ភ្នំពេញ ថ្ងៃទី១៣ ខែ​មេសា ឆ្នាំ​២០២១ -- លោកជំទាវ កុយ សុដានី រដ្ឋលេខាធិការ ក្រសួងសាធារណការ និងដឹកជញ្ជូន និងលោកស្រី KAMEI Haruko តំណាងទីភ្នាក់ងារJICA ប្រចាំកម្ពុជា បានអញ្ជើញធ្វើជាសហប្រធានដឹកនាំកិច្ចប្រជុំស្តីពីកិច្ចដំណើរការ នៃការអនុវត្តគម្រោងធ្វើឱ្យប្រសើរឡើងនូវប្រព័ន្ធភ័ស្តុភារកម្មនៃកម្ពុជា (ជំហានទី២) តាមប្រព័ន្ធវីដេអូពីចម្ងាយ កាលពីថ្ងៃ១កើត ខែពិសាខ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃចន្ទ ទី១២ ខែមេសា ឆ្នាំ២០២១ ដើម្បីប្រមូលធាតុចូលមតិយោបល់ពីគ្រប់ភាគីពាក់ព័ន្ធទាំងអស់ដែលជាសមាជិក សមាជិកានៃគណៈកម្មាធិការសម្របសម្រួលរួម (Joint Coordinating Committee) សម្រាប់គម្រោងធ្វើឱ្យប្រសើរឡើងប្រព័ន្ធភ័ស្តុភារកម្មនៅកម្ពុជា ដើម្បីបង្កើតជាមូលដ្ឋានទិន្នន័យ និងព័ត៌មានក្នុងការអនុវត្តគម្រោងនេះឱ្យមានភាពរលូន និងប្រសិទ្ធភាពខ្ពស់។ នៅក្នុងឱកាសនោះ លោកជំទាវរដ្ឋលេខាធិការ បានគូសបញ្ជាក់អំពីសារៈសំខាន់នៃការបង្កើតផែនការមេថ្នាក់ជាតិភ័ស្តុភារកម្ម យោងតាមតម្រូវការចាំបាច់ នៃផែនការយុទ្ធសាស្រ្តអភិវឌ្ឍន៍ជាតិ និងគោលនយោបាយអភិវឌ្ឍន៍ដើម្បីបញ្ចុះតម្លៃដឹកជញ្ជូន និងភ័ស្តុភារកម្មប្រកបដោយភាពប្រកួតប្រជែង ដែលអាចឱ្យកម្ពុជាមានឱកាសទាក់ទាញវិនិយោ គិនបង្កើតការងារធ្វើជូនប្រជាពលរដ្ឋ។ ជាមួយគ្នានេះដែរ លោកជំទាវ បានមាន​ប្រសាសន៍ថា ដើម្បីឱ្យប្រព័ន្ធភ័ស្តុភារកម្មកម្ពុជាកាន់តែមានការរីកចម្រើន កម្ពុជាត្រូវសិក្សាផែនការមេថ្នាក់ជាតិភ័ស្តុភារកម្ម ឱ្យបានច្បាស់លាស់ ដោយឈរលើស្មារតីសាមគ្គីភាព រួមគ្នាក្នុងការធ្វើឱ្យប្រសើរឡើងដល់ប្រព័ន្ធដឹកជញ្ចូនប្រកបដោយប្រសិទ្ធភាព គួរជាទីទុកចិត្ត និងស្របតាមការផ្លាស់ប្តូរ និងទំនើបកម្មរបស់ពិភពលោក។ ទន្ទឹមនឹងនេះ លោកជំទាវរដ្ឋលេខាធិការ បានស្នើឱ្យសមាជិកសមាជិកាគណៈកម្មា ធិការសម្របសម្រួលរួម និងភាគីពាក់ព័ន្ធទាំងអស់សហការឱ្យបានជិតស្និទ្ធ ដើម្បីចូលរួមធ្វើយ៉ាងណាឱ្យគោលនយោបាយភ័ស្តុភារកម្ម ដំណើរការទៅដោយរលូន និងអាចធ្វើការផ្លាស់ប្ដូរព័ត៌មានទិន្នន័យដោយលក្ខណៈរលូន ក្នុងការអនុវត្តគម្រោងនេះ។ សូមបញ្ជាក់ថា ដើម្បីឱ្យប្រព័ន្ធភ័ស្តុភារកម្មកម្ពុជា មានការរីកចម្រើនបាន រាជរដ្ឋាភិបាលបានសម្រេចបង្កើតក្រុមប្រឹក្សាជាតិភស្តុភារកម្ម (ឡូជីស្ទីក) មានភារកិច្ចតាក់តែងគោលនយោបាយ និងស្វែងរកដំណោះស្រាយបញ្ហាក្នុងប្រព័ន្ធឡូជីស្ទីកកម្ពុជា ដែលរំពឹងថានឹងជួយពង្រឹងប្រសិទ្ធភាពចរាចរណ៍ទំនិញ និងភាពប្រកួតប្រជែងរបស់កម្ពុជាលើឆាកអន្តរជាតិបាន៕