[Koh Santepheap] - សូមអ្នកបើកបររថយន្តធំៗគោរព សិទ្ធិអាទិភាពអ្នកបើករថយន្តតូចផង
2020-12-31
ទៅកាន់ទំព័រចុះផ្សាយក្នុង Koh Santepheap
រាជធានីភ្នំពេញ៖ ដើម្បីពញ្ញាក់ស្មារតីដល់អ្នកបើកបរគណៈកម្មាធិការសុវត្ថិភាពចរាចរណ៍ផ្លូវគោកបានធ្វើយុទ្ធនាការផ្សព្វផ្សាយការអប់រំ សុវត្ថិភាពចរាចរណ៍មុនបំណាច់ឆ្នាំចាស់ចូលឆ្នាំថ្មី។
លោក ជំទាវ មឹន មាណវី រដ្ឋលេខាធិការក្រសួងសាធារណៈការ និងដឹកជញ្ជូន និងជាអគ្គ លេខាគណៈកម្មាធិការជាតិសុវត្ថិភាពចរាចរណ៍ផ្លូវគោកបានឲ្យដឹងនៅក្នុងពិធីចែកមួយកសុវត្ថិភាព និងការអប់រំច្បាប់ចរាចរណ៍ នាព្រឹកថ្ងៃទី៣១ ខែធ្នូ ឆ្នាំ២០២០ថា កម្មវិធីថ្ងៃនេះដើម្បីក្រើនរំលឹកដល់ប្រជាពលរដ្ឋដែលធ្វើដំណើរតាមផ្លូវនេះ (ផ្លូវវិមានឈ្នះៗស្ថិតក្នុងសង្កាត់ព្រែកតាកេស ខណ្ឌជ្រោយចង្វារ)មានការប្រុងប្រយ័ត្នក្នុងការធ្វើដំណើរ ។
លោកជំទាវបានបញ្ជាក់ថា ៖«នេះជាចុងឆ្នាំផង ហើយទោះបីជាកូវីដ១៩ ក៏បងប្អូនប្រពលរដ្ឋយើងនៅតែដើរលេងផងដែរ ។ អីញ្ចឹងយើងទៅយើងត្រូវតែធ្វើការរំលឹកធ្វើយ៉ាងណាឲ្យគាត់ប្រុងប្រយ័ត្នក្នុងការធ្វើដំណើរ ។ ព្រោះប៉ុន្មានថ្ងៃនេះ គ្រោះថ្នាក់ចរាចរណ៍ច្រើន៧ ឬ៨នាក់» ។
លោកជំទាវបានឲ្យដឹងថា គណៈកម្មាធិការជាតិសុវត្ថិភាពចរាចរណ៍ផ្លូវគោកបានស្នើឲ្យអាជ្ញាធរនៅរាជធានី ខេត្តទាំងអស់ឲ្យធ្វើការផ្សព្វផ្សាយរៀងៗខ្លួន ។ ចំណែកយើងធ្វើនៅទីនេះ ហើយគេនឹងធ្វើនៅកន្លែងផ្សេងទៀតមុនដាច់ឆ្នាំចាស់ ។ យ៉ាងណាក្តីលោកជំទាវថា ការធ្វើការអប់រំផ្សព្វផ្សាយនេះមិនបានធ្វើឲ្យទូលំទូលាយពេកទេ ព្រោះដើម្បីការពារការឆ្លងជំងឺកូវីដ១៩ ។ នេះដោយសារបញ្ហាគ្រោះថ្នាក់ច្រើនពេក ហើយយើងបានបញ្ចប់ព្រឹត្តិការណ៍សហគមន៍២៨វិច្ឆិកា ។
ជាមួយគ្នានោះដែរ លោកជំទាវរដ្ឋលេខាធិការក៏បានអះអាងថា ក្នុងឆ្នាំ២០២០ ប្រជាពលរដ្ឋមានការគោរពច្បាប់ចរាចរណ៍បានច្រើន ដោយសារអត្រាគ្រោះថ្នាក់ចរាចរណ៍ មានការថយចុះ ។ លោកជំទាវាថា៖«១០ ឬ១១ខែហ្នឹង យើងអាចជួយជីវិតមនុស្សបានជាង២០០នាក់ ដោយសារការខិតខំរបស់មន្ត្រីនគបាល ការផ្សព្វផ្សាយផង និងការយល់ដឹងពីប្រជាពលរដ្ឋបានច្រើនផង ។ អីញ្ចឹងគាត់បានយល់ដឹងបានជាង៧៩ភាគរយហើយ»។
ក្នុងឱកាសនោះដែរ លោកជំទាវក៏បានអំពាវនាវដល់ប្រជាពលរដ្ឋមានការយកចិត្តទុកដាក់ចំពោះការពារការឆ្លងជំងឺកូវីដ១៩ រួមទាំងការរួមគ្នាការពារអាយុជីវិតនៅក្នុងការធ្វើដំណើរនៅតាមដងផ្លូវផងដែរ ។ សូមបើកបរឲ្យមានការប្រុងប្រយ័ត្ន និងសួមឲ្យអ្នកបើកបររថយន្តធំៗមេត្តាយោគយល់ចំពោះអ្នកបើករថយន្តតូចៗ កុំឲ្យមានការអធ្យាស្រ័យ ព្រោះថា រថយន្តធំពេកបុកម្តងៗមានករណីស្លាប់ច្រើន ។
លោកជំទាវរដ្ឋលេខាធិការបញ្ជាក់ថា៖«អីញ្ចឹងសូមគោរពសិទ្ធិអាទិភាព ចំពោះអ្នកបើកបរផ្លូវតូចៗមក ដោយកុំអាងថាយើងនៅលើផ្លូវធំមិនគោរព និងទៅមុន កុំបត់ កុំជែង កុំពិសាគ្រឿងស្រវឹងនៅពេលបើកបរ ហើយត្រូវចេះបើកឲ្យស្ទាត់ និងចេះច្បាប់ ចរាចរណ៍ឲ្យស្ទាត់…»។
សូមជម្រាបថា គណៈកម្មាធិការជាតិសុវត្ថិភាពចរាចរណ៍ផ្លូវគោកបានសហការណ៍ជាមួយអជ្ញាធរដែនដី និងអគ្គស្នងការនគបាលរាជធានីភ្នំពេញ និងដែលគូពាក់ព័ន្ធផ្សេងទៀត៕
