នោថ្ងៃទី១៤ ខែតុលា ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បាន អញ្ជើញដឹកនាំកិច្ចប្រជុំពិនិត្យវឌ្ឍនភាពការងារគម្រោងសិក្សាផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់ ជាមួយតំណាងក្រុមហ៊ុនសាជីវកម្មស្ពាន និងថ្នល់ចិន(CRBC) និងជំនាញការរបស់ក្រុមហ៊ុន CCCC Water Transport Consultant ដោយឯកឧត្តមក៏បានជំរុញឱ្យក្រុមហ៊ុនទាំង២នៅត្រូវបញ្ជាប់ការសិក្សាត្រឹមខែមករា ឆ្នាំ២០២៣ នេះ។ កិច្ចប្រជុំនេះគឺរៀបចំឡើងក្នុងគោលបំណងដើម្បីពិនិត្យវឌ្ឍនភាពការងារ និងស្វែងរកដំណោះស្រាយលើកិច្ចកាបច្ចេកទេសសំខាន់ៗមួយចំនួនដែលស្នើឡើងដោយមន្រ្តីបច្ចេកទេសរបស់ក្រសួង ដើម្បីជួយជំរុញល្បឿននៃការសិក្សានេះឱ្យបានលឿន និងអាចបញ្ចប់នាពេលដ៏ខ្លីខាងមុខប្រកបដោយគុណភាព និងប្រសិទ្ធភាពខ្ពស់ ជាពិសេសទទួលបានលទ្ធផលគ្រប់ជ្រុងជ្រោយតាមផែនការដែលបានរំពឹងទុក។ ក្នុងកិច្ចប្រជុំខាងលើឯកឧត្តមទេសរដ្ឋមន្ត្រី បានស្នើសុំឱ្យភាគីក្រុមហ៊ុនទាំងពីរយកចិត្តទុកដាក់បន្ថែមទៀតលើការសិក្សាបច្ចេកទេសលម្អិតឱ្យមានគុណភាពខ្ពស់ និងត្រូវសហការកាន់តែជិតស្និទ្ធបន្ថែមទៀតជាមួយមន្ត្រីបច្ចេកទេសក្រសួង ដើម្បីពន្លឿនគម្រោងសិក្សានេះឱ្យបានចប់សព្វគ្រប់ និងគ្រប់ជ្រុងជ្រោយយ៉ាងយូរត្រឹមខែមករា ឆ្នាំ២០២៣។រំលឹកដែរថា កន្លងមកក្រសួងសាធារណការ និងដឹកជញ្ជូន ក៏បានបញ្ជាក់ថាការសិក្សាគម្រោងនៃការស្ដារផ្លូវទឹកដឹកជញ្ជូននេះ ពីព្រែកអំបិល ទៅកាន់ខេត្ដកែបផងដែរ ដែលមានប្រវែងប្រមាណ ១៦៨ គីឡូម៉ែត្រ និងជីកព្រែកថ្មីមួយខ្សែទៀតដែលមានប្រវែងប្រមាណ ៧ គីឡូម៉ែត្រ នៅពេលដែលសាងសង់រួចរាល់គម្រោងនេះគឺអាចកាត់បន្ថយការចំណាយ និងថ្លៃដើមនៃការដឹកជញ្ជូនឱ្យកាន់តែទាបជាងមុន ព្រមទាំងផ្ដល់ភាពងាយស្រួលក្នុងការធ្វើសមាហរណកម្មវិស័យដឹកជញ្ជូនតាមផ្លូវទឹកផ្ទៃក្នុងប្រទេសផង និងអាចតភ្ជាប់ជាមួយអន្តរជាតិបានកាន់តែងាយស្រួលផងដែរ៕