[BTV] - ចំណូលកំពង់ផែស្វ័យតក្រុងព្រះសីហនុ សម្រេចបានជាង៧៥ លានដុល្លារឆ្នាំ២០២០
2021-03-01
ទៅកាន់ទំព័រចុះផ្សាយក្នុង BTV
ភ្នំពេញ៖ រាជរដ្ឋាភិបាលរកចំណូលពីកំពង់ផែស្វយ័តក្រុងព្រះសីហនុ បានជាង៧៥លានដុល្លារ ថយចុះ៧ភាគរយបើធៀបនឹងឆ្នាំ២០១៩ ខណៈដែលចំនួនកុងតឺន័រឆ្លងកាត់ (ចេញ/ចូល) មានជាង៦២ម៉ឺនTEU ។
របាយការណ៍បូកសរុបលទ្ធផលការងារប្រចាំឆ្នាំ២០២០ និងទិសដៅការងារឆ្នាំ២០២១របស់ក្រសួងសាធារណការ និងដឹកជញ្ជូន នៅឆ្នាំ២០២០ បង្ហាញថា មានទំនិញឆ្លងកាត់ផែព្រះសីហនុជាង៦,៤លានតោន ក្នុងនោះ នាំចូលមានជាង៤,៨លានតោន ហើយនាំចេញមានជាង១,៦លានតោន។
ចំនួនកុងតឺន័រឆ្លងកាត់ដែរ គឺមានជាង៦២ម៉ឺនTEU (ឯកត្តាកុងតឺន័រ) ដែលក្នុងនោះ កុងតឺន័រនាំចូលមានជាង៣០ម៉ឺនTEU ហើយកុងតឺន័រនាំចេញមានជាង៣១ម៉ឺនTEU។ បរិមាណកុងតឺន័រឆ្លងកាត់ឆ្នាំ២០២០ បើធៀបនឹងឆ្នាំ២០១៩ គឺមានការធ្លាក់ចុះជិត៣ភាគរយ ដែលឆ្នាំ២០១៩មានជិត៦៤ម៉ឺនTEU។
ក្រសួង អះអាងថា ការធ្លាក់ចុះនៃចំនួនកុងតឺន័រ និងចំណូលនៅឆ្នាំ២០២០នេះ ដោយសារវិបត្តិសកល ជំងឺកូវីដ–១៩។ ទន្ទឹមនឹងនេះ ក្រសួង នៅមានគម្រោងអភិវឌ្ឍន៍របស់ខ្លួនជាច្រើនទៀត រួមមាន ការសាងសង់ចំណតផែ នាវាសណ្ដោង, បំពាក់គ្រឿងចក្រលើកដក់កុងតឺន័រ, រៀបចំពង្រីកផ្លូវនៅផែកុងតឺន័រ, សាងសង់ស្ថានីយកុងតឺន័រថ្មីជាដើម។
សូមជម្រាប់ថា រយៈពេលពេញមួយឆ្នាំ នៃឆ្នាំ២០២០ គឺមាននាវាចូលចតនៅកំពង់ផែព្រះសីហនុជាង១៥០០គ្រឿង៕
