[Rasmei Kampuchea Daily News] - ទីប្រឹក្សាសម្ដេចតេជោហ៊ុន សែន ចុះពិនិត្យការកែលម្អផ្លូវ ១ខ្សែ ប្រវែង ២.៥០០ ម៉ែត្រ នៅសង្កាត់ច្រកម្ទេស ក្រុងបាវិត
ដោយៈ វ៉ៃកូ / ស្វាយរៀងៈ លោកឧត្តមសេនីយ៍ឯក យិន ចាន់ធួន ទីប្រឹក្សាសម្ដេចតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា និងជាមេបញ្ជាការកងអន្តរាគមន៍ ៥៩៤ និងលោក លឹម សៀងហេង អភិបាលក្រុងបាវិត ព្រមទាំងក្រុមការងារជាច្រើននាក់ នៅព្រឹកថ្ងៃទី១៨ ខែឧសភា ឆ្នាំ២០២២ នេះ បានអញ្ជើញចុះដឹកនាំយកគ្រឿងចក្រ ចាក់ថ្មមិច លើផ្លូវ១ខ្សែ ប្រវែង ២.៥០០ ម៉ែត្រ ដើម្បីសម្រួលដល់ការធ្វើដំណើរ របស់ប្រជាពលរដ្ឋនៅមូលដ្ឋាន។
លោក ហួត សាម៉ៃ ចៅសង្កាត់ច្រកម្ទេស ក្រុងបាវិត បានឲ្យដឹងថាៈ ដោយមើលឃើញនូវ ការលំបាករបស់ប្រជាពលរដ្ឋ នៅមូលដ្ឋាន ក្នុងការធ្វើដំណើរដឹកកសិផល ប្រកបមុខរបរ ប្រចាំថ្ងៃ និងការធ្វើដំណើររបស់ កម្មកររោងចក្រ សិស្សានុសិស្ស លោកឧត្តមសេនីយ៍ឯក យិន ចាន់ធួន មេបញ្ជាការកងអន្តរាគមន៍៥៩៤ បានឧបត្ថម្ភថ្មមិច វែង ២.៥០០ ម៉ែត្រ ដើម្បីជួសជុលកែលម្អឡើងវិញ ក្នុងនោះលោក លឹម សៀងហេង អភិបាលក្រុងបាវិត ក៏បានយកគ្រឿងចក្រ មកឈូសឆាយ សម្រួលដល់ការធ្វើដំណើរ របស់បងប្អូនប្រជាពលរដ្ឋ នៅមូលដ្ឋាន ឲ្យកាន់តែមានភាពងាយស្រួល។
លោកចៅសង្កាត់ បានបន្តថាៈ ផ្លូវមួយខ្សែនេះ មិនត្រឹមតែសម្រួលដល់ ការធ្វើដំណើរ នៅក្នុងសង្កាត់ច្រកម្ទេស តែមួយប៉ុណ្ណោះទេ ប៉ុន្តែវាអាចសម្រួលដល់ ការធ្វើដំណើររបស់ ប្រជាពលរដ្ឋ ចំនួន ៣ ឃុំ សង្កាត់ គឺសង្កាត់ច្រកម្ទេស ឃុំព្រៃតាអី ឃុំពពែត ស្រុកស្វាយទាប ខេត្តស្វាយរៀង ហើយក្នុងនាមក្រុមប្រឹក្សាសង្កាត់ អាជ្ញាធរដែនដី សូមថ្លែងអំណរគុណ ចំពោះលោកឧត្តមសេនីយ៍ឯក យិន ចាន់ធួន និងលោកស្រី ព្រមទាំងលោក លឹម សៀងហេង អភិបាលក្រុងបាវិត ដែលបានខ្វល់ខ្វាយ អំពីសុខទុក្ខរបស់ ប្រជាពលរដ្ឋនៅមូលដ្ឋានហើយបានសម្រួល ដល់ការធ្វើដំណើរ របស់ប្រជាពលរដ្ឋ ទាំងនេះជាការយកចិត្តទុកដាក់ខ្ពស់ ពីអាជ្ញាធរដែនដី ក៏ដូចជា ថ្នាក់ដឹក នាំ នៃគណបក្សប្រជាជនកម្ពុជា តែងតែយកចិត្តទុកដាក់ អំពីសុខទុក្ខរបស់ប្រជាពលរដ្ឋ គ្រប់ពេលវេលា។
លោក លឹម សៀងហេង អភិបាលក្រុងបាវិត បានឲ្យដឹងដែរថាៈ សម្រាប់ការជួសជុលផ្លូវ កែលម្អ លើផ្លូវនេះ លោកសុំការយោគយល់ ពីប្រជាពលរដ្ឋដែលរស់នៅ អមសងខាងផ្លូវ សូមជួយសម្រួលដល់អាជ្ញាធរ ក្នុងការជួសជុលឡើងវិញផងដែរ ហើយសូមថ្លែងអំណរ គុណដល់លោកឧត្តមសេនីយ៍ឯក យិន ចាន់ធួន និងលោកស្រី ដែលបានជួយឧបត្ថម្ភ ទាំងថវិកា ក្នុងការជួសជុល កែលម្អឡើងវិញ ជាពិសេសសូមមានការយោគយល់ ពីពលរដ្ឋដែលនាំឱ្យមាន ការហុយធូលី ចូលទៅលើផ្ទះសម្បែងជាដើម។
លោកឧត្តមសេនីយ៍ឯក យិន ចាន់ធួន បានថ្លែងថាៈ ការអភិវឌ្ឍប្រទេស អាចដំណើរការ ទៅបាន ដោយសារប្រទេសជាតិយើង មានសន្តិភាព ហើយសន្តិភាពនេះ គឺមានតម្លៃ ដែលមិនអាចកាត់ថ្លៃបានឡើយ ដូច្នេះប្រជាពលរដ្ឋគ្រប់រូប ត្រូវតែរួមគ្នាថែរក្សា ការពារ សន្តិភាពនេះ ឲ្យគង់វង្សយូរអង្វែង។
លោកឧត្តមេសនីយ៍ឯក បានអំពាវនាវដល់បងប្អូនប្រជាពលរដ្ឋ នៅពេលបានផ្លូវល្អហើយ នោះ ត្រូវចេះថែរក្សា ឱ្យបានគង់វង្ស យូរអង្វែង សម្រាប់ប្រើប្រាស់ ហើយក៏សូមឲ្យបងប្អូន យើង ត្រូវចូលរួមគោរពច្បាប់ចរាចរណ៍ទាំងអស់គ្នា ជាពិសេសគឺ ចូលរួមអនុវត្តគោល នយោបាយ ភូមិឃុំ មានសុវត្ថិភាព ឱ្យមានប្រសិទ្ធភាពខ្ពស់ ៕ /V
