ពោធិ៍សាត់៖ ផ្លូវបេតុងក្នុងទីប្រជុំជនឃុំអូរសោម ស្រុកវាលវែងចំនួន៦ខ្សែ ប្រវែង២៨ គ.ម ត្រូវបានរដ្ឋបាលខេត្តពោធិ៍សាត់ ប្រើប្រាស់កញ្ចប់ថវិកាគុណប្រយោជន៍របស់ខេត្ត ដើម្បីស្ថាបនាជូនប្រជាពលរដ្ឋប្រើប្រាស់ហើយបានធ្វើពិធីបើកការរដ្ឋាននៅថ្ងៃទី២៧ ខែវិច្ឆិកាឆ្នាំ២០២២នេះ ក្រោមវត្តមានលោកខូយ រីដា អភិបាល នៃគណ:អភិបាលខេត្តពោធិ៍សាត់ និងលោកទី ថានី អនុប្រធានទី១ អាជ្ញាធរអគ្គីសនីកម្ពុជា និងជាប្រធានក្រុមការងាររាជចុះមូលដ្ឋានស្រុកវែងវាល។ លោកខូយ រីដា អភិបាលនៃគណៈអភិបាលខេត្តមានប្រសាសន៍ថាចំពោះផ្លូវលំគ្រួសក្រហមចំនួន០៦ខ្សែប្រវែង២៨គ.មនៅក្នុងទីប្រជុំជនឃុំអូរសោមស្រុកវាលវែងនោះក្នុងពេលដ៏ខ្លីខាងមុខនេះនិងក្លាយទៅជាផ្លូវបេតុងទាំងអស់តាមដំណាក់កាលនីមួយៗដោយពង្រីកទទឹងផ្លូវ២០ម៉ែត្រនិងតួរផ្លូវ១០ម៉ែត្រដើម្បីធានាគុណភាពដល់អ្នកប្រើប្រាស់។ ការស្ថាបនាផ្លូវនេះគឺប្រើប្រាស់កញ្ចប់ថវិកាគុណប្រយោជន៍របស់ខេត្តដើម្បីផ្តល់ជូនបងប្អូនប្រជាពលរដ្ឋប្រើប្រាស់ប្រកបមុខរបរប្រចាំថ្ងៃ។ ហើយកត្តាដែលសំខាន់នោះ សូមឱ្យបងប្អូន ប្រជាពលរដ្ឋ ដែលរស់នៅតាមដងផ្លូវ ដែលមានការប៉ះពាល់ដូចជារបង ផលដំណាំបន្តិចបន្តួចនោះសូមមេត្តាបើកបេះដូងឱ្យទូលាយ ចូលរួមដោយស្មោះស្ម័គ្រ ដើម្បីទទួលបានផ្លូវបេតុងដ៏ល្អនេះនៅក្នុងភូមិ ឃុំរបស់យើងដើម្បីជាប្រយោជន៍ រួម។ លោកអភិបាលខេត្ត បានលើកឡើងថា នេះគឺជាសមិទ្ធិផលថ្មីមួយទៀត បន្ទាប់ពីសមិទ្ធិផលនានាជាច្រើនក្រោមដំបូលសុខសន្តិភាព ។ លោកអភិបាលខេត្តបានជម្រាបជូនថា ខេត្តពោធិ៍សាត់គឺជា ខេត្តមួយក្នុង ចំណោម ២៥រាជធានី ខេត្ត ដែលប្រមុខរាជ រដ្ឋាភិបាល បានផ្តោតការយកចិត្តទុកដាក់ក្នុងការអភិវឌ្ឍន៍នូវហេដ្ឋារចនាសម្ព័ន្ធបានច្រើន ដែលបាននឹងកំពុងធ្វើការស្ថាបនាផ្លូវជាតិលេខ១០ចាប់ពីខេត្តព្រំប្រទល់ខេត្តកោះកុង ឆ្លងកាត់ ឃុំអូរសោម ស្រុកវាលវែងដល់សំឡូតខេត្តបាត់ដំបងជិត២០០គ.ម និងផ្លូវមួយខ្សែទៀត ដែលបានស្ថាបនារួចនិងកំពុងដំណើរការចរាចរណ៍សព្វថ្ងៃគឺផ្លូវជាតិលេខ៥៥តភ្ជាប់ពីផ្លូវជាតិ៥ ឆ្ពោះទៅ កាន់ ឃុំថ្មដា ស្រុកវាលវែង ជាប់ជាមួយខេត្តត្រាត ប្រទេសថៃ ជិត២០០គ.មផងដែរ។ លោកបានឲ្យដឹងថានៅថ្ងៃខាងមុខនេះខេត្តពោធិ៍សាត់និងខេត្តត្រាតប្រទេសថៃមានកិច្ចសហការគ្នាគ្រោងបង្កើតផ្សារណាត់មួយកន្លែង នៅព្រំដែន ដើម្បីទទួលទិញ លក់ និងផ្លាស់ប្តូផលិតផលគ្នាទៅវិញទៅមក ហេតុនេះសូមបងប្អូនខិតខំផលិតដំណាំឱ្យបានច្រើនដោយប្រើប្រាស់ជីធម្មជាតិពិតជាមានទីផ្សារទាំងក្នុងស្រុកនិងក្រៅប្រទេសដើម្បីបង្តើនប្រាក់ចំណូលក្នុងគ្រួសារ។