ភ្នំពេញ ៖ គម្រោង​ស្ថាបនាផ្លូវ​ក្រវ៉ាត់ក្រុងទី៣​រហូតមកដល់បច្ចុប្បន្ន​នេះ​សម្រេច​បាននូវ​ការងារ​ប្រមាណ​៧៣,៧០ភាគរយ ហើយ​ក្រុម​ការងារ​ក៏កំពុងពន្លឿន​ការ​សាងសង់​ឱ្យបានបញ្ចប់នៅពេលឆាប់ៗនេះផងដែរ ។ នេះបើតាមសេចក្ដី​ប្រ​កាស​ព័ត៌​មាន​របស់​ក្រសួង​​សា​ធារណការ​និងដឹកជញ្ជូន​នៅថ្ងៃទី​២៦ ឧសភា ២០២​២​កន្លងទៅនេះ ។ លោក​លឹម ស៊ីដេនីន​ រដ្ឋលេខាធិការ​ក្រសួង​សាធារណការ​និងដឹកជញ្ជូន​​បានដឹកនាំក្រុម​ការងារ​បច្ចេក​ទេស​ដើម្បី​ចុះពិនិត្យ​លក្ខណៈ​បច្ចេកទេស​និងតាមដានវឌ្ឍនភាព​ការងារ​សាងសង់​ផ្លូវ​ក្រវ៉ាត់ក្រុង​ទី​៣ និងពិនិត្យ​ការងារ​គ​ម្រោ​ង​​ដែលកំពុង​សាងសង់ ។ ការចុះត្រួតពិនិត្យនេះ ក៏ដើម្បីផ្តល់ធាតុចូលដល់ក្រុមការងាររៀបចំអភិវឌ្ឍមុខងារត្រួតពិនិត្យគុណភាពផ្លូវ (Road Care Supervision) បន្ថែមលើកម្មវិធីថែទាំផ្លូវ (Road Care Mobile App) ដែ​លកំពុ​ង​ប្រើប្រា​ស់​នាពេ​លប​​ច្ចុ​ប្បន្ន។ ក្នុងដំណើរបេសកកម្មនេះ ក្រុមការងារអភិវឌ្ឍមុខងារត្រួតពិនិត្យគុណភាពផ្លូវ (Road Care Supervision) នៃអគ្គ​នា​យ​​ក​ដ្ឋានបច្ចេកទេស និងនាយកដ្ឋានព័ត៌មានវិទ្យា និងទំនាក់ទំនងសាធារណៈ បានបានសិក្សា​ស្វែ​ង​យល់​ទៅ​លើ​លំ​ហូរការងារបច្ចេកទេស ដែលកំពុងអនុវត្តលើស្រទាប់តួផ្លូវ គ្រឹះរង គ្រឹះសំខាន់ Prime Coat កម្រាលបេតុង និង​សំ​ណង់​សិល្បការ្យមួយចំនួនទៀតផងដែរ។ ក្រុមការងារក៏បានស្វែងយល់លើការងារពិសោធន៍មួយចំនួនដែលកំពុងអនុវត្តជាក់ស្តែងក្នុងការដ្ឋានដែលក្នុងនោះរួមមាន៖ ការធ្វើពិសោធ Benkelman Beam Test ការចាក់សំណាកគំរូបេតុងសង្កត់ ការពិនិត្យលើ​កម្រាស់​បេ​តុង ការ​កាត់​តំ​ណ​បេតុង និងការថែទាំបេតុងក្រោយសាងសង់រួចជាដើម។ យោងតាមរបាយការណ៍អគ្គនាយកដ្ឋានបច្ចេកទេស នៃក្រសួងសាធារណការ និងដឹកជញ្ជូន បានឱ្យដឹង​​ថា​វឌ្ឍ​​ន​ភាពការងារនៃគម្រោងស្ថាបនាផ្លូវក្រវាត់ក្រុងទី៣ គិតរហូតមកទល់ពេលនេះ សម្រេចបាន ៧៣,៧​០%​ ហើយ នៅ​​សល់តែការងារដូរទំហំការងារស្ពាននៅប្រឡាយ៩៤ និងប្រឡាយ៩៦ ការងា​រស្ពា​ន​រំល​​ង​ត្រង់​ផ្លូវ​ជាតិ​លេខ៤ ការ​​ងារ​ផ្លូវគីឡូម៉ែត្រ ០+០០ ដល់ គីឡូម៉ែត្រ ៤+៩០០ ជាដើម ហើ​យគម្រោ​ងនេះ​គ្រោង​នឹង​បញ្ចប់​ការស្ថាប​នា​ជា​ស្ថាពរ​នៅ​មុនខែកញ្ញា ឆ្នាំ២០២៣ខាងមុខ ៕