ភ្នំពេញ៖ ឯកឧត្តម ហឿន សំនៀង នាយកវិទ្យាស្ថានតេជោសែន សាធារណៈការ និងដឹកជញ្ជូន នាថ្ងៃព្រហស្បតិ៍ ទី២៣ ខែមិថុនា ឆ្នាំ២០២២នេះ បានអញ្ជើញទទួលជួបពិភាក្សាការងារជាមួយលោកសាស្ត្រាចារ្យ Shim Chang-su មកពី Chung Ang University, សាធារណរដ្ឋកូរ៉េ ដើម្បីស្វែងរកឱកាសពង្រីកទំនាក់ទំនង និងភាពជាដៃគូបន្ថែមទៀត ក្នុងទិសដៅ ”ពង្រីកភាពជាដៃគូខាងក្រៅ ដើម្បីពង្រឹងខាងក្នុង”។ ក្នុងជំនួបនេះ ភាគីទាំងពីរ បានពិភាគ្សាគ្នាលើចំណុចសំខាន់ៗមួយចំនួន ដូចជា ការចែករំលែកចំណេះដឹង បទពិសោធន៍ បច្ចេកទេស និងឱកាសគម្រោងសិក្សាស្រាវជ្រាវរួមគ្នា ព្រមទាំងលទ្ធភាពបង្កើតកិច្ចសហប្រតិបត្តិផ្សេងៗ រវាងTSI និងសាកលវិទ្យាល័យ Chung Ang (Chung Ang University)។ បន្ទាប់ពីជំនួប ឯកឧត្តមនាយក បានអញ្ជើញលោកសាស្ត្រាចារ្យ ផ្តល់ការចែករំលែកបទពិសោធន៍ដល់មន្ត្រី សាស្ត្រាចារ្យ និងនិស្សិតវិទ្យាស្ថានតេជោសែន ស្តីពី Smart Construction Practices in Korea ដើម្បីឲ្យអ្នកចូលរួមបានសិក្សាពីបច្ចេកវិទ្យាថ្មីៗលើវិស័យសំណង់ផ្លូវថ្នល់ និងស្ពាន​ជាដើម៕