កំណាត់ផ្លូវជាតិលេខ៧ ពីចំណុចរង្វង់មូលខ្លាស្ទុះ ក្នុងក្រុងក្រចេះ ទៅដល់ភូមិរមាត ក្នុងស្រុកសំបូរ ប្រវែងជាង ៩៣គីឡូម៉ែត្រ ចំណាយថវិកាសាងសង់ជាង ៣៣លានដុល្លារ សម្ពោធដាក់អោយប្រើប្រាស់ជាផ្លូវការនៅថ្ងៃនេះ ក្រោមអធិបតីសម្តេចតេជោ ហ៊ុន សែន នាយករដ្ឋមន្ត្រី។ កំណាត់ផ្លូវជាតិលេខ៧ នេះ ត្រូវបានរាជរដ្ឋាភិបាលកម្ពុជា ចាត់ទុក ជាខ្សែផ្លូវដ៏មានសក្ដានុពលមួយ តភ្ជាប់ផ្ទៃក្នុងកម្ពុជា បម្រើឱ្យចរាចរណ៍សម្រាប់សកម្មភាពផ្លាស់ប្តូរសេដ្ឋកិច្ច ពាណិជ្ជកម្ម និងទេសចរណ៍ ហើយក៏ជាផ្នែកមួយនៃផ្លូវអាស៊ាន ហាយវ៉េយ លេខ១១ (AH11) តភ្ជាប់ពីទីក្រុងគុនមីង នៅភាគខាងត្បូងនៃប្រទេសចិន ឆ្លងកាត់ទីក្រុងវៀងច័ន្ទនៃប្រទេសឡាវ កាត់រាជធានីភ្នំពេញ និងឆ្ពោះទៅកំពង់ផែក្រុងព្រះសីហនុនៃប្រទេសកម្ពុជាផងដែរ។