ព្រះសីហនុ៖ អភិបាលស្រុកកំពង់សិលា លោក សៅ បូរីវឌ្ឍនៈ បានបញ្ជាក់ថា អាជ្ញាធរស្រុក បានត្រៀមលក្ខណៈក្នុងការជួយជម្លៀសប្រជាពលរដ្ឋ និងសត្វពាហនៈ ព្រមទាំងបិទចរាចរណ៍លើកំណាត់ផ្លូវជាតិលេខ៤ ប្រសិនបើភ្លៀងនៅបន្តធ្លាក់។ ថ្លែងប្រាប់ CNC នៅរសៀលថ្ងៃនេះ លោក សៅ បូរីវឌ្ឍនៈ បានឱ្យដឹងថា មកទល់ពេលនេះ កម្ពស់ទឹកនៅចំណុចស្ពានស្ទឹងសំរោង ចន្លោះគីឡូម៉ែត្រលេខ ១១៥-១១៦ ក្នុងភូមិសាស្ត្រ ភូមិស្ទឹងសំរោង ឃុំអូរបាក់រទេះ ស្រុកកំពង់សីលា ទឹកកំពុងបន្តហក់ឡើងដល់កម្ពស់ ៥.៥០ម៉ែត្រ ពីបាតស្ទឹង ចំណែកអាកាសធាតុ មេឃកំពុងភ្លៀង។ បើតាមការសន្និដ្ឋាន បើភ្លៀងនៅតែបន្តធ្លាក់ នារសៀលថ្ងៃនេះ កម្ពស់ទឹកអាចនឹងឡើងដល់កម្រិតកម្ពស់ប្រកាសអាសន្ន ៥,៦០ ឬ៥,៧០ ម៉ែត្រពីបាតស្ទឹង។ ទោះយ៉ាងណា លោកអភិបាលស្រុក បានឱ្យដឹងថា ពេលនះចរាចរណ៍តាមដងផ្លូវជាតិលេខ ៤ត្រង់ចំណុចស្ពានស្ទឹងសំរោង រថយន្តតូចធំនៅធ្វើដំណើរចរាចរទៅមកជាធម្មតា។ ដោយឡែក បើតាមលោកអភិបាលខេត្តព្រះសីហនុ លោក គួច ចំរើន ក៏បានបញ្ជាក់ផងដែរថា ក្នុងករណីទឹកនៅបន្ដជន់ឡើងហើយលិចលើផ្លូវជាតិនោះ អាជ្ញាធរនឹងត្រូវបង្ខំចិត្តបិទចរាចរណ៍ត្រង់ចំណុចនេះជាបណ្ដោះអាសន្នតែម្ដង។ លោក គួច ចំរើន ក៏បានអំពាវនាវដល់ប្រជាពលរដ្ឋនៅតំបន់ខាងលើ ទាំងអ្នកដែលត្រូវធ្វើដំណើរឆ្លងកាត់ ត្រូវតែបង្កើននូវការប្រុងប្រយ័ត្នបន្ថែមទៀត ជាមួយនឹងស្ថានភាពលិចលង់នៅពេលនេះ។ បើតាមលោកអភិបាលខេត្ត កំណាត់ផ្លូវជាតិលេខ៤ ត្រង់ចំណុចស្ពានសំរោង ចន្លោះគីឡូម៉ែត្រលេខ១១៥-១១៦ ស្ថិតនៅភូមិស្ទឹងច្រាល ឃុំអូរបាក់រទះ ស្រុកកំពង់សីលា ដែលកំពុងរងការជន់លិចនេះ គឺដោយសារជំនន់ទឹកភ្លៀង និងទឹកធ្លាក់មកពីភ្នំគិរីរម្យ៕