គម្រោងសាងសង់ចំណតកំពង់ផែកុងតឺន័រថ្មីទាំង៣ជំហាននៅកំពង់ផែស្វយ័តក្រុងព្រះសីហនុ នឹងធ្វើឱ្យវិស័យដឹកជញ្ជូនតាមផ្លូវសមុទ្ររបស់កម្ពុជាកាន់តែរីក ចម្រើន ខណៈដែលគម្រោងជំហានទី១ នឹងចាប់ផ្តើមសាងសង់នៅចុងឆ្នាំ២០២២នេះហើយ ។ លោក ថៃ ឬទ្ធី អគ្គនាយករងកំពង់ផែស្វយ័តក្រុងព្រះសីហនុ បានមានប្រសាសន៍ថា គម្រោងសាងសង់ចំណតផែកុងតឺន័រថ្មីជំហានទី១ នឹងចាប់ផ្តើមសាងសង់នៅចុងឆ្នាំ២០២២នេះ ហើយគ្រោងបញ្ចប់ការសាងសង់នៅចុងឆ្នាំ២០២៥ ដែលមានប្រវែង៣៥០ម៉ែត្រនិងជម្រៅទឹក១៤.៥ម៉ែត្រ អាចអនុញ្ញាតឱ្យកប៉ាល់ដែលមានសមត្ថភាពផ្ទុកកុងតឺន័ររហូតដល់ជាង៤ពាន់កុងតឺន័រចូលចតបាន ដោយទទួលបានប្រាក់កម្ចីជាង២០០លានដុល្លារពីរដ្ឋាភិបាលជប៉ុន ដែលនឹងធ្វើឱ្យតម្លៃដឹកជញ្ជូនទាបជាងមុន ដែលតាមការប៉ាន់ស្មានតម្លៃដឹកជញ្ជូនអាចចុះជាង២០០ដុល្លារក្នុងមួយកុងតឺន័រ ។ លោកបានបន្តថា សម្រាប់ជំហានទី២ មានប្រវែង៤០០ម៉ែត្រ និងជម្រៅទឹក ១៦.៥០ ម៉ែត្រ ។ សមត្ថភាពចំណតផែក្នុងជំហានទី២នេះ គឺអាចអនុញ្ញាតឱ្យនាវាចូលចតបានដែលផ្ទុក ១០,០០០កុងតឺន័រ ហើយការសាងសង់គម្រោង នេះនឹងចាប់ផ្តើមនៅក្នុងឆ្នាំ២០២៥ ហើយនឹងបញ្ចប់ដាក់ឱ្យដំណើរការក្នុងឆ្នាំ ២០២៨ ។ចំណែក ជំហានទី៣ មានប្រវែង៤៣០ ម៉ែត្រ និងជម្រៅទឹក១៧.៥០ ម៉ែត្រ គឺអាចអនុញ្ញាតឱ្យនាវាចូលចតបានដែលផ្ទុកកុងតឺន័រចំនួន ១៥,០០០កុងតឺន័រ ហើយការសាងសង់គម្រោង នេះនឹងចាប់ផ្តើមនៅក្នុងឆ្នាំ២០២៦ ហើយនឹងបញ្ចប់ដាក់ឱ្យដំណើរការក្នុងឆ្នាំ២០៣០ ។ លោកបានបន្ថែមថា នៅដែលគម្រោងទាំង៣ជំហាននេះសម្រេចបានតាមការគ្រោងទុក គឺនឹងជួយឱ្យវិស័យដឹកជញ្ជូននៅកម្ពុជាកាន់តែល្អប្រសើរ ជាពិសេសធានាដល់ការចូលចតនាវាកុងតឺន័រខ្នាតធំៗ ប្រចាំតំបន់អាស៊ី-ប៉ាស៊ីហ្វិក និងឆ្លើយតបទៅនឹងការកើនឡើងនៃបរិមាណកុងតឺន័រ ឆ្លងកាត់កំពង់ផែមួយនេះក្នុងពេលបច្ចុប្បន្ននិងទៅអនាគត ។ សំឡេង ៖ « បើយើងបានផែជម្រៅទឹក១៧.៥០ ម៉ែត្រថែមទៀត គឺយើងជាកំពង់ផែទឹកជ្រៅនៅក្នុងតំបន់ បានន័យថា សឹងតែដូចជាផែរបស់ប្រទេសថៃ សឹងតែជាផែទឹកជ្រៅរបស់ប្រទេសវៀតណាម ហើយនៅពេលដែលយើងបានផែទឹកជ្រៅនេះហើយ បានន័យថា យើងអាចធ្វើសមាហរណកម្មនៃការដឹកជញ្ជូនតាមរយៈនាវានេះ ទៅបណ្ដាប្រទេសទាំងអស់នៅលើពិភពលោក បានន័យថា នាវាអាចចូលនៅផែសឹងហ្គាពួរ អាចចូលនៅផែក្នុងប្រទេសថៃ អាចចូលផែរបស់ប្រទេសវៀតណាម អាចចូលផែចិន ដូចជា ផែស៊ាងហៃ អ៊ីចឹងបានន័យថា ការធ្វើនាវាចរទាំងអស់នៅក្នុងតំបន់ក៏ដូចភ្ជាប់ទៅនឹងសហរដ្ឋអាមេរិក ក៏ដូចជាសហគមន៍អឺរ៉ុប លែងជាបញ្ហាជម្រៅទឹកសម្រាប់ការចេញចូលនាវាទៀតហើយ ។ ហើយជម្រៅទឹកនេះគឺសំខាន់ណាស់សម្រាប់កម្ពុជាជាសមាហរណកម្មការចេញចូលនាវាចរណ៍ ហើយសំខាន់តម្លៃនៃការដឹកជញ្ជូនតាមនាវានោះនឹងមានការធ្លាក់ចុះ ហើយយើងសង្ឃឹមថា ការដឹកជញ្ជូនតាមនាវាគឺអាចនឹងធ្លាក់ថ្លៃក្នុងរង្វង់ប្រហែល២០០ដុល្លារក្នុង១កុងតឺន័រ » ។ សូមបញ្ជាក់ថា បច្ចុប្បន្ននេះកំពង់ផែស្វយ័តក្រុងព្រះសីហនុ អាចអនុញ្ញាតឱ្យនាវាក្នុងតំបន់អាស៊ីប៉ាស៊ីហ្វិក ចូលបានតែប្រមាណតែ១៨%ប៉ុណ្ណោះ មានន័យថា ក្នុងចំណោម១០០កប៉ាល់អាចចូលចតបានតែ១៨ ឬ១៩កប៉ាល់ និងអនុញ្ញាតឱ្យនាវាដែលផ្ទុកកុងតឺន័របានតែ១៥០០ប៉ុណ្ណោះ ៕