កោះកុង៖ ប្រជាពលរដ្ឋរស់នៅក្នុងមូលដ្ឋានស្រុកមណ្ឌលសីមា ខេត្តកោះកុង បានសម្តែងការពេញចិត្តពេញថ្លើមយ៉ាងខ្លាំង បន្ទាប់ពីដឹងដំណឹងថាសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ប្រកាសផ្តល់ការសាងសង់ស្ពានបេតុងឆ្ពោះទៅរមណីយដ្ឋានទេសចរណ៍ឆ្នេរសមុទ្រប៉ាក់ខ្លង ហៅថា ឆ្នេរកោះយ៉។ ពលរដ្ឋខេត្តកោះកុង រួមទាំងអ្នកដំណើរទេសចរណ៍ នៅថ្ងៃទី ២២ខែមេសា ឆ្នាំ២០២២នេះ បង្ហាញក្តីសប្បាយរីករាយជាខ្លាំង គ្រាដឹងព័ត៌មានថា សម្តេចតេជោ ហ៊ុន សែន នាយករដ្ឋមន្រ្តី ចាត់ឱ្យអ្នកឧកញ៉ា លី យ៉ុងផាត់ ជាអ្នកទទួលបន្ទុកសាងសង់ស្ពានបេតុងប្រវែងជាង ១០០ម៉ែត្រជំនួសស្ពានដែកដែលកំពុងមានសភាពចាស់ទ្រុឌទ្រោមខ្លាំងហើយ។ ដូច្នេះពួកគាត់ក៏ថ្លែងអំណអរគុណយ៉ាងជ្រាលជ្រៅបំផុតជូនចំពោះសម្តេចតេជោបានយកចិត្តទុកដាក់ពីទុក្ខលំបាករបស់ពលរដ្ឋ។ បើតាមប្រជាពលរដ្ឋខាងលើ បន្ថែមថា ពួកគាត់តែងសង្កេតឃើញមានករណីគ្រោះថ្នាក់ចរាចរណ៍រអិលដួលក្បាលមនុស្សស្លាប់ និងរបួសជាហូរហែរលើស្ពានដែកនេះ អំឡុងពេលមានភ្លៀងធ្លាក់ម្តងៗ តែនៅពេលដែលស្ពាននេះកសាងជាបេតុងថ្មីស្អាតហើយនោះ រាល់ការធ្វើដំណើរទៅមកពីរង្វង់មូលទីរួមស្រុកទៅរមណីយដ្ឋានទេសចរណ៍ឆ្នេរសមុទ្រប៉ាក់ខ្លង ហៅថា ឆ្នេរកោះយ៉ នឹងមានសុវត្ថិភាពចម្បងជាងពេលនេះ ឯការដឹកជញ្ចូនផលិតផលជលផលនឹងបានលឿន រីឯអត្រាគ្រោះថ្នាក់ក៏កាត់បន្ថយទៅតាមនោះដែរ។ លោក ប្រាក់ វិចិត្រ អភិបាលស្រុកមណ្ឌលសីមា លោកក៏ត្រេកអរជាមួយនឹងប្រជាពលរដ្ឋមូលដ្ឋាន ព្រមទាំងភ្ញៀវទេសចរផងដែរ ដោយលោកចាត់ទុកថា ការផ្តល់ស្ពានបេតុងថ្មីប្រវែងជាង ១០០ម៉ែត្រ និងទទឹង៩ម៉ែត្រកន្លះជំនួសស្ពានដែកចាស់ជាកាដូរដ៏វិសេសវិសាលមួយក្រោយពិធីបុណ្យចូលឆ្នាំខ្មែរ ប្រពៃណីជាតិ ទើបតែបញ្ចប់ថ្មីៗនេះ។ លោកអភិបាលស្រុកមណ្ឌលសីមា រំលេចបង្ហាញដែរថា ក្រោមការដឹកនាំប្រទេសជាតិសព្វថ្ងៃនេះរបស់សម្តេចតេជោ ហ៊ុន សែន នាយករដ្ឋមន្រ្តី គឺប្រទេសជាតិមានការអភិវឌ្ឍជាលំដាប់ស្ទើរតែគ្រប់រាជធានីខេត្តទាំងអស់ ព្រោះកត្តាសុខសន្តិភាព និងនយោបាយឈ្នះឈ្នះដាក់ចេញដោយសម្តេចប្រមុខរាជរដ្ឋាភិបាល។ ពេលមានស្ពានបេតុងស្អាតល្អហើយ លោកស្នើសុំដល់ប្រជាពលរដ្ឋ និងអ្នកប្រើប្រាស់ផ្លូវថ្នល់ទាំងអស់ ចូលរួមគោរពច្បាប់ចរាចរណ៍ និងទុកសំរាមឱ្យមានសណ្តាប់ធ្នាប់រៀបរយល្អ ដើម្បីបង្កើនសោភ័ណភាពបរិស្ថានអនាម័យតាមទីសាធារណៈ។ ទោះយ៉ាងណា អាជ្ញាធរស្រុកមណ្ឌលសីមា នៅមិនទាន់ព័ត៌មានច្បាស់លាស់ទេថា គម្រោងសាងសង់ស្ពានបេតុងខាងលើនេះ នឹងអនុវត្តពេលណា ចំណាយថវិកាអស់ប៉ុន្មាន ហើយបញ្ចប់ពេលណានៅឡើយទេលុះត្រាមានការជួបប្រជុំពិភាក្សាលម្អិតរវាងអ្នកឧកញ៉ា លី យ៉ុងផាត់ រដ្ឋបាលខេត្តកោះកុង មន្ទីរជំនាញ និងរដ្ឋបាលស្រុកជាមុនសិន ទើបអាចផ្តល់ព័ត៌មានបាននៅពេលក្រោយ៕ អត្តបទ៖ តាំង សុន្នី