឆ្ពោះទៅកាន់ពហុកីឡដ្ឋានជាតិមរតកតេជោដែលរដ្ឋបាលរាជធានីភ្នំពេញបាននិងកំពុងសាងសង់។ នេះបើតាមការបញ្ជាក់របស់មន្ទីរសាធារណការ និងដឹកជញ្ជូន នៅថ្ងៃទី២៥ ខែមករា ឆ្នាំ២០២៣នេះ។
គួររម្លឹកថា កាលពីថ្ងៃទី១២ ខែកញ្ញា ឆ្នាំ២០២២នេះ រដ្ឋបាលរាជធានីភ្នំពេញបានអនុញ្ញាតឱ្យមន្ទីរសាធារណការ និងដឹកជញ្ជូនរាជធានីភ្នំពេញ ជួសជុលនិងដាក់បំពង់លូតាមបណ្ដោយកំណាត់ផ្លូវជាតិលេខ៦ ស្ថិតនៅក្នុងភូមិសាស្ត្ររាជធានីភ្នំពេញ ដើម្បីបម្រើដល់ការចូលរួមប្រកួតកីឡាអាស៊ីអាគ្នេយ៍ ឬស៊ីហ្គេមលើកទី៣២ ឆ្នាំ២០២៣នេះ។ គ្រានោះដែរ រដ្ឋបាលរាជធានីភ្នំពេញបានស្នើសុំការយោគយល់ និងអធ្យាស្រ័យពីប្រជាពលរដ្ឋដែលរស់នៅ និងឆ្លងកាត់តាមបណ្ដោយផ្លូវជាតិលេខ៦ទាំងអស់ ដោយសារការដ្ឋានជួសជុលអាចបង្កការរំខានដល់ប្រជាពលរដ្ឋដែលធ្វើដំណើរឆ្លងកាត់ និងកំពុងរស់នៅតាមបណ្ដោយផ្លូវនេះ៕
