សៀមរាប៖ សេចក្តីជូនដំណឹង, ដោយស្ថានភាពជំនន់ទឹកភ្លៀងបាននិងកំពុងជន់ឡើងយ៉ាងខ្លាំង ជាហេតុបណ្ដាលឱ្យលិចលង់នៅតាមកំណាត់មួយចំនួន ដូចនេះ ខេត្តសៀមរាប សូមធ្វើការបិទចរាចរណ៍រថយន្តដឹកទំនិញធុនធ្ងន់គ្រប់ប្រភេទ ជាបណ្តោះអាសន្នក្នុងភូមិសាស្រ្តខេត្តសៀមរាប។ លោក លុក ផុស អភិបាលស្រុកអង្គរជុំ បានមានប្រសាសន៍នៅរសៀលថ្ងៃទី២២ ខែកញ្ញា ឆ្នាំ២០២២នេះថា ដោយសារតែមានភ្លៀងធ្លាក់ជាបន្តបន្ទាប់ ចាប់ពីថ្ងៃទី២០មកដល់ថ្ងៃទី២២ ខែកញ្ញា ឆ្នាំ២០២២ និងមួយផ្នែកទៀតទទួលទឹកជំនន់មកពីភូមិសាស្ត្រស្រុកវ៉ារិនផងនោះ បណ្តាលឱ្យកើតមានទឹកជំនន់នៅភូមិសាស្រ្តក្នុងឃុំចំនួន៥ ក្នុងចំណោមឃុំទាំង៧របស់ស្រុកអង្គរជុំ រួមមាន ៖ ឃុំស្រែខ្វាវ , ឃុំចារឈូក , ឃុំនគរភាស , ឃុំតាសោម និង ឃុំគោល ។ លោកអភិបាលស្រុកបន្តថា ផលប៉ះពាល់ដោយសារជំនន់ទឹកភ្លៀងនៅក្នុងឃុំទាំង៥នោះរួមមាន ៖ ១. ឃុំ ស្រែខ្វាវទឹកហូររំលងសរុបចំនួន ០៥ ខ្សែ មានប្រវែងសរុប ៥,៦០០ ម៉ែត្រ , ២ ឃុំចារឈូក ទឹកលិចក្រោមផ្ទះប្រជាពលរដ្ឋសរុបនៅភូមិ ចំនួន ០៥ ស្មើនឹង២២៥គ្រួសារ ទឹកហូររំលងសរុបចំនួន ០៩ ខ្សែ មានប្រវែងសរុប ១៣.៨៥០ម៉ែត្រ ដាច់សរុប ២ កន្លែង ប្រវែង ៥០ម៉ែត្រ ទឹកហូរច្រោះផ្ទះធ្ងន់ធ្ងរខ្លាំង ១ខ្នង ទឹកលិចទីធ្លាសាលារៀនចំនួន ៣សាលា ទឹកលិចទីធ្លាវត្តចំនួន ១វត្ត និង ទឹកលិចទីធ្លាមន្ទីពេទ្យបង្អែក , ៣.ឃុំនគរភាស ទឹកលិចក្រោមផ្ទះប្រជាពលរដ្ឋសរុបចំនួន ០៨ ភូមិស្មើនឹង ៩៨ គ្រួសារ ទឹកហូររំលងចំនួន ០៤ខ្សែ ប្រវែង ១.៥៩៥ ម៉ែត្រ ដាច់១កន្លែង ប្រវែង ១៥ ម៉ែត្រ ទឹកហូរច្រោះ១កន្លែងទឹកលិចទីធ្លាសាលារៀនចំនួន១សាលា ទឹកលិចទីធ្លាមណ្ឌលសុខភាពនគរភាស១កន្លែង និង ទឹកលិចប៉ុស្ដិ៍នគរបាលរដ្ឋបាលនគរភាស ១កន្លែង , ៤.ឃុំតាសោម ទឹកលិចក្រោមផ្ទះប្រជាពលរដ្ឋសរុបចំនួន១២ ភូមិ ស្មើនឹង ១៨៧ គ្រួសារ ទឹកហូររំលងចំនួន ១៨ខ្សែ មានប្រវែងសរុប ៨.៩១០ម៉ែត្រ និង ទឹកលិចទីធ្លាសាលារៀនចំនួន ៥សាលា និង ៥.ឃុំគោល ទឹកលិចក្រោមផ្ទះប្រជាពលរដ្ឋសរុបចំនួន ៧ភូមិ ស្មើនឹង ១០២ គ្រួសារ ទឹកហូររំលងសរុបចំនួន០៨ ខ្សែ មានប្រវែងសរុប៥.៩២០ ម៉ែត្រ ទឹកហូរដាច់សរុប ៦កន្លែង មានប្រវែងសរុប ១៨៥ ម៉ែត្រ ទឹកហូរច្រោះលូ ៦កន្លែង ទឹកលិចទីធ្លាសាលាមត្តេយ្យសហគមន៍ភូមិអំពិលធ្នង់ចំនួន០១សាលា ទឹកលិចទីធ្លាវត្តប្រាសាទគោលរង្ស៉ី និង ទឹកលិចទីធ្លាមណ្ឌលសុខភាព គោល១កន្លែង ។ លោកអភិបាលស្រុកអង្គរជុំ បន្តថា នៅក្នុងអំឡុងពេលនៃការកើតមានគ្រោះទឹកជំនន់នេះ នៅមិនទាន់មានប៉ះពាល់ដល់អាយុជីវិប្រជាពលរដ្ឋ និងសត្វ ឡើយ ខណៈបច្ចុប្បន្ននេះ អាជ្ញាធរស្រុក ឃុំ ភូមិ និង កងកម្លាំងមានសមត្ថកិច្ច កំពុងសហការគ្នាយ៉ាជិតស្និទ្ធ បន្តត្រៀមលក្ខណៈ ដើម្បីតាមដាន និងត្រៀមបម្រុងសម្រាប់ជួយសង្គ្រោះ ក្នុងករណីមានគ្រោះមហន្តរាយ ឬឧបទ្ទវហេតុផ្សេងៗ ព្រមទាំងបានធ្វើការណែនាំដល់បងប្អូនប្រជាពលរដ្ឋទាំងអស់ ត្រូវបង្កើនការប្រុងប្រយ័ត្ន មើលថែកូនចៅឲ្យបានល្អចៀសវាងគ្រោះថ្នាក់ដោយការលង់ទឹក , ការថែទាំសុខភាព ការបង្កាជំងឺរាករូស , កាពារពីការយាយីពីសត្វមានអាសិរពិស និង ការស្វែងរកទីទួលមានសុវត្ថិភាព ក្នុងករណីទឹកជំនន់នៅតែបន្តកើនឡើងខ្លាំងទៀត ៕