(កំពត)៖ លោក ម៉ៅ ធនិន អភិបាលខេត្តកំពត បានដឹកនាំមន្ត្រីជំនាញ អាជ្ញាធរពាក់ព័ន្ធ និងមានការចូលរួមពីលោក ជឹង ផល្លា ប្រធានក្រុមប្រឹក្សាខេត្តកំពត ព្រមទាំងសមាជិក សមាជិកាក្រុមប្រឹក្សាខេត្ត បានចុះបើកការដ្ឋាន សាងសង់ផ្លូវក្រាលកៅស៊ូ១ខ្សែ ប្រវែង២០គីឡូម៉ែត្រ និងផ្លូវបេតុង១ខ្សែ ប្រវែង៤គីឡូម៉ែត្រ នៅស្រុកដងទង់ ដែលជាអំណោយរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។ ផ្លូវទាំងពីរខ្សែរខាងលើ ត្រូវបានបើកការដ្ឋានសាងសង់ នៅថ្ងៃទី២៨ ខែកុម្ភៈ ឆ្នាំ២០២២។ ក្នុងឱកាសបើកការដ្ឋានសាងសង់ផ្លូវនេះ លោកបណ្ឌិត ម៉ៅ ធនិន បានពាំនាំមកនូវការផ្តាំផ្ញើសាកសួរសុខទុក្ខ ពីសំណាក់សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់បងប្អូនប្រជាពលរដ្ឋ ស្រុកដងទង់ទាំងអស់ដោយក្តីនឹករឭកបំផុត។ លោកអភិបាលខេត្តកំពត បានបញ្ជាក់ថា ផ្លូវក្រាលកៅស៊ូមួយខ្សែ ប្រវែង ២០គីឡូម៉ែត្រ និងផ្លូវបេតុងមួយខ្សែទៀតមានប្រវែង ៤គីឡូម៉ែត្រ ដែលមានប្រជាជនប្រើប្រាស់ផ្ទាល់ ចំនួន៤ឃុំ ស្មើនឹង៨ភូមិ ក្នុងស្រុកដងទង់នេះ គឺជាអំណោយដ៏ថ្លៃថ្លាររបស់ម្តេចតេជោសែន តាមរយៈរូបលោកផ្ទាល់។ ផ្លូវនេះក្រោយពេលស្ថាបនារួចវាអាចជួយសម្រួលដល់ការធ្វើដំណើរ ដូចជាការដឹកជញ្ជូនកសិផលទៅលក់ដូរតាមទីផ្សារ និងទៅកាន់បណ្តាស្រុកផ្សេងៗ សិស្សានុសិស្សទៅសាលារៀន បងប្អូនស្ត្រីមានផ្ទៃពោះ ឬឈឺថ្កាត់យប់ព្រលប់ ត្រូវទៅមណ្ឌលសុខភាព មន្ទីរពេទ្យផ្សេងៗ ជួយសម្រួលដល់ជីវភាពរស់នៅ របស់ពលរដ្ឋនៅតាមដងផ្លូវ ឲ្យអាចបង្កើតរបរលក់ដូរនៅផ្ទះ ទាក់ទាញអ្នកវិនិយោគមកអភិវឌ្ឍន៍ ពិសេសអាចធ្វើឲ្យដីឡើងថ្លៃជាដើម ដូចប្រសាសន៍សម្តេចតែងលើកឡើងថា «មានផ្លូវគឺមានសង្ឃឹម»។ លោកអភិបាលខេត្ត ក៏បានបញ្ជាក់ទៀតថា ទាំងនេះគឺកើតឡើងបានដោយសារតែប្រទេសជាតិយើងមានសុខសន្តិភាព ដែលសម្តេចតេជោ ហ៊ុន សែន ខិតខំអស់កម្លាំងកាយចិត្ត យកអាយុជីវិតទៅប្តូរ ហើយបើគ្មានសន្តិភាពទេ ក៏គ្មានការអភិវឌ្ឍរីកចម្រើនដូចសព្វថ្ងៃនេះដែរ។ ដូច្នេះដើម្បីតបស្នងសងគុណដល់ទឹកដីកំណើតរបស់បងប្អូន តបស្នងដល់គុណណូបការៈរបស់សម្តេច សូមប្រជាពលរដ្ឋរួមគ្នាគាំទ្រ ថែរក្សា ការពារសន្តិភាពឱ្យបានគង់វង្សទៅមុខទៀត ទោះស្ថិតក្នុងតម្លៃណាក៏ដោយ។ លោកអភិបាលខេត្ត នឹងជំរុញដល់ក្រុមហ៊ុនទទួលម៉ៅការការសាងសង់ផ្លូវ ធ្វើយ៉ាងណាខិតខំសាងសង់ឱ្យបានឆាប់រហ័ស តាមស្តងដាលក្ខណៈបច្ចេកទេសត្រឹមត្រូវ។ ទន្ទឹមនេះ លោក ម៉ៅ ធនិន ក៏បានអំពាវនាវដល់បងប្អូនទាំងអស់ សូមទៅចាក់វ៉ាក់សាំងនៅតាមមណ្ឌលសុខភាព ឬមន្ទីរពេទ្យបង្អែកនានាក្នុងខេត្តរាល់ម៉ោងធ្វើការ ពិសេសត្រូវបន្តអនុវត្តន៍ជាប្រចាំនូវវិធានសុវត្តិភាព ៣កុំ ៣ការពារ៕