រាជរដ្ឋាភិបាលបានកំណត់ក្នុងផែនការរៀបចំដែនដីខេត្តព្រះសីហនុ ចក្ខុវិស័យឆ្នាំ២០៣០គឺរៀបចំនិងអភិវឌ្ឍខេត្តព្រះសីហនុជាប៉ូលអភិវឌ្ឍន៍ជាតិប្រកបដោយចីរភាពនៅតំបន់ឆ្នេរសមុទ្រកម្ពុជាតាមរយៈការអភិវឌ្ឍទីក្រុងទំនើប រមណីយដ្ឋានឆ្នេរសមុទ្រដែលស្អាតបំផុតលើសកលលោកនិងជាតំបន់សេដ្ឋកិច្ចពិសេសគំរូពហុបំណង ច្រកចេញចូលអន្តរជាតិ មជ្ឈមណ្ឌលកំណើនជាតិ។ នេះបើតាមការឱ្យដឹងរបស់លោក អ៊ី សុខឡេង អភិបាលនៃគណៈអភិបាលក្រុងព្រះសីហនុ បានមានប្រសាសន៍ក្នុងសន្និសីទសារព័ត៌មានស្តីពីវឌ្ឍនភាពនិងទិសដៅការងារបន្តរបស់រដ្ឋបាលក្រុងព្រះសីហនុនាទីស្តីការគណៈរដ្ឋមន្រ្តីកន្លងទៅនេះថា៖ រាជរដ្ឋាភិបាលបានស្ថាបនាផ្លូវចំនួន១១ខ្សែបន្ថែមទៀត ក្រៅពីផ្លូវ៣៤ខ្សែ ដែលផ្លូវទាំង១១ខ្សែនេះ ទទួលលទ្ធផលសម្រេចបាន ២១ភាគរយហើយ ជាសមិទ្ធផលថ្មីដែលប្រជាពលរដ្ឋនៅក្រុងព្រះសីហនុ និងមួយផ្នែកទៀតនៅស្រុកព្រៃនប់និងស្រុកស្ទឹងហាវទទួលបានសមិទ្ធផលទាំងផ្លូវ៣៤ខ្សែនិង១១ខ្សែបន្ថែមទៀត។ ផ្លូវទាំងអស់មានចាក់គ្រឹះបេតុងខាងក្រោម និងចាក់អ៊ុតកៅស៊ូពីលើ ហើយគម្រោងនេះ តាមការណែនាំពីលោក គួច ចំរើន អភិបាលខេត្តព្រះសីហនុ ក្រុមការងារបច្ចេកទេសនឹងខិតខំធ្វើឲ្យរួចរាល់ នៅមុនពិធីបុណ្យចូលឆ្នាំខ្មែរ ២០២១ ខាងមុខ។ ជាមួយគ្នានេះ មន្ត្រីជំនាញបានសុំការយោគយល់ពីពលរដ្ឋឬកន្លែងអាជីវកម្មផ្សេងៗ ជាប់សងខាងផ្លូវ ចំពោះការប៉ះពាល់មួយចំនួន ដូចជាករណី ពិបាកចេញ ចូលមុខផ្ទះជាដើម ក្នុងរយៈពេលការជួសជុលកំពុងដំណើរការ។ គួរបញ្ជាក់ផងដែរ៖ ផ្លូវបន្ថែមចំនួន ១១ខ្សែនេះ មានប្រវែងជាង ៥៨គីឡូម៉ែត្រ បានសម្ពោធបើកការដ្ឋានកាលពីថ្ងៃទី១៤ ខែកុម្ភៈ ឆ្នាំ២០២០។ ក្នុងនោះ ការជួសជុលស្ថាបនាផ្លូវលេខ២០០ បែកចេញពីផ្លូវឯករាជ្យត្រង់ស្ថានីយប្រេងសូគីម៉ិច ចូលទៅផ្សារលើ ដែលអនុវត្តន៍គម្រោងដោយមន្ទីរសាធារណការ និងដឹកជញ្ជូនខេត្តព្រះសីហនុ កំពុងដំណើរការ ទាំងការស្ថាបនាតួផ្លូវ ប្រព័ន្ធលូបង្ហូរទឹក និងហេដ្ឋារចនាសម្ព័ន្ធផ្សេងៗសងខាងផ្លូវ ស្ថិតក្រោម គម្រោងវិនិយោគ ស្តារ និងអភិវឌ្ឍន៍ ហេដ្ឋារចនាសម្ព័ន្ធ នៅខេត្តព្រះសីហនុ ផ្លូវចំនួន ១១ ខ្សែដែលដ្ឋាភិបាលទម្លាក់កញ្ចប់ថវិកាស្ថាបនាដោយប្រើប្រាស់ថវិកាសន្សំរបស់ជាតិ ចំនួន ១០០ លានដុល្លារ តាមរយៈក្រសួងសាធារណការ និងដឹកជញ្ជូន។