ស្ពាន​ដែក​បាឡេ​ត្រូវបានសាងសង់ឡើង​ដើម្បីរំដោះចរាចរណ៍ ក្នុងអំឡុង​ពេល​ស្ពានជ្រោយចង្វារទីមួយ ឬស្ពានមិត្តភាព​កម្ពុជា-ជប៉ុន កំពុងជួសជុល។ ស្ពានដែកឆ្លងកាត់ទន្លេសាប​ដែល​តភ្ជាប់​ពីឬស្សីកែវ ទៅកាន់តំបន់ជ្រោយចង្វារនេះ ត្រូវបានចាប់ផ្តើម​សាងសង់​នៅថ្ងៃទី២៤ ខែតុលា ឆ្នាំ២០១៧ និង​បញ្ចប់​នៅថ្ងៃទី៥ ខែឧសភា ឆ្នាំ​២០១៨ គឺមានរយៈពេលសាងសង់ ៦ខែ ១១ថ្ងៃ ដោយ​ក្រុមហ៊ុន OCIC ក្រោម​ទុនវិនិយោគជាង ១០លានដុល្លារ។ ស្ពាននេះ មាន​ប្រវែងសរុប ៦៥៥ម៉ែត្រ ក្នុងនោះ​តួស្ពាន​ប្រវែង ៥០៥ម៉ែត្រ គល់ស្ពាន​សងខាង​ប្រវែង ១៥០ម៉ែត្រ ទទឹងស្ពាន ១២ម៉ែត្រ។ បើគិតប្រវែងពី​ផ្លូវជាតិ​លេខ​៥ ដល់ផ្លូវ​ជាតិលេខ​៦ ឆ្លងកាត់​ស្ពាន គឺ​មាន​ប្រវែង​សរុប ៩៧៥ម៉ែត្រ។ វាជាស្ពាន​ចរាចរណ៍​ទ្វេរទិស សម្រាប់​រថយន្ត ១គន្លង​ទៅ ១គន្លង​មក និង​ម៉ូតូ ១គន្លង​ទៅ ១គន្លង​មក ដែលល្បឿនកំណត់ ២៥គីឡូម៉ែត្រ​ក្នុង១ម៉ោង និងមិនអនុញ្ញាតឱ្យ​អ្នកថ្មើរជើងដើរឆ្លងកាត់ឡើយ៕