MC : រដ្ឋបាលរាជធានីភ្នំពេញប្តេជ្ញាបន្តពង្រឹងការអនុវត្តន៍ច្បាប់ចរាចរណ៍ផ្លូវគោក ក្នុងឆមាសទី២ឆ្នាំ២០២២ ឱ្យកាន់តែល្អប្រសើរ ដើម្បីការពារសុខសុវត្ថិភាព និងការពារអាយុជីវិតរបស់ ប្រជាពលរដ្ឋ ។ លោក មាន ចាន់យ៉ាដា អភិបាលរងនៃគណ:អភិបាលរាជធានីភ្នំពេញ បានមានប្រសាសន៍ថា យោងតាម របាយការណ៍របស់ ស្នងការរដ្ឋបាលរាជធានីភ្នំពេញបានឱ្យដឹងថា ឆមាសទី១ឆ្នាំ២០២២នេះ បញ្ហាគ្រោះថ្នាក់ ចរាចរណ៍ក្នុងរាជធានីភ្នំពេញមានចំនួន៤៥៥លើក បើសិនជាប្រៀបធៀបជាមួយឆ្នាំ២០២១ មានត្រឹមតែ ៣៣៤លើក គឺមានការកើនឡើងរហូតដល់៣៦% ។ ថ្លែងក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆមាសទី១ និងលើកទិសដៅ ការងារឆមាសទី២ ឆ្នាំ២០២២ កាលពីថ្ងៃទី១៨ ខែសីហា ឆ្នាំ២០២២ នៅទីស្តីការក្រសួង លោកបានបន្តថា ដោយមើលឃើញពីការកើនឡើងនៃគ្រោះថា្នក់ចរាចរណ៍ក្នុងឆមាសទី១ឆ្នាំ២០២២នេះ រដ្ឋបាលរាជធានី ភ្នំពេញប្តេជ្ញារឹតបន្តឹងការអនុវត្តន៍ច្បាប់ចរាចរណ៍ផ្លូវគោកឱ្យមានប្រសិទ្ធភាពខ្ពស់ និងតម្រូវឱ្យមានការ ត្រួតពិនិត្យឡើងវិញរាល់ចំណុចអវិជ្ជមាន ដើម្បីពិនិត្យដោះស្រាយបញ្ហាប្រឈម ដូចជាមូលហេតុនៃ គ្រោះថ្នាក់ដោយសារការបើកបរលើសល្បឿនកំណត់ និងការមិនពាក់មួកសុវត្ថិភាពជាដើម ។ « សម្រាប់ឆមាសទី២ឆ្នាំ២០២២នេះ ដើម្បីដោះស្រាយបញ្ហាគ្រោះថ្នាក់ចរាចរណ៍នៅរាជធានីភ្នំពេញ គណៈកម្មាធិការសុវត្ថិភាពចរាចរណ៍ផ្លូវគោក ប្ដេជ្ញាចិត្តបន្តជំរុញអនុវត្តវិធានការណ៍៣រួមមាន អប់រំផ្សព្វផ្សាយ វិធានការរដ្ឋបាល និងវិធានការច្បាប់ឱ្យបានម៉ឺងម៉ាត់ » ។ លោកបន្ថែមថា ក្រៅពីវិធានការទាំងនេះ រដ្ឋបាលរាជធានីភ្នំពេញ ក៏បានដាក់ចេញនូវទិសដៅការងារសំខាន់ៗ មួយចំនួនដូចជា ៖ ១. ត្រូវបន្តយកចិត្តទុកដាក់និងបង្កើនការអប់រំណែនាំផ្សព្វផ្សាយតាមគ្រប់មធ្យោបាយ ជូនដល់ប្រជាពលរដ្ឋ ២. ត្រូវបន្តពង្រឹងយន្តការការងារប្រើប្រាស់បទពិសោធន៍ការងារល្អ ដែលមានស្រាប់ និងបន្តអភិវឌ្ឍសមត្ថភាពនិងជំនាញជាប្រចាំដល់មន្ត្រីអនុវត្តច្បាប់ចរាចរណ៍ទាំងអស់ ៣. បន្តយកចិត្តទុក ដាក់ពង្រឹងការអនុវត្តន៍ច្បាប់ស្តីពីចរាចរណ៍ផ្លូវគោកនិងលិខិតបទដ្ឋានគតិយុត្តពាក់ព័ន្ធជាធរមាន ៤. បន្ត ពង្រឹងនិងត្រួតពិនិត្យការងារសណ្ដាប់ធ្នាប់សាធារណៈនៅតាមដងផ្លូវនិងចិញ្ចើមផ្លូវ ៥. បន្តបង្កើនការត្រួត ពិនិត្យនិងផាកពិន័យចំពោះរថយន្តដឹកទំនិញធុនធ្ងន់គ្រប់ប្រភេទនិងលើសទម្ងន់កំណត់ ៦. បន្តពិនិត្យ លទ្ធភាពតាមរយៈការបង្កើនកិច្ចសហការនិងលើកទឹកចិត្តឱ្យមានការចូលរួមនឹងគាំទ្រពីស្ថាប័នសាធារណៈ និងវិស័យឯកជន ៧. ក្នុងឆ្នាំ២០២២និងឆ្នាំ២០២៣នេះ រាជរដ្ឋាភិបាលកម្ពុជានឹងត្រូវទទួលបន្ទុករៀបចំ ព្រឹត្តិការណ៍ជាតិនិងអន្តរជាតិជាច្រើន ដូច្នេះគណៈបញ្ជាការឯកភាពរដ្ឋបាលរាជធានីភ្នំពេញ នឹងត្រៀម សហការជាមួយកងកម្លាំងគ្រប់ប្រភេទ សំដៅត្រៀមលក្ខណៈសម្បត្តិនិងអនុវត្តតួនាទីភារកិច្ចរបស់ខ្លួន ឲ្យបានល្អប្រសើរ ធ្វើឱ្យព្រឹត្តិការណ៍ទាំងនោះប្រព្រឹត្តទៅដោយរលូននិងជោគជ័យ ។ លោកក៏បានអំពាវនាវឱ្យអ្នកបើកបរ សូមចូលរួមគោរព និងអនុវត្តច្បាប់ស្ដីពីចរាចរណ៍ផ្លូវគោកយ៉ាងផុលផុស បើកបរមានការយោគយល់អធ្យាស្រ័យ និងមានសណ្ដាប់ធ្នាប់ល្អ ពង្រឹងស្មារតីប្រុងប្រយ័ត្នក្នុងពេលបើកបរ និងត្រូវអនុវត្តឱ្យបានខ្ជាប់ខ្លួន តាមច្បាប់ស្ដីពីចរាចរណ៍ផ្លូវគោក ដោយត្រូវបំពេញកាតព្វកិច្ចផ្សេងៗ ដែល ច្បាប់បានកំណត់ ប្រកបដោយស្មារតីភ្ញាក់រលឹកខ្ពស់ ដើម្បីរួមចំណែកលើកស្ទួយកិត្តិយស និងសេចក្ដីថ្លៃថ្នូរ របស់សង្គមជាតិ និងបានជួយកាត់បន្ថយចំនួនអ្នកស្លាប់ និងរបួសដែលបណ្ដាលមកពីគ្រោះថ្នាក់ចរាចរណ៍ ផ្លូវគោក ៕