ឯកឧត្ដម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំប្រចាំខែស្ដីពីវឌ្ឍនភាពគម្រោងប្រព័ន្ធផ្លាស់ប្ដូរទិន្នន័យអេឡិចត្រូនិកនៅកំពង់ផែ (Port EDI) តាមប្រព័ន្ធវីដេអូពីចម្ងាយ ដោយ មាន ការ ចូលរួម ពីថ្នាក់ដឹកនាំក្រសួងទទួលបន្ទុក, តំណាងអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ, តំណាងកំពង់ផែស្វយ័តភ្នំពេញ, តំណាងកំពង់ផែស្វយ័តក្រុងព្រះសីហនុ, និងតំណាងអគ្គនាយកដ្ឋានគយ និងរដ្ឋាករនៃក្រសួងសេដ្ឋកិច្ច និងហិរញ្ញវត្ថុ, មន្ត្រីជំនាញ, ក្រុមអ្នកបច្ចេកទេស, និងភាគីពាក់ព័ន្ធ កាលពី ថ្ងៃ៧រោច ខែភទ្របទ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃអង្គារ ទី២៨ ខែកញ្ញា ឆ្នាំ២០២១ នៅទីស្តីការក្រសួង។ នៅក្នុង ឱកាសនោះ ឯកឧត្តមរដ្ឋលេខាធិការ បានស្នើឱ្យបណ្ដាអង្គភាពទាំងឡាយពិចារណា ឱ្យបានហ្មត់ចត់ក្នុងការចាត់តាំងមន្ត្រីឱ្យមកចូលរួមការបណ្តុះបណ្តាល អំពីការប្រើប្រាស់ប្រព័ន្ធនេះ ។ ពោលគឺត្រូវចាត់បញ្ជូនមន្ត្រីណាដែលចាំបាច់សម្រាប់អង្គភាពរបស់ខ្លួន មានសមត្ថកិច្ច និងមានសិទ្ធិក្នុងការសម្រេចនៅពេលដំណើរការប្រព័ន្ធ ដោយហេតុថាការបណ្ដុះបណ្ដាល មិនអាចប្រព្រឹត្តទៅច្រើនលើកបានទេ។ ជាមួយគ្នានេះដែរ ឯកឧត្តមរដ្ឋលេខាធិការបានមាន ប្រសាសន៍ថា នៅពេលប្រព័ន្ធផ្លាស់ប្តូរទិន្នន័យអេឡិចត្រូនិកនៅកំពង់ផែ (Port EDI) ត្រូវបានអភិវឌ្ឍន៍ និងដំឡើងរួចរាល់ ប្រព័ន្ធនេះ នឹងត្រូវដាក់ឱ្យដំណើរដោយអនុក្រឹត្យមួយ មិនមែនអភិវឌ្ឍន៍ និងដំឡើងរួច ដំណើរការតែម្ដងនោះទេ ។ ដោយឡែកនីតិវិធីពាក់ព័ន្ធដែលមិនចាំបាច់គួរពិភាក្សា ដើម្បីកែសម្រួលនៅពេលក្រោយ។ ទន្ទឹមនឹងនេះ អង្គប្រជុំបានផ្តោតការពិភាក្សាជាសំខាន់ លើផែនការបណ្តុះបណ្តាល មន្ត្រីបង្គោល អំពីការប្រើប្រាស់ប្រព័ន្ធផ្លាស់ប្ដូរទិន្នន័យអេឡិចត្រូនិកនៅកំពង់ផែ (Port EDI) សម្រាប់មន្ត្រីគយ និងរដ្ឋាករ មន្ត្រីកំពង់ផែ និងមន្ត្រីសមត្ថកិច្ចពាក់ព័ន្ធផ្សេងទៀត ដែលគ្រោងនឹងប្រព្រឹត្តទៅនៅពាក់កណ្តាលខែវិច្ឆិកា ឆ្នាំ២០២១ នៅពេលប្រព័ន្ធនេះត្រូវបានដំឡើងដំណាក់កាលដំបូង និងលំហូរនៃប្រព័ន្ធផ្លាស់ប្ដូរទិន្នន័យអេឡិចត្រូនិកនៅកំពង់ផែ ពីដំណាក់កាលមួយទៅកាន់ដំណាក់កាលមួយ ដើម្បីឈ្វេងយល់បន្ថែមអំពីពាក្យដែលត្រូវប្រើប្រាស់នៅក្នុងប្រព័ន្ធនេះ៕