ភ្នំពេញ៖ នាពិធីសម្ពោធដាក់ឲ្យប្រើប្រាស់ជាផ្លូវការនូវផ្លូវជាតិលេខ២១ពីក្រុងតាខ្មៅ ដល់ស្រុកជ្រៃធំ ខេត្តកណ្តាល ប្រវែងជិត៦៤គីឡូ នាព្រឹកថ្ងៃទី២៣ ខែមីនា សម្តេច ហ៊ុន សែន នាយករដ្ឋមន្ត្រីកម្ពុជាបានប្រាប់ដល់ពលរដ្ឋថា នៅពេលជួបគ្រោះថ្នាក់ចរាចរណ៍ សូមកុំបន្ទោសក្រសួងសាធារណការ និងដឹកជញ្ជូនដែលជាធ្វើផ្លូវឲ្យសោះ។ សម្តេចតេជោបានសម្តែងការហួសចិត្តចំពោះស្តី្រម្នាក់ ក្នុងអំឡុងពេលសម្តេចចុះទៅត្រួតពិនិត្យនៅក្រាំងយៅ បានទាមទារថ្លៃសំណងពីសម្តេចថ្លៃការបុកជ្រូកដែលធ្វើឲ្យជ្រូករបស់ស្ត្រីនោះងាប់។ កាលនោះសម្តេចបានហៅអង្គរក្ខមកសួរនាំ ទើបដឹងថា​ឡានដែលបានបុកជ្រូកស្ត្រីនោះងាប់ គឺជាឡានដឹកស្រូវ មិនមែនជាឡានរបស់អង្គរក្ខសរបស់សម្តេចឡើយ។ តែយ៉ាងណាសម្តេចនៅគ្រានោះក៏បានផ្តល់ថវិកាមួយចំនួនទៅស្រ្តីនោះផងដែរ។ សម្តេចបាននិយាយដោយដកស្រង់សម្តីរបស់ស្ត្រីរូបនោះទាំងអស់សំណើចថា៖​«ឡានពីណាក៏ដូចជាឡានពីណាដែរ មកពីធ្វើផ្លូវល្អបានឡានបុកជ្រូក។ ស្គាល់ហើយ​ គឺអត់មានអ្នកណាធ្វើផ្លូវទេ ឲ្យតែគ្រោះថ្នាក់ចរាចរណ៍​ទារលុយឯកឧត្តម ស៊ុន ចាន់ថុល»។ បើតាមសម្តេច កាលពីថ្ងៃទី២២ ខែមីនា ឆ្នាំ២០២២ គ្រោះថ្នាក់ចរាចរណ៍បានកើតឡើងចំនួន៩ករណី ដែលបណ្តាលឲ្យមនុស្សស្លាប់ចំនួន៦នាក់ និងរងរបួសធ្ងន់ស្រាលចំនួន៨នាក់។ «បើម្ង៉ៃៗមានអ្នកស្លាប់គ្រោះថ្នាក់ចរាណ៍ចំនួន៥នាក់ ជាឧទាហរណ៍ ១ខែ នឹងមានអ្នកស្លាប់ចំនួន៥០នាក់។ នេះជាបញ្ហាសង្គមយ៉ាងធ្ងន់ធ្ងរ។ បើស្លាប់ចំមេគ្រួសារ គឺអ្នកណាចិញ្ចីមកូន និងប្រពន្ធ?»។ នេះជាការលើកឡើងរបស់សម្តេចដែលអំពាវនាវឲ្យពលរដ្ឋរួមគ្នាគោរពច្បាប់ចរាចរណ៍ដើម្បីជៀសផុតពីគ្រោះថ្នាក់ចរាចរណ៍៕