ផ្លូវល្បឿនលឿនភ្នំពេញ-ព្រះសីហនុ នឹងដាក់ឱ្យប្រើប្រាស់បណ្តោះអាសន្នក្នុងខែតុលាឆ្នាំនេះ ដោយផ្តល់ជូនការប្រើប្រាស់ដោយឥតគិតថ្លៃដល់អ្នកដំណើរក្នុងរយៈពេលមួយខែ។ ព័ត៌មាននេះត្រូវបានប្រកាសដោយលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី​ក្រសួង​សាធារណការ និង​ដឹក​ជញ្ជូន ក្នុង​ពេល​ចុះ​ពិនិត្យ​ការដ្ឋាន​សាងសង់។ លោកបន្តថា គិតត្រឹមពាក់កណ្តាលខែកក្កដានេះ ការស្ថាបនាផ្លូវល្បឿនលឿននេះ សម្រេចបាន៩៥ភាគរយ ហើយនៅសល់៥ភាគរយទៀត ដោយនៅសេសសល់ការដំឡើងផ្លាកសញ្ញាចរាចរណ៍ កាមេរ៉ាសុវត្ថិភាព ដាំដើមឈើជាដើម។ លោកបានបន្ថែមថា ក្រសួងបាននឹងកំពុងរៀបចំវីដេអូមួយ ដើម្បីលើកកម្ពស់ការយល់ដឹងដល់សាធារណជន អំពីការប្រើប្រាស់ផ្លូវល្បឿនលឿននេះ មុនពេលដំណើរការសាកល្បង ព្រោះវាជាប្រភេទផ្លូវល្បឿនលឿនដំបូងគេបង្អស់នៅកម្ពុជា។ មានប្រវែង ១៨៧ គីឡូម៉ែត្រ និងទទឹង ២៤.៥ ម៉ែត្រ ផ្លូវល្បឿនលឿនតម្លៃ ២ ពាន់លានដុល្លារអាមេរិក តភ្ជាប់ភូមិ ១ ក្នុងសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ទៅកាន់ភូមិ ១ ក្នុងសង្កាត់ ៣ ក្រុងព្រះសីហនុ ខេត្តព្រះសីហនុ៕