ភ្នំពេញ៖ លោកជំទាវ ឥម នីថារ៉ា រដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តី ក្រសួងសាធារណការ និងដឹកជញ្ជូន នៅថ្ងៃពុធ ទី១៥ ខែមិថុនា ឆ្នាំ២០២២នេះ បានអញ្ជើញជាអធិបតីភាពក្នុងពិធីចុះហត្ថលេខាលើអនុស្សរណៈយោគយល់គ្នា រវាងវិទ្យាស្ថានតេជោសែន សាធារណការ និងដឹកជញ្ជូន និងសាកលវិទ្យាល័យ Chang’an University ដែលពិធីនេះ បានប្រព្រឹត្តទៅនៅបន្ទប់ប្រជុំវិទ្យាស្ថានតេជោសែន សាធារណការ និងដឹកជញ្ជូន ព្រមទាំងមានការចូលរួមពីអ្នកតំណាង និងក្រុមការងារនៃសាកលវិទ្យាល័យ Chang’an University និងមានការចូលពីសំណាក់ភ្ញៀវកិត្តិយស ដែលអញ្ជើញមកពីក្រុមហ៊ុន China Road and Bridge Corporation តាមប្រព័ន្ធអនឡាញ។ ជាមួយគ្នានោះ ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន និងជាតំណាងភាគីហត្ថលេខី នៃវិទ្យាស្ថានតេជោសែន សាធារណការ និងដឹកជញ្ជូនបានរាយការណ៍ដោយសង្ខេបជូនអង្គពិធីឱ្យបានជ្រាបអំពីដំណើរការរបស់វិទ្យាស្ថានតេជោសែន សាធារណការ និងដឹកជញ្ជូន ដែលត្រូវបានបង្កើតឡើងប្រកបដោយ ចក្ខុវិស័យវែងឆ្ងាយ ជំនឿយ៉ាងមុតមាំចំពោះកូនខ្មែរ និងការតាំងចិត្តខ្ពស់បំផុតរបស់ ឯកឧត្តមទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ក្នុងការបណ្តុះបណ្តាលកូនខ្មែរ ឱ្យមានជំនាញច្បាស់លាស់ ចំណេះដឹងទូលំទូលាយ និងមានសីលធម៌ អត្តចរិត ចរិយាសម្បត្តិត្រឹមត្រូវ ដើម្បីដោះស្រាយវិបត្តិកង្វះអ្នកជំនាញបច្ចេកទេស នាពេលបច្ចុប្បន្នផង និងបង្កើតឱ្យមានអ្នកបន្តវេនរបស់កម្ពុជាដ៏មានសក្តានុពល និងស្មារតីទទួលខុសត្រូវ លើវិស័យសាធារណការ និងដឹកជញ្ជូន នាពេលអនាគត រួមចំណែកអភិវឌ្ឍសេដ្ឋកិច្ច និងសង្គមជាតិ។ វិទ្យាស្ថានតេជោសែន មានការប្តេជ្ញាតាំងចិត្តខ្ពស់ ក្នុងការបណ្តុះបណ្តាលទៅលើគុណតម្លៃសំខាន់ចំនួន ៣ គឺ៖ ទី១. ជំនាញ ទី២. ចំណេះដឹង និងទី៣. សីលធម៌ ក្នុងឋានៈជាអ្នកបន្តវេនដ៏មានសក្តានុពលប្រកបដោយស្មារតីទទួលខុសត្រូវខ្ពស់ ចំពោះវាសនាអនាគតរបស់កម្ពុជាលើវិស័យហេដ្ឋារចនាសម្ព័ន្ធផ្លូវថ្នល់ និងដឹកជញ្ជូន។ លោក Fan Wen សាកលវិទ្យាធិការរងនៃសាកលវិទ្យាល័យ Chang’an បានចូលរួមមតិចាប់អារម្មណ៍ក្នុងអង្គពិធី និងបានលើកឡើងអំពីប្រវត្តិខ្លះៗរបស់សាកលវិទ្យាល័យឆាងអាន (Chang’an Univeristy) ដែលសាកលវិទ្យាល័យនេះ ជាសាកលវិទ្យាល័យដ៏ល្បីមួយនៅប្រទេសចិន ជាពិសេសផ្នែកវិស្វកម្មសំណង់ សាងសង់ផ្លូវ និងការគ្រប់គ្រងគមនាគមន៍សាធារណៈ។ លើសពីនេះទៅសាកលវិទ្យាល័យ Chang’an គឺជាសាកលវិទ្យាល័យដ៏សំខាន់មួយរបស់សាធារណរដ្ឋប្រជាមានិតចិន ដែលស្ថិតក្រោមការដឹកនាំផ្ទាល់របស់ក្រសួងអប់រំ។ សាកលវិទ្យាល័យឆាងអាន បានបណ្តុះបណ្តាលអ្នកជំនាញឆ្នើមជាច្រើនទាំងក្នុង និងក្រៅប្រទេស ជាពិសេសលើផ្នែកដឹកជញ្ជូនលើផ្លូវ Highway។ លោកជឿជាក់យ៉ាងមុតមំា និងជឿជាក់ថា ដោយមានការគាំទ្រពីប្រទេសភាគី និងក្រុមហ៊ុន China Road and Bridge Corporation (CRBC) ការបង្កើតនូវកម្មវិធីសិក្សារួមគ្នារវាងវិទ្យាស្ថានទាំងពីរនឹងប្រព្រឹត្តទៅដោយរលូន ហើយដើរតួយ៉ាងសំខាន់ក្នុងការសម្របសម្រួលរវាងភាគីនីមួយៗ ដើម្បីជួយដល់ការអភិវឌ្ឍដល់វិទ្យាស្ថានតែជោសែន សាធារណការនិងដឹកជញ្ជូន សាកលវិទ្យាល័យឆាងអាន និងក្រុមហ៊ុន CRBC ថែមទាំងអាចជួយដល់ការរឹតបន្តឹងចំណងមិត្តភាពរវាងប្រទេសចិន និងប្រទេសកម្ពុជាផងដែរ។ លោក Zhou Yong ប្រធានគ្រប់គ្រងទូទៅប្រចាំប្រទេសកម្ពុជា នៃក្រុមហ៊ុន China Road and Bridge Corporation (CRBC) បានផ្តល់មតិក្នុងអង្គពិធី និងបានចូលរួមអបអរសាទរដល់ការសម្រេចបាននូវអនុស្សរណៈ នៃការយោគយល់គ្នា រវាងវិទ្យាស្ថានតេជោសែន សាធារណការ និងដឹកជញ្ជូន និងសាកលវិទ្យាល័យ Chang’an University នាថ្ងៃនេះ។ លោក Zhou Yong បានលើកឡើងថាក្រុមហ៊ុន CRBC មានគោលបំណងលើកស្ទួយកិច្ចសហប្រតិបត្តិការរវាងប្រទេសចិន និងប្រទេសកម្ពុជាលើកិច្ចការងារកសាងហេដ្ឋារចនាសម្ព័ន្ធ។ លោកថែមទាំងបានលើកឡើងទៀតដែរថា ក្រុមហ៊ុន CRBC នឹងចូលរួមយ៉ាងស្វិតស្វាញក្នុងការអភិវឌ្ឍហេដ្ឋារចនាសម្ព័ន្ធ វិស័យអប់រំ និងវិស័យសាធារណការ និងដឹកជញ្ជូននៅក្នុងប្រទេសកម្ពុជាឱ្យកាន់តែមានភាពរីកចម្រើន។ លោកបណ្ឌិត Zhang Wei ព្រឹទ្ធបុរស សាលាអប់រំអន្តរជាតិ នៃសាកលវិទ្យាល័យ Chang’an ក៏បានចូលរួមជាមតិ និងបានចូលរួមអបអរសាទរដល់កិច្ចសហការគ្នារវាងស្ថាប័នទាំងពីរ។ លោកព្រមទាំងបានលើកឡើងថា សាកលវិទ្យាល័យឆាងអាន (Chang’an University) បានត្រៀមខ្លួនរួចជាស្រេចក្នុងការជួយសម្របសម្រួលវិទ្យាស្ថានតេជោសែន សាធារណការ និងដឹកជញ្ជូន ក្នុងកិច្ចការងារផ្សេងៗ ដោយមានការគាំទ្រពីក្រុមហ៊ុន CRBC ក្នុងការអនុវត្តន៍កិច្ចការងារទាំងនោះឱ្យប្រព្រឹត្តិទៅដោយជោគជ័យ។ លោកសង្ឃឹមថាកិច្ចសហប្រតិបត្តិការនេះនឹងអាចជាប្រយោជន៍ដល់ប្រជាជននៅក្នុងប្រទេសទាំងសងខាង។ ថ្លែងសំណេះសំណាលក្នុងអង្គពិធី លោកជំទាវ ឥម នីថារ៉ា រដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្រ្តី ក្រសួងសាធារណការ និងដឹកជញ្ជូន បានមានប្រសាសន៍ថា អនុស្សរណៈនៃការយោគយល់គ្នានេះ គឺជាធាតុសំខាន់បំផុតមួយ ដែលរួមចំណែកដល់ការកសាងធនធាន ប្រកបដោយប្រសិទ្ធភាពប្រសិទ្ធភាពរវាងវិទ្យាស្ថានតេជោសែន សាធារណការ និងដឹកជញ្ជូន និងសាកលវិទ្យាល័យឆាងអាន (Chang’an University) ដើម្បីធានាគុណភាពនៃការអប់រំសមស្របទៅនឹងតម្រូវការទីផ្សារ និងផ្តល់ជំនួយបច្ចេកទេស ដែលជាអត្ថប្រយោជន៍ដ៏ធំធេងសម្រាប់សិស្សានុសិស្ស ដើម្បីពង្រីកឱកាសការងារ ជំនាញ ចំណេះដឹង ឱ្យកាន់តែទូលំទូលាយ ព្រមទាំងផ្តល់ប្រយោជន៍ដល់គ្នាទៅវិញទៅមករវាងវិទ្យាស្ថានទាំងពីរ។ គួរបញ្ជាក់ផងដែរថា ពិធីចុះអនុស្សរណៈយោគយល់គ្នា រវាងវិទ្យាស្ថានតេជោសែន សាធារណការ និងដឹកជញ្ជូន និងសាកលវិទ្យាល័យ Chang’an University បានឯកភាពជាគោលការណ៍ដើម្បីផ្តល់នូវកិច្ចសហប្រតិបត្តិការសម្រាប់ការអភិវឌ្ឍការអប់រំ និងការស្រាវជ្រាវក្នុងសមត្ថកិច្ចរបស់ភាគីនីមួយៗ ដូចជា៖ -សហការក្នុងការផ្តល់ការបណ្តុះបណ្តាលលើជំនាញបច្ចេកទេសផ្សេងៗ។ -ផ្លាស់ប្តូរមន្ត្រី សាស្ត្រាចារ្យ អ្នកស្រាវជ្រាវ និងបុគ្គលិក។ -សហការលើការស្រាវជ្រាវ និងការអនុវត្តគម្រោងរួមគ្នាក្នុងវិស័យពាក់ព័ន្ធ។ -សហការក្នុងការផ្តល់ជំនួយបច្ចេកទេសលើការអប់រំ និងកម្មវិធីបណ្តុះបណ្តាលផ្សេងៗ។ -ចូលរួមសន្និសីទ សិក្ខាសាលា កម្មវិធីបណ្តុះបណ្តាល និងព្រឹត្តិការណ៍ផ្សេងៗទៀត។ -ផ្លាស់ប្តូរព័ត៌មាន និងឧបករណ៍បច្ចេកទេសផ្សេងៗ។ -ប្រើប្រាស់ឧបករណ៍ ឧបករណ៍ សម្ភារៈសំណង់ និងធនធានរួមគ្នា។ -ផ្តល់ឱកាសដល់និស្សិតដើម្បីផ្លាស់ប្តូរបទពិសោធន៍សិក្សា។ -ផ្តល់ជូនវិញ្ញាបនបត្រនៃការបណ្តុះបណ្តាលបច្ចេកទេស និងភាពពាក់ព័ន្ធ។ -ជំរុញអនុវត្តសកម្មភាពផ្សេងៗទៀត ស្របតាមស្មារតីនៃអនុស្សរណៈ នៃការយោគយល់គ្នានេះ៕