[Rasmei Kampuchea Daily News] - រយៈពេល ៦ខែ កំពង់ផែស្វយ័តភ្នំពេញ រកចំណូលបានជាង ១៩ លានដុល្លារ
ភ្នំពេញ៖ យោងតាមរបាយការណ៍របស់ កំពង់ផែស្វយ័តភ្នំពេញ នៅឆមាសទី១ ឆ្នាំ២០២២ នេះ កំពង់ផែស្វយ័តភ្នំពេញ រកចំណូលបានជាង ១៩ លានដុល្លារ។
របាយការណ៍ដដែលនេះ បានឱ្យដឹងថាៈ កាលពីត្រីមាសទី១ ឆ្នាំ២០២២ កំពង់ផែស្វយ័តភ្នំពេញ រកចំណូលបានចំនួន ៩.៤៩៨.១៤៦ ដុល្លារ មានការកើនឡើង ១៧ ភាគរយ បើធៀបរយៈពេលដូចគ្នា ឆ្នាំ២០២១ មានចំនួន ៨.១១៨.០៤២ ដុល្លារ ។ ដោយឡែក ក្នុងត្រីមាសទី២ ឆ្នាំ២០២២ កំពង់ផែនេះ ចំណូលបាន ៩.៦៨៦.២៩៤ ដុល្លារអាមេរិក កើនឡើង ៤៥,៧៤%។ ចំណែកប្រាក់ចំណេញសុទ្ធ ក្នុងត្រីមាសទី២ ឆ្នាំ២០២២ មានសរុបចំនួន ៣.៧២៨.៥៩២ ដុល្លារអាមេរិក។
លោក ហ៊ី បាវី ប្រធានក្រុមប្រឹក្សាភិបាល និងជាអគ្គនាយកកំពង់ផែស្វយ័តភ្នំពេញ បានគូសបញ្ជាក់ ក្នុងរបាយការណ៍ថាៈ កំពង់ផែស្វយ័តភ្នំពេញ នឹងខិតខំបន្តផ្តោត ការយកចិត្តទុកដាក់ លើការធ្វើទំនើបកម្មប្រតិបត្តិការ ឲ្យស្របតាមស្តង់ដារ និងប្រព័ន្ធបច្ចេកវិទ្យា បង្កើនឧត្តមភាពប្រកួតប្រជែង ដោយស្មោះត្រង់ ជាមួយកំពង់ផែក្នុង និងក្រៅប្រទេស និងបង្ខិតសេវាកម្មកំពង់ផែ ឲ្យកាន់តែខិតជិតអ្នកប្រើប្រាស់ ចូលរួមក្នុងសកម្មភាពសង្គម និងសហគមន៍មូលដ្ឋាន៕
