លោកស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានលើកឡើងថាប្រសិនបើកម្ពុជាមានស្ថានីយបញ្ចូលថាមពលយានយន្តអគ្គីសនីកាន់តែច្រើន នោះនឹងមានការប្រើប្រាស់យានយន្តអគ្គីសនីកាន់តែច្រើនដែរនាពេលអនាគត។ ការប្រើប្រាស់រថយន្តអគ្គីសនី គឺអាចជួយកាត់បន្ថយបានការបំពុលផ្សែងកខ្វក់ទៅបរិស្ថាន។ នេះបើតាមការបញ្ជាក់របស់លោកក្នុងពិធីបើកឱ្យដំណើរការជាផ្លូវការមណ្ឌលផ្តល់សេវាសាធារណៈក្រសួង និងស្ថានីយបញ្ចូលថាមពលយានយន្តអគ្គីសនីនៅខេត្តព្រះសីហនុ នាថ្ងៃទី២៧ ខែមេសា ឆ្នាំ២០២២។ ក្នុងឱកាសនោះ លោករដ្ឋមន្រ្តីក្រសួងសាធារណការ ក៏បានលើកឡើងដែរថារថយន្តអគ្គីសនីពេលសាកភ្លើងម្តងគឺតម្លៃប្រមាណជា១,៣០០រៀលក្នុងមួយគីឡូវ៉ាត់ ដូច្នេះក្នុងចម្ងាយ១០០គីឡូម៉ែត្រ គឺត្រូវចំណាយថ្លៃសាកភ្លើងត្រឹមតែ៣-៤ដុល្លារតែប៉ុណ្ណោះ។  គួរជម្រាបជូនថា ការសម្ពោធដាក់ឱ្យប្រើប្រាស់ជាផ្លូវការនូវស្ថានីយបញ្ចូលថាមពលយានយន្តអគ្គិសនីនៅខេត្តព្រះសីហនុនេះ គឺជាស្ថានីយទីពីរក្នុងចំណោមស្ថានីយចំនួនបួន ដែលជាជំនួយរបស់អង្គការUNDP ផ្តល់ឱ្យក្រសួងសាធារណការ និងដឹកជញ្ជូន ដើម្បីជំរុញការប្រើប្រាស់យានយន្តអគ្គិសនីក្នុងប្រទេសកម្ពុជា។ គិតត្រឹម៣ខែ នៃឆ្នាំ២០២២នេះ ចំនួនរថយន្តប្រើប្រាស់អគ្គីសនីនៅក្នុងប្រទេសកម្ពុជាគឺមានការកើនឡើង៧០០ភាគរយ បើធៀបទៅនឹងរយៈពេលដូចគ្នាកាលពីឆ្នាំ២០២១៕ ដោយ៖ ម៉ៅ សុភ័ក្រ្តា