សិក្ខាកាមជាយុវជន ស.ស.យ.ក ខេត្តសៀមរាប ប្រមាណ១០០រូប ទទួលបានការបណ្ដុះបណ្ដាល សុវត្ថិភាពចរាចរណ៍ផ្លូវគោក សម្រាប់យកទៅផ្សព្វផ្សាយបន្ដជូនដល់ប្រជាពលរដ្ឋ សៀមរាប៖ ថ្ងៃអង្គារ ៧រោច ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៥ ខែវិច្ឆិកា ឆ្នាំ២០២២ ក្រុមការងារ ស.ស.យ.ក វិស័យសាធារណការ និងដឹកជញ្ជូន សហការជាមួយ ស.ស.យ.ក ខេត្ត និងមន្ទីរសាធារណការ និងដឹកជញ្ជូនខេត្តសៀមរាប បានរៀបចំវគ្គបណ្តុះបណ្តាលស្តីពីសុវត្ថិភាពចរាចរណ៍ផ្លូវគោក ដល់សមាជិក សមាជិកា ស.ស.យ.ក ខេត្តសៀមរាប ដោយមានសិក្ខាកាមជាយុវជន ស.ស.យ.ក អន្តរវិស័យក្នុងខេត្តសៀមរាប សរុបចំនួន ១០០នាក់។ វគ្គបណ្តុះបណ្តាលនេះ មានគោលបំណងអប់រំផ្សព្វផ្សាយស្តីពី សុវត្ថិភាពចរាចរណ៍ផ្លូវគោក ដើម្បីលើកកម្ពស់ការយល់ដឹងអំពីសុវត្ថិភាពចរាចរណ៍ផ្លូវគោក ដល់សមាជិក សមាជិកា ស.ស.យ.ក និងដើម្បីយកចំណេះដឹងនេះទៅអប់រំ ផ្សព្វផ្សាយបន្តដល់យុវជនដទៃទៀត។ នៅក្នុងវគ្គបណ្ដុះបណ្ដាលនេះដែរគឺមានការធ្វើបទបង្ហាញលម្អិត ផ្ដោតលើប្រធានបទមួយចំនួនរួមមាន ស្ថានភាពទូទៅនៃគ្រោះថ្នាក់ចរាចរណ៍ផ្លូវគោក, សុជីវធម៌ក្នុងការបើកបរ ការប្រើប្រាស់ល្បឿនក្នុងការបើកបរ, សិទ្ធិអាទិភាពនៅត្រង់ផ្លូវប្រសព្វ, ហានិភ័យនៃការបើកបរក្រោមឥទ្ធិពលនៃគ្រឿងស្រវឹង, អត្ថប្រយោជន៍នៃមួកសុវត្ថិភាព, ការត្រួតពិនិត្យទោចក្រយានយន្ត និងកម្មវិធីយល់ដឹងអំពីទ្រឹស្តីនៃការបើកបរលើទូរស័ព្ទដៃ (Cambodia Driving Rules) និងកម្មវិធីថែទាំផ្លូវ (Road Care Mobile App) ផងដែរ។ តាមរយៈលទ្ធផលពីកម្រងសំណួរនៃវគ្គបណ្តុះបណ្តាលលើការធ្វើតេស្តសាកល្បងការយល់ដឹងរបស់សិក្ខាកាមដែលចូលរួម បានបង្ហាញថា មុនវគ្គបណ្តុះបណ្តាល សិក្ខាកាមមានការយល់ដឹងអំពីប្រធានបទបានចំនួន ៦៣% បន្ទាប់ពីទទួលបានការបណ្តុះបណ្តាលរួច ការយល់ដឹងរបស់សិក្ខាកាមមានការកើនឡើង រហូតដល់ចំនួន ៨៦%៕