[Morningpostkh] - រដ្ឋាភិបាលបន្ថែមថវិកាប្រមាណ៦០លានដុល្លារអាមេរិកទៅលើគម្រោងផ្លូវលេខ១០
2022-06-23
ទៅកាន់ទំព័រចុះផ្សាយក្នុង Morningpostkh
ភ្នំពេញ ៖លោកស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនបានបញ្ជាក់ប្រាប់អ្នកសារព័ត៌មានក្នុងពេលលោកចុះត្រួតពិនិត្យការសាងសង់ផ្លូវជាតិលេខ១០តភ្ជាប់ពីបាត់ដំបង ឆ្លងកាត់ខេត្តពោធិ៍សាត់ទៅកាន់ខេត្តកោះកុងឱ្យដឹងថា រដ្ឋាភិបាលបានបន្ថែមថវិកាប្រមាណ៦០លានដុល្លារអាមេរិកបន្ថែមទៀតដើម្បីសាងសង់ផ្លូវជាតិលេខ១០នេះ ។
លោកបន្តថា ដំបូងឡើយគម្រោងផ្លូវនេះត្រូវប្រើប្រាស់ថវិកាប្រមាណ១៨០លានដុល្លារអាមេរិក ប៉ុន្តែដោយមើលឃើញថាបើសិនជាយើងធ្វើទៅតាមផែនការចាស់ នឹងអាចធ្វើឱ្យប៉ះពាល់ដល់បរិស្ថាន បាត់បង់ជម្រកសត្វព្រៃជាច្រើន ដូច្នេះរដ្ឋាភិបាលក៏បានសម្រេចបន្ថែមកញ្ចប់ថវិកាជិត៦០លានដុល្លារអាមេរិកបន្ថែមទៀត ដើម្បីសង់ស្ពានកំពស់ជិត៩០ម៉ែត្រ និងប្រវែងជាង៥០០ម៉ែត្រនិងបានក្លាយជាស្ពានខ្ពស់ជាងនៅកម្ពុជា ។
លោកបន្តទៀតថា តាមរយៈការសង់ស្ពានកំពស់ជិត៩០ម៉ែត្រនេះ បានសបញ្ជាក់ថា រាជរដ្ឋាភិបាលកម្ពុជាបានយកចិត្តទុកដាក់ខ្ពស់ណាស់ ទៅលើការអភិរក្សសត្វព្រៃ ការពារបរិស្ថាននៅតំបន់ភ្នំក្រវាញ ។ លោកថា« ពេលនេះយើងកំពុងសាងសង់ផ្លូវដែលជាផែនការចាស់ ហើយសម្រាប់ផែនការថ្មីដែលសង់ស្ពានខ្ពស់នោះ មិនទាន់ចាប់ផ្ដើមនៅឡើយទេ តែវានឹងលេចរូបរាងនៅពេលឆាប់ៗខាងមុខនេះហើយដែរ » ។
លោកបន្ថែម យើងក៏ស្នើសុំឱ្យក្រុមហ៊ុនសាងសង់ ពង្រីកទំហំស្ពានខ្ពស់ជាងគេនេះឱ្យធំ និងអាចឱ្យទេសចរឈប់នៅលើស្ពានដើម្បីផ្ដិតយករូបថតពីទេសភាពនៅតំបន់នោះដ៏ស្រស់ស្អាតផងដែរ ។ ផ្លូវលេខ១០នេះ សង្ឃឹមថានឹងបញ្ចប់នៅឆ្នាំ២០២៤ តែក៏អាចយឺតជាងផែនការគ្រោងទុកបន្តិច ដោយសារតែបានបន្ថែមនូវគម្រោងស្ពានខ្ពស់ជាងគេ ។
លោកបន្ថែមទៀតថា ក្រៅពីផ្លូវជាតិលេខ១០ រដ្ឋាភិបាលក៏បានសាងសង់ផ្លូវជាតិលេខ៥ ដែលផ្លូវនេះជាគម្រោងមួយធំ ត្រូវប្រើប្រាស់ថវិកាប្រមាណជិត៥០០លានដុល្លារអាមេរិក និងមានចំងាយ៣៦០គីឡូម៉ែត្រ ពីព្រែកក្ដាមទៅដល់ប៉ោយប៉ែត ហើយត្រូវចែកជាបីកំណាត់ ដោយកំណត់ចុងក្រោយពីបាត់ដំបងទៅសិរីសោភណ្ឌបានធ្វើចប់សប់គ្រប់ហើយ និងបានដាក់សម្ពោធឱ្យប្រើប្រាស់ជាផ្លូវការក្រោមអធិបតីភាពសម្ដេចតេជោហ៊ុនសែន ។
លោកច្រឹក សុខនីមប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជាបានលើកឡើងផងដែរថា ការសាងសង់ផ្លូវជាតិលេខ១០ពីពោធិ៍សាត់ទៅកាន់ខេត្តកោះកុង នឹងជំរុញឱ្យដីធ្លីនៅតំបន់នោះមានសន្ទុះតម្លៃ បន្ថែម ហើយក៏ជាការទាក់ទាញដល់ទេសចរនិងវិនិយោគិនអចលនទ្រព្យមួយកម្រិតទៀតផងដែរ ។ នៅពេលផ្លូវនេះធ្វើចប់ យើងរំពឹងថានឹងមានសកម្មភាពទិញលក់ដីធ្លីកើនឡើងមួយកម្រិតទៀត ៕
