រសៀលថ្ងៃ៨រោច ខែភទ្របទ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃពុធ ទី២៩ ខែកញ្ញា ឆ្នាំ២០២១ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូន និងគណៈប្រតិភូ អមដំណើរដោយឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ បានអញ្ជើញចុះពិនិត្យការដ្ឋានស្ថាបនាផ្លូវសម្តេ ចសង្ឃរាជ ទេព វង្ស តភ្ជាប់ពីផ្លូវជាតិលេខ៤ ត្រង់រង្វង់មូលសម្តេចសង្ឃរាជ ទេព វង្ស ឆ្ពោះទៅកាន់រង្វង់មូលស្រុកស្ទឹងហាវ និងពីរង្វង់មូលស្រុកស្ទឹងហាវ ឆ្ពោះមកកាន់វិថីផែ ស្ថិតក្នុងសង្កាត់ លេខ៣ ក្រុងព្រះសីហនុ ខេត្តព្រះសីហនុ។ ក្នុងឱកាសនោះ ឯកឧត្តម ទេសរដ្ឋមន្ត្រី ស៊ុន ចាន់ ថុល បានធ្វើការណែនាំដល់ក្រុមហ៊ុនទទួលការសាងសង់ ត្រូវយកចិត្តទុកដាក់ធ្វើការជួសជុលផ្លូវជាប្រចាំ ដោយដាក់គ្រឿងចក្រឈូសឆាយពង្រាបផ្លូវឱ្យបានរាបស្មើល្អ ដើម្បីងាយស្រួលក្នុងការសម្រួលការធ្វើចរាចររបស់បងប្អូនប្រជាពលរដ្ឋ ។ ​បន្ទាប់មកគណៈប្រតិភូ ក៏បានអញ្ជើញបន្តចុះពិនិត្យមើលផ្លូវលេខ៨០០ និងពិនិត្យសកម្មភាពកាយស្តារអូរ ប្រឡាយ នៅចំណុចស្ពានអូរ១ និងអូរ២ រួចបន្តទៅអាងចម្រោះទឹកកខ្វក់ ១៦ហិកតា នៅចុងឆ្នេរអូរឈើទាល ក្នុងភូមិសាស្ត្រសង្កាត់លេខ៤ ក្រុងព្រះសីហនុ ខេត្តព្រះសីហនុ ដើម្បីរំដោះជំនន់ទឹកភ្លៀង កុំឱ្យជនលិចផ្ទះប្រជាពលរដ្ឋ៕