វគ្គបណ្តុះបណ្តាលស្តីពី កិច្ចការពារបរិស្ថាន និងសង្គម (Safeguards) និងយេនឌ័រ (Gender) សម្រាប់ការងារសាងសង់បណ្តាញលូខ្នែង ខ្នែងរង និងតំណភ្ជាប់តាមផ្ទះ នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ក្នុងក្រុងសៀមរាប សៀមរាប៖ នៅថ្ងៃទី២៣-២៤ ខែសីហា ឆ្នាំ២០២២ លោក ចៅ សុភៈភិបាល អគ្គនាយករង នៃអគ្គនាយកដ្ឋានប្រព័ន្ធចម្រោះទឹកកខ្វក់ និងជានាយកគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) បានអញ្ជើញជាអធិបតីបើកវគ្គបណ្តុះបណ្តាល ស្តីពីកិច្ចការពារបរិស្ថាន និងសង្គម (Safeguards) និងយេនឌ័រ (Gender) នៃគម្រោងការងារសាងសង់បណ្តាញលូខ្នែង ខ្នែងរង និងតំណភ្ជាប់តាមផ្ទះ ក្នុងក្រុងសៀមរាប ខេត្តសៀមរាប ដោយមានការចូលរួមពីក្រុមហ៊ុនទទួលបន្ទុកការងារសាងសង់ និងមន្ត្រីជំនាញពាក់ព័ន្ធ។ គោលបំណងនៃការបើកវគ្គបណ្តុះបណ្តាលនេះ គឺដើម្បីធ្វើការចែករំលែកនូវបទពិសោធន៍ចំណេះដឹងដ៏មានសារៈសំខាន់ ពីកិច្ចការពារបរិស្ថាន និងសង្គម (Safeguards) និងយេនឌ័រ (Gender) សម្រាប់ក្រុមហ៊ុនដែលបានចុះកិច្ចសន្យាសាងសង់ ហើយត្រូវអនុលោមតាមស្តង់ដារបរិស្ថាន និងសង្គម ស្របតាមកិច្ចសន្យាសាងសង់របស់គម្រោង ដើម្បីធានាដល់ការសម្រេចបាននូវប្រសិទ្ធភាពការងារ ប្រកបដោយទំនួលខុសត្រូវ អំឡុងពេលអនុវត្តការងារ និងក្រោយពេលបញ្ចប់ការសាងសង់។ ជាលទ្ធផល ក្នុងវគ្គបណ្តុះបណ្តាលនេះ បានធ្វើការពិភាក្សាផ្លាស់ប្តូរមតិយោបល់យ៉ាងផុលផុស រវាងមន្ត្រីជំនាញពាក់ព័ន្ធ ជាមួយក្រុមហ៊ុនសាងសង់ទាំងពីរ ដែលបានធ្វើការប្តេជ្ញាចិត្ត និងសន្យាគោរពអនុវត្តតាមកិច្ចសន្យាសាងសង់គម្រោង ដើម្បីសម្រេចឱ្យបានទៅតាមផែនការ ដែលគ្រោងនឹងដំណើរការសាងសង់ក្នុងខែកញ្ញាខាងមុខនេះ។ ជាចុងក្រោយ លោកអគ្គនាយករង បានធ្វើការវាយតម្លៃខ្ពស់ និងថ្លែងអំណរគុណដល់មន្ត្រីជំនាញពាក់ព័ន្ធដែលបានចូលរួមចែករំលែកនូវចំណេះដឹង និងការប្តេជ្ញាចិត្តរបស់ក្រុមហ៊ុនសាងសង់ ដែលបានធ្វើការសន្យាគោរពអនុវត្តតាមកិច្ចសន្យាសាងសង់គម្រោង ដើម្បីទទួលបានប្រសិទ្ធភាពការងារខ្ពស់ និងសម្រេចឱ្យបានទៅតាមផែនការ៕